Ныр дыккаг аз нæ республикæйы архайы æхсæнадæмон мультимедион агентад æмæ радио – Sputnik, кæцыйы сконды сты ирон æмæ уырыссаг æвзæгты порталтæ, бæрзондтехнологион пресс-центр æмæ радио. Нырыккон мультимедион фæзуат Sputnik-ы байгом нæ республикæйы у ахсджиаг цау информацион къабазы. Уымæн æмæ йын нæй аналогтæ. Уый у иунæг мультимедион агентад, кæцы дæтты ирон æвзагыл информаци. Уымæй дарддæр ма республикæйæн фадат ис видеобастдзинæдтæ аразын дунейы цыфæнды къуыммæ дæр. Уый та нын фадат дæтты нæхи сæрмагонд цæстæнгас æвди-сынæн, æндæр æмæ æндæр проблемæты фæдыл онлайн режимы дзурынмæ. Ам цы журналисттæ кусынц, уыдон Sputnik-ы кæсджыты размæ хæссынц, канд дунейы цымыдисон цаутæ нæ, фæлæ республикæйы æрцæугæ актуалон цаутæ дæр. Радио Sputnik Хуссар Ирыстон дзуры ирон æмæ уырыссаг æвзæгтыл дæр. Уый дæр адæмы размæ хæссы æхсæнадон, политикон æмæ культурон тематикæйы фæдыл программæтæ. Афтæ ма алæвæрдтæ, ног хабæртты бон æртæ хатты.
Ивгъуыд аз Sputnik, нæ университеты журналистикæйы факультеты цы студенттæ ахуыр кæны, уыдонæн бакодта журналистикæйы сæрдыгон скъола. Дыууæ мæйы редакцийы коллектив дих кодтой сæ фæлтæрддзинад фидæны журналисттимæ – Хуссар Ирыстоны паддзахадон университеты студенттимæ. Цæмæй уæлдай хуыздæр банкъардтаиккой агентады куыст, уый тыххæй активондæр студенттæн радих кодтой кусæгон бынæттæ, мультимедион хабæртты редакцийы офисы. Не студенттæ базонгæ сты куысты форматимæ, сæхи бафæлвæрдтой уацхæсджытæй. Базыдтой СМИ-йы службæйы куысты сусæгдзинæдтæ, æмæ райстой хайад агентады проектты реализацийы. Sputnik Хуссар Ирыстоны конд æрцыд «Студентон колонкæ», æмæ сæрдыгон скъолайы хайадисджытæ цы æрмæджытæ ныффыстой, уыдон мыхуыр æрцыдысты порталыл.
Sputnik-ы къухдариуæггæнæг Нарек Ордян куыд загъта, афтæмæй «ахæм практикон куыст баххуыс уыдзæн студенттæн сæ дарддæры профессионалон рæзтæн. Æцæг журналист суæвæн ис æрмæстдæр практикон æгъдауæй алцыдæр сфæлтæргæйæ. Махæн, агентадæн, нæ нысан æрмæст ног хабæрттæ адæттын нæу. Мах цымыдис кæны республикæйы фидæны медиа-къабазы райрæзт дæр. Ныфс нæ ис, махмæ цы фæлтæрддзинад райсынц студенттæ, уый сын кæй феххуыс уыдзæнис сæ дарддæры профессионалон архайды», – дзырдта уый.
16-æм февралы та уæлдæр банысангонд проекты фæлгæтты информацион агентад æмæ радио Sputnik – Хуссар Ирыстон ауагъта гом дуæртты бон, ХИПУ-йы студенттæн. Журналистикæйы факультеты студентты фембæлд райдыдта редакцийы центр Sputnik-ы экскурсийæ. Нарек Ордян æмæ порталы шеф-редактор Гасситы Динæ фенын кодтой æмæ бацамыдтой, куыд хъæуы аразын ног хабæрттæ æмæ куыд кусынц нырыккон дзыллон-информацион фæрæзтæ. Уый фæстæ Sputnik-ы уазæг, Националон иртасæн университет «Высшая школа экономики»-йы коммуникаци, медиа æмæ дизайны факультеты профессор Олег Дмитрев студенттæн ауагъта мастер-класс ахæм темæйыл: «Как расказать историю в мультимедийном мире». Райдианы Нарек Ордян загъта: «Журналистикæйы бæрзонд стандарттæ хъахъхъæнын у нæ агентады сæйраг принцип, уымæй дарддæр ма мах архайæм республикæйы фидæны журналистты размæцыдыл, уымæ гæсгæ цæттæ стæм нæ фæлтæрддзинадыл æндæрты дæр цайдагъ кæнынмæ».
Профессор Олег Дмитрев студенттæн лæмбынæг æмæ хайгай æмбарын кодта журналистикæйы сусæгдзинæдтæ. Иу кæнæ иннæ информаци куыд хъæуы рахæссын æхсæнады размæ, цæмæй сæм цымыдисдзинад сæвзæрын кæна. Хаста сын дæнцæгтæ зынгæ журналистты æрмæджытæй.
Студенттæн беседæ сæ зæрдæмæ кæй цæуы, уый бæрæг уыд, цы бирæнымæц æмæ алыгъуызон фарстатæ лæвæрдтой националон иртасæн университеты профессормæ, уымæй. Студенттæ куыд загътой, афтæмæй уыдон æнæрхъæцæй фенхъæлмæ кæсынц Sputnik-ы фæхуындмæ, уымæн æмæ ардыгæй ахæссынц бирæ позитивон æнкъарæнтæ.
Уæ зæрдыл уын лæууын кæнæм Sputnik – Хуссар Ирыстон кæй у æхсæнадæмон информацион агентад, æмæ иу кæны дунейы 30 æвзагыл сайтты.
Уазæгты Марфа
Comments are closed, but trackbacks and pingbacks are open.