Республикон министрадтæ æмæ ведомствотæ ныридæгæн бавнæлдтой, фидæн азы цы куыстытæ кæндзысты æмæ цавæр проекттæ æххæст кæндзысты, уыдоны номхыгъдтæ æмæ плæнттæ аразынмæ. Кæй зæгъын æй хъæуы, уыцы программæтæ æххæст кæныны фарстатæ хъуамæ бæстон хыгъд æрцæуой фидæны азы бюджеты проекты. Куыд зонæм, афтæмæй æрæджы Хицауады æмбырды фидаргонд æрцыд фидæн азы бюджетмæ иуæй-иу ивддзинæдтæ бахæссыны тыххæй закъоны проект. Уыцы ивддзинæдты руаджы республикон бюджеты æфтиæгтыл бафтдзæн æртæ миллиардæй фылдæр федералон бюджетæй. Уыимæ, уыцы фæрæзтæ куыд дихгонд æрцæудзысты, уый фæдыл профилон ведомствотæ сæ фæндæттæ æрбалæвæрдтой. «Фидæн азы программæйы бæлвырд фыст хъуамæ æрцæуой æппæт саразинаг хъуыддæгтæ дæр, æмгъуыдтæ фæбæрæг кæнгæйæ. Зæрдыл дарын хъæуы, цас бæстондæр æмæ бæрнондæрæй бакусæм 2022 азы бюджеты уагæвæрдыл, уый бæрц æнтыстджын дæр уыдзæн регионы дарддæры социалон-экономикон райрæзт. Бюджеты проектыл кусгæйæ, сæрмагонд æргом аздахын хъæудзæн национ проекттæ æмæ нысанмæ арæзт паддзахадон программæтæ æххæст кæнынмæ дæр», – загъта Хицауады Сæрдар Дзанайты Барис.
Уый ма сæрмагонд амынддзинæдтæ радта Финансты министрады разамындæн, цæмæй, республикон ведомствотæ æмæ муниципалитетты куырдиæттыл кусгæйæ, бæстон бахынца фидæны бюджеты æфтиæгтæ æмæ хæрдзты æмвæзад.
***
Республикæйы разамынд аразы алы мадзæлттæ, цæмæй фæндæгтыл транспорты змæлды къаддæр фыдбылызтæ цæуа. Ныр дæр Транспорты министрад сфæнд кодта ног фæлварæн скæнын. Уый та у Фæндæгты змæлды организацион центр бакæнын Цæгат Ирыстоны. Ныртæккæ уыцы фарстыл кусы республикæйы парламент. Центры нысан уыдзæн фæндæгты змæлды æдасдзинад бæрæг кæнын æмæ разамынд дæттын дæрддзæг хуызы; æнæнхъæлæджы уавæртæ дардмæ равзарын; транспорты æмæ фæндæгты инфраструктурæйы уавæр иртасын, светофорты æмæ камерæты куыст бæрæг кæнын æмæ æнæнхъæлæджы уавæрты цырд мадзæлттæ саразын. Центры уыдзæн стыр видеокъул, кæцыран æвдыст цæудзæн æнæхъæн республикæйы фæндæгты уавæр. Ног куыстуат уыдзæн Транспорты министрады дæлбар.
Ахæм центр æрæджы фæзынди Ставрополы. Уый у фыццаг ахæм Цæгат Кавказы. Ныр уыцы фæлтæрддзинад райсын сæ зæрды ис Цæгат Ирыстоны разамындæн дæр.
***
Дзæуджыхъæуы бынæттон администраци рахаста фæндон, горæты цы видеоцæстдарды камерæтæ ис, уыдоныл 470 бафтауын. Уыдон сæ «цæст дардзысты» горæты змæлдмæ. Ног камерæтæ æвæрд æрцæудзысты паддзахадон куыстуæтты фарсмæ, базарадон центрты, фæзты, хидтыл æмæ стыр змæлд кæм ис, ахæм æхсæнадон бынæтты. Камерæтæй информаци цæудзæн Æдасдзинады федералон службæмæ, Æнæнхъæлæджы уавæрты министрадмæ æмæ Мидхъуыддæгты министрадмæ. Специалистты хъуыдымæ гæсгæ, камерæтæй тæрсгæйæ, фыдракæндтæ дзæвгар фæкъаддæр уыдзысты.
Проект арæзт цæуы республикæйы бюджеты фæрæзтæй æмæ скусдзæн ног азы мартъийы мæйы.
Нæ уацх.
Comments are closed, but trackbacks and pingbacks are open.