Тæбæхсауты Балойы номыл Цæгат Ирыстоны паддзахадон академион театры уыдис цытджын мадзал зынгæ ахуыргонд æмæ паддзахадон архайæг Цыбырты Людвигы райгуырдыл 90 азы сæххæсты цытæн.

Мадзалы хайад райстой РХИ-йы разамынад Президент Гаглойты Аланы сæргълæудæй, политикон архайджытæ æмæ Ирыстоны цæгат æмæ хуссар хайы зонад-сфæлдыстадон интеллигенцийы минæвæрттæ, ахуыргонды хæлæрттæ æмæ коллегæтæ.

Юбилярæн раарфæ кодта Хуссар Ирыстоны Президент.

Гаглойты Алан банысан кодта, зæгъгæ, профессионалон æмæ паддзахадон архайды æппæт этапты Цыбырты Людвиг равдыста бæрзонд хъуыддагон миниуджытæ æмæ Хуссар Ирыстоны адæмы хъысмæтыл бæрндзинад.

«Ды хауыс зынгæ адæмы нымæцмæ, кæцытæ стыр æндæвдад бахастой Хуссар Ирыстоны ног историмæ. Дæ царды азтæ снывонд кодтай зонад-иртасæн куыст æмæ зонадон-педагогон архайдæн. Ирæтты традицион культурæйы дæ куыстытæн стыр аргъ скодта академион æхсæнады. Дæ коллегæты æмæ студентты бирæ фæлтæрты æхсæн дын ис æгæрон кад», — загъта уый.

Гаглойты Алан банысан кодта Цыбырты Людвигы хайбавæрд РХИ-йы паддзахаддзинад арæз-тад, конституцион бындурæвæрд æмæ социалон-экономикон рæзты:

«Фыццаг Президенты бынаты кусгæйæ æнустæм дæ ном бафыстай нæ паддзахады историйы. Дæ куысты райдианы зын рæстæг уыдис, фæлæ уæддæр республикæ фидар кодта æмæ рæзтис. Ныфс мæ ис, дæ авторитет, ахуыргонды курдиат æмæ уникалон политикон фæлтæрддзинад дарддæр дæр лæггад кæндзысты Фыдыбæстæйæн», — загъта Президент.

Юбилярæн ма раарфæ кодтой РЦИ-Аланийы Хицауады сæрдар Дзанайты Борис, РЦИ-Аланийы Парламенты сæрдар Тускъаты Таймураз, зонад-сфæлдыстадон интеллигенцийы минæвæрттæ, Уæрæсейы Федерацийы алы регионтæй уазджытæ.

РЦИ-Аланийы сæргълæууæг Сергей Меняйло æрбарвыста арфæ.