Уыдысты футболæй Уæрæсейы Фыццаг дивизионы чемпионаты 26-æм туры хъæзтытæ. Дзæуджыхъæуы «Алани» дарддæр дæр æвдисы мæгуырау бæрæггæнæнтæ. Командæ ныр та хъазыд чемпионаты лæмæгъдæр командæтæй сæ иу – «Ленинградец»-имæ æмæ та йын нæ бантыст рамбулын. Фембæлд фæцис 3:3 хыгъдæй. Банысан кæнын хъæуы уый дæр, æмæ «Алани» кæй æмбылды кодта 3:2 хыгъдæй. Æрмæстдæр ын хъазты уæлæмхас рæстæджы 11-метрон цæфы фæрцы бантыст хыгъд сæмхуызон кæнын. Алайнæгты сконды расгуыхтысты Цæллæгаты Ибрагим, Гаглойты Тарас æмæ Николай Гиоргобиани.
Афтæмæй «Алани» фæстаг 11 хъазтæй фæуæлахиз æрмæстдæр иу хатт. Уыцы хабар, кæй зæгъын æй хъæуы, бандæвта турнирон таблицæйы командæйы уавæрыл. «Алани» 37 очкоимæ цæуы 6-æм бынатыл.
Ирыстоны сæйраг футболон командæ радон хъазт акæндзæн 13-æм апрелы Красноярскы «Енисей»-мæ.
ХУРИТЫ Батрадз
