Ахуырады къабазы кусджыты раз ис рӕзгӕ фӕлтӕры ахуыр-хъомыладон куысты бæрнон хӕстӕ. Уымӕ гӕсгӕ Цхинвалы районы адӕмон ахуырады хайад ӕмӕ ахуыргӕнджыты коллектив архайынц, цӕмӕй сомбонӕн хъомыл кӕной аккаг фӕлтӕр. Уый цасдӕрбӕрцӕй сӕ къухты ӕфтгӕ дӕр кӕны, фӕлӕ уӕддӕр сæ архайды ис къуылымпыдзинӕдтӕ дӕр. Фӕстиуджытӕ арӕзт ӕрцыд, 2017-2018-ӕм ахуыры азы фыццаг ӕрдӕджы цахӕм æнтыстытæ равдыстой, уыдонæн. Адӕмон ахуырады хайад ӕмӕ скъолаты педколлективтӕн сӕ куыст здӕхт уыд уымæ, цӕмӕй ахуыры ӕмвӕзад фӕхуыздӕр уа, ахуыргӕнинӕгты цӕттӕ ӕмӕ хъомыл кӕной сомбоны активон цардмӕ. Зымӕгон улӕфты бонты фӕстӕ районы адӕмон ахуырады хайады методисттӕ ӕмӕ раззагон специалисттӕ систематикон ӕгъдауӕй цыдысты скъолатӕм ӕмӕ уагътой ӕнӕмӕнгхъӕуӕг мадзæлттӕ, цӕттӕ кодтой уалдзыгон предметон олимпиадӕтӕм. Алы скъолайы дӕр уагъд ӕрцыдысты къласӕн ӕддейӕ мадзӕлттӕ, куыд Сылгоймӕгты дунеон бон – 8-ӕм марты цытӕн, Фыдыбӕстӕ хъахъхъӕнӕджы, Ирон ӕвзаг ӕмӕ литературӕйы бонтӕ, скъола кастфӕуӕг ахуыргӕнинӕгтӕн рауагъдон бал, Республикӕ Хуссар Ирыстоны бӕрӕгбон, Хетӕгкаты Къостайы райгуырды бон, Адӕмы иудзинады бон ӕмӕ ӕндӕртӕ. Районы скъоладзаутӕ хайад райстой, республикӕйы фӕлгӕтты цы мадзӕлттӕ уагъд цыдысты, уыдоны. Зӕгъӕм, ӕфсӕддон-спортивон хъазт «Зарница», театралон аивады фӕдыл 16 ноябрӕй 24 ноябрмӕ ахуыргӕнинӕгтӕ хайад райстой ӕппӕтуӕрӕсеон бирӕпрофилон инженерон олимпиадӕ «Звезда»-йы. Ацӕугӕ ахуыры азы ахуыргӕнджыты зынгӕ хай ацыдысты радон аттестацийы ӕмӕ сын сӕ фӕстиуджытӕ банымайӕн ис хорзыл. Хайады методисттӕ рӕстӕгӕй рӕс-тӕгмæ ӕххуыс кодтой ӕвзонг ахуыр-гӕнджытӕн, уагътой сын семинартӕ ӕмӕ мастер-къластӕ. Адӕмон ахуырады хайад къуыри иу хатт скъолаты директортӕн уагъта ӕмбырдтӕ ӕмӕ дзы уынаффӕ цыд иууыл ахсджиагдӕр фарстыты фӕдыл.
Скъолаты стыр проблемӕ ссис хӕрӕндӕтты куыст. Ӕдзухон басгӕрстытӕ уадзы санитарон-эпидемиологон службӕ, рабӕрӕг дзы кӕны фӕтк халыны цаутӕ ӕмӕ сӕ домӕнтӕн сӕххӕстгӕнӕн кæй нæй, уымӕ гӕсгӕ ӕмбӕлон фыстæг арвыстӕуыд уӕлдӕрлӕууӕг органтӕм, цӕмӕй булкӕтӕ скъолаты хӕрӕндӕттӕм ласой дзулфыцӕн комбинатӕй.
Районы адӕмон ахуырады хайад, фӕсивӕды хъуыддӕгты фӕдыл комитет, прокуратурӕ ӕмӕ ӕнахъомты фӕдыл инспекцийы кусджытӕ цыдысты скъолатӕм ӕмӕ профилактикон беседӕтӕ уагътой ахуыргӕнинӕгтимӕ алыгъуызон ахсджиаг ӕмӕ риссаг темӕты фӕдыл, уагътой беседӕтӕ зынхъомылгӕнӕн скъоладзауты ный-йарджытимӕ. Зӕгъын хъӕуы, скъолаты ӕдӕппӕт цы 196 ахуыргӕнинаджы ахуыр кӕны, уыдоны ‘хсӕн бӕрцыл кæй сты, тынг хорз ӕмӕ хӕрзтыл чи ахуыр кӕны, ахæмтæ. Бӕлвырддӕр зӕгъгӕйӕ та фӕндзтыл ахуыр кӕнынц ӕрмӕстдӕр ӕртӕйӕ ӕмӕ 62-йӕ та ахуыр кӕнынц цыппӕртыл. Уый у тынг цъус ӕмӕ йыл хъӕудзӕн ахъуыды кӕнын. Скъолаты фаг нӕй цӕстуынгӕ ӕрмӕджытӕ ӕмӕ ахуыры техникон фӕрӕзтӕ, афтӕ ма спортивон ифтонггӕрзтӕ дӕр.
Ахуырады хайады куысты цы цухдзинӕдтӕ ис, уыдон сын зындгонд сты ӕмӕ сӕ дарддӕры куыст ӕмӕ архайд здӕхт уыдзӕн ахуырады гъӕд фӕхуыздӕр кӕнынмæ.
Хуыбиаты Никъала
Comments are closed, but trackbacks and pingbacks are open.