Президент Гаглойты Алан фембæлд, 9 июны парламентон æвзæрстыты хайадисæг политикон партиты лидертимæ.
Фембæлды рæстæджы Президент банысан кодта, зæгъгæ, Парламентмæ æвзæрстытæ хъуамæ уагъд æрцæуой барад хъахъхъæнгæйæ æмæ сабырадон уавæрты, уыимæ ма æрсидт алкæмæ дæр конструктивон диалогмæ.
«Парламентмæ æвзæрстытæ адæмæн æмæ республикæйæн дæр у ахсджиаг цау. Нæ хæс у сабырадон уавæрты сæ ауадзын æмæ æппæт барадон нормæтæ хъахъхъæнын. Уымæ сидын æз сымахмæ дæр», – загъта Президент.
Уый ма йæ ныхасмæ бафтыдта, зæгъгæ, Хуссар Ирыстоны разамынады ‘рдыгæй æппæт мадзæлттæ дæр ист æрцыд, цæмæй æвзæрстыты агъоммæ республикæйы хъахъхъæд цыдаид сабыр æмæ стабилон уавæр.
Паддзахады сæргълæууæг ма комментари сарæзта республикон политикон парти «Иугонд Ирыстон»-ы сидтытæн сæрмагонд æфсæддон операцийы зонæйы æвзарæн фадыг байгом кæныны тыххæй.
«Ахæм хъусынгæнинæгты æз нымайын провокационыл. Уыдон дзуапп нæ дæдтынц сæрмагонд æфсæддон операцийы хайадисæг хæстонты æдасдзинадæн. Нæй гæнæн нæ хæстонты цард тасы æппарын хи политикон нысæнтты хæрзиуæгæн», – загъта уый.
Президент банысан кодта, зæгъгæ, алчидæр хъуамæ æрбацæуа æвзарæн фадгуытæм æмæ хайад райса æвзæрстыты.
«Мæн ныфс ис, 9 июны Хусар Ирыстоны адæм кæй æрбацæудзысты æвзарæн фадгуытæм æмæ кæй сараздзысты раст равзæрст. Республикæйы разамынад йæхи рады цæттæ у закъондæдтынадон хицауиуæгадимæ иумæ конструктивон æмæ æнтыстджын куыстмæ паддзахад æмæ адæмы хæрзиуæгæн», – загъта Президент.
Уымæй дарддæр ма паддзахады сæргълæууæг банысан кодта, цæттæ кæй у уыцы политикон тыхтимæ кусынмæ, кæцытæ хъуыды кæнынц сæ адæмы рухс фидæныл.
Республикæ Хуссар Ирыстоны Коммунистон партийы сæрдар Коцты Станислав фехъусын кодта, зæгъгæ, Хуссар Ирыстонмæ æнхъæлмæ кæсы æхсæнады царды зынгæ цау.
«Парламентмæ хъуамæ æрцæуой æнæниз тыхтæ, кæцытæ хъуамæ разамынд кæной паддзахады интерестæй», – загъта уый.
Йæ ныхæстæм гæсгæ, æгас дуне, цавæрфæнды хицауад дæр бындуриуæг кæны компромисстыл.
«Æнæ компромисстæй æхсæнады фæзыны кризис. Уый хъуамæ алчидæр бамбара», – банысан кодта уый.
Фембæлды хайадисджытæй алчидæр йæ хъуыдытæ загъта æрбалæугæ æвзæрстыты тыххæй.
Политикон парти «Ныхас»-ы сæрдар Бесаты Зитæ сразы ис уыцы хъуыдыйыл, зæгъгæ, æвзæрстыты агъоммæ рæстæг у сабыр æмæ стабилон.
«Парламентмæ æвзæрстытæ алы паддзахадæн дæр у нысаниуæгджын цау. Æвзарæг цахæм равзæрст сараза, уымæй кæнгæ у политикон стабилондзинад. Æз бузныг зæгъын, абон ам чи сты, уыцы оппоненттæн сæ корректондзинады тыххæй. Мæн ныфс ис, адæм 9 июны кæй æрбацæудзысты æвзарæн фадгуытæм æмæ раст равзæрст кæй сараздзысты æнæниз тыхты пайдайæн æмæ республикæйы хæрзиуæгæн», – загъта Бесаты чызг.
Республикон политикон парти «Иудзинад»-ы сæрдар Кокойты Зураб загъта ахæм ныфс, зæгъгæ, æвзæрстыты хъæлæс дæттынмæ æрбацæудзæн бирæ адæм.
Адæмон партийы сæрдар Харебаты Сергей банысан кодта, зæгъгæ, Хуссар Ирыстоны адæм сты куырыхон æмæ сараздзысты раст равзæрст сæ республикæйы хæрзиуæгæн.
Политикон парти «Иры фарн»-ы сæрдар Цоциты Хох загъта, аппоненттæн кæй хъæуы аргъ кæнын æмæ сæм æвдисын кæй хъæуы корректондзинад.
Партиты лидертæ бузныг загътой Гаглойты Аланæн Республикæ Хуссар Ирыстоны Парламентмæ æвзæрстыты агъоммæ фембæлды тыххæй.
Кæронбæттæны Президент ноджыдæр банысан кодта, æвзæрстыты ахсджиагдзинад.
«Партиты цы адæймæгтæ ис, уыдон сты республикæйы æмбæстæгтæ, республикæйы æмбæстæгтæ та – Хуссар Ирыстон. Мæ цæст уарзы акæмæн дæр, цæмæй æвзæрстыты фæстиуджытæ фæахъаз уой нæ паддзахады хæрзиуæгæн», загъта уый.
Фембæлдмæ не ‘рбацыдысты «Адæмы иудзинад», æмæ «Иугонд Ирыстон»-ы лидертæ.
