Цхинвалы фæстаг хæрзбон загътой Республикæ Хуссар Ирыстоны Адæмон артист, Хетæгкаты Къостайы номыл Паддзахадон драмон театры актер Харебаты Федрæн.
Фæстаг хæрзбон зæгъыны церемони уагъд æрцыд, Харебаты Федр цы хæдзары цард, уый кæрты.
Адæмон артисты фæстаг фæндагыл афæндарст кæнынмæ æрбацыдысты Президент Гаглойты Алан, Хицауады Сæрдары хæстæ æххæстгæнæг Бекъойты Геннади, зонад-сфæлдыстадон интеллигенцийы минæвæрттæ, республикæйы æхсæнад.
Фыдохы митинджы рæстæджы Харебаты Федры номыл бирæ хорз ныхæстæ загъд æрцыд. Паддзахадон драмон театры аивадон къухдариуæггæнæг Дзуццаты Тамерлан банысан кодта, Харебаты Федр театры коллективæн, фыццаджыдæр, кæй уыд ахуыргæнæг.
«2022 аз театрæн нымад уыд юбилейоныл, фæлæ ацы аз мах фесæфтам Галуанты Людмилæ, Хъæцмæзты Фатимæ, Харебаты Федры. Уый у стыр зиан театры алы кусæгæн дæр», – загъта уый.
Профессор Плиты Гацыр радзырдта артисты цардуагон фæндаджы тыххæй, банысан кодта, зæгъгæ, уый фæцард зын, фæлæ ирд цард.
Харебаты Федр фæзиан йæ царды 92 азы. Ныгæд æрцыд Хуссар Ирыстоны Национ пантеоны
Comments are closed, but trackbacks and pingbacks are open.