ФИЛЬМ РАЙСТА СÆРМАГОНД ХОРЗÆХ

Ирон æвзагыл кинофильм «Разжимая кулаки» райста Европæйы киноакадемийы специалон хорзæх. Европæйаг киноакадеми фехъусын кодта специалон хорзæхты хицæутты, кæцытæ сын ратдзысты 2021 азы 11-æм декабры Берлины European Film Awards-ы 34-æм церемонийы. Премийы сайты куыд хъусын кæнынц, уымæ гæсгæ аст кинематографисты скондæй жюри уæлахиздзауты сбæрæг кодта аст номинацийы. Уыцы нымæцы ис уæрæсейаг режиссер Кира Коваленкойы фильм «Разжимая кулаки», кæцы хорзæх райсдзæн хуыздæр монтажы тыххæй (монтажы режиссер у Къæбулты Мухарам).

«Режиссер Кира Коваленко йæ фильмыл бакуыста лæмбынæг. Фæлæ хорз фильм саразынæн æмæ сисынæн хъæуы курдиатджын æмæ профессионалон командæ. Мах фыццаг хатт нæ куыстам Къæбулты Мухарамимæ, кæцы тынг арф равдисы режиссеры хъуыды. Зæрдæбынæй арфæ кæнæм Мухарамæн йæ хорзæхы тыххæй», – загъта фильмы продюсер Александр Роднянский. Фильм «Разжимая кулаки»-йыл куыст цыд монтажер Венсана Девойы хайадистæй. Уый размæ Къæбулты 32-аздзыд чызг хайад иста ахæм фильмтæ сисыныл, куыд Исмаил Сафаралийы «Дочь рыбака», Наташа Меркуловайы «Капитан Волконогов бежал», Анастасия Пальчиковайы «Маша», Александр Лунгины «Большая поэзия»-йы æмæ æндæрты.

Уæрæсейаг Оскары комитет октябры мæйы раразмæ кодта фильмы «Оскар»-ы премимæ бæстæйы минæвары хуызы. Фильм «Разжимая кулаки»-йы архайд цæуы Цæгат Ирыстоны чысыл шахтерон поселок Мызуры, сюжеты центры сты поселочы цæрæг Зауыры бинонтæ. Уырдæм Зауыр цæрынмæ ракодта йæ лæппуты æмæ чызджы, кæцыты хъомыл кæны карзæй æмæ нæ зоны арæнтæ фыды аудындзинад æмæ гиперæвджидауы ‘хсæн. Хистæр Аким алыгъд æввахсдæр егъау горæт Ростовмæ кусынмæ. Кæстæр Дакко нырма æххæстæй нæ бамбæрста царды йæ цы хъæуы, уый. Æмæ астæуккаг Адæ та активонæй аразы хæдзарæй алидзыны æмæ хисæрмагонд цард райдайыны плæнттæ.

Фильмы ролты хъазынц Æгъуызарты Миланæ, Хъараты Алик, Хуыгаты Сослан, Бибылты Хетæг, Хетæгкаты Арсен, Пагæты Миланæ. Киноакадеми номинантты кæройнаг номхыгъд фехъусын кæндзæн 2022 азы 8 февралы. Хорзæхтæ радтыны церемони уыдзæн иннæ аз марты мæйы. Драмæйæн саккаг кодтой сæйраг хорзæх 2021 азы Каннскы фестивалы «Особый взгляд»-ы программæйы нысаниуæгмæ гæсгæ. Европæйаг киноакадемийы преми фидар æрцыд 1988 азы.