Хуссар Ирыстоны киностуди Allonfilm хорзæхджын æрцыд 10-æм æхсæнадæмон телефестиваль «Вечный огонь»-ы диплом «За верность теме»-йæ. Хуссарирыстойнаг киностудийы документалон фильм «Пари со смертью» нымад æрцыдис аккагыл æмæ ахызт финалмæ. Ацы æнтыст æмæ æхсызгон хъуыддагыл фæцин кодтой уæлдæрбанысангонд киностудийы сфæлдыстадон коллектив дæр æмæ ма сæм сæ хъус чи дардта, æппæт уыдон дæр.
Стыр фыдыбæстæйон хæстыл 75 азы сæххæсты цытæн Уæрæсейы Федерацийы æппæт регионты дæр уагъд цыдысты алыгъуызон культурон мадзæлттæ онлайн-режимы руаджы, нæ бæстæйыл коронавирус кæй апарахат æмæ дзы хи бахизын кæй хъуыдис, уый тыххæй. Ацы ахсджиаг æмæ нысаниуæгджын датæйы сæраппонд сентябры мæйы кæрæтты Волгограды онлайн форматы уагъд цыдис Æфсæддон-патриотон фильмтæ æмæ программæты 10-æм æхсæнадæмон телеуынынадон фестиваль «Вечный огонь», зæгъгæ, ахæм номимæ. Ацы фестивалы тыххæй развæлгъау фехъусын кодтой нæ республикæйæн дæр æмæ дзы хайад райста кинокомпани «Allonfilm» дæр, кæцыйы къухдариуæггæнджытæ сты Мамиты Григори æмæ Бестауты Юля. Фестивальмæ ацы аз уыдон бавдыстой дыууæ документалон фильмы «Фарастæй иумæ» æмæ «Пари со смертью» ахæм номинациты, куыд «Хуыздæр документалон фильм» æмæ «Хуыздæр режиссерон куыст» æмæ сын фестивалы жюрийы уæнгтæ скодтой аккаг аргъ. Документалон фильм «Пари со смертью» фестивалы ахызт финалмæ. Фестивалы компетентон жюри хуссарирыстойнаг киностудийы схорзæхджын кодта диплом «За верность теме»-йæ.
Киностуди «Аллонфильм»-ы директор Мамиты Григори куыд банысан кодта, афтæмæй уыдон нæ бæстæйы сæргълæууæг Бибылты Анатолийы æххуысæй кæнынц се сфæлдыстадон куыст. «Нæ Президенты æххуысæй мах фильмтæ сисæм нæ хъайтартыл, нæ бæстæйы историйыл æмæ уыцы æххуысæй стæм стыр бузныг. Уымæн æмæ нын фадат вæййы Уæрæсейы фестивальты хайад райсынæн. Ацы фестивалы мах уыдыстæм æртæ фыццаг лидерты æхсæн æмæ нын ныр æрæрвыстой диплом «За верность теме», зæгъгæ, ахæм номимæ. Нæ командæ ацы хъуыддагыл сæмбæлдис стыр цины æнкъарæнтимæ, уымæн æмæ нын аккагæй саргъ кодтой нæ куыстæн. Уый махæн, кæй зæгъын æй хъæуы, тынг æхсызгон у, стимул нын дæтты нæ дарддæры сфæлдыстадон куыстæн. Ацы документалон фильмтæ рацыдысты 2018-æм азы. Нæхимæ, Хуссар Ирыстоны кинотеатр «Чермен»-ы сын сарæзтам презентаци дæр æмæ хуссарирыстойнаг телекæсджытæ базонгæ сты семæ. Кæд æмбулгæ нæ ракодтам, уæддæр нæ фильм бахаудта æртæ фыццаг лидерты æхсæнмæ», – банысан кодта Мамиты Григори.
Банысан кæнын хъæуы уый æмæ ацы фестивалы хайад кæй райстой Уæрæсе, Белорус, Украинæ, Казахстан, Молдова, Приднестровье, Сомихстон, Азербайджан, Абхаз, Хуссар Ирыстон, Австрали, Итали, Китай æмæ Францы телекусджытæ.
Нæ уацх.
Comments are closed, but trackbacks and pingbacks are open.