Цард тыхджын æмæ вазыгджын у. Хай ратонын дзы алкæмæ дæр æмбæлы. Цард æгуыдзæджы нæ уарзы. Уарзы сæрæн гуырдты, зондджын æмæ хъаруджынты, нæртон адæймæгты. Цард адджын у, фæлæ цыбыр æмæ фæлитой, æууæнк ыл нæй, йæ чъылдым дæм кæд фездахдзæн, уый ничи зоны. Уымæн дзурынц нæ адæм: цард фæдис у, фæдисонæн та æйтт адæймаг хъæуы.

Адæймагæн царды фæндæгтæ алыгъуызæттæ вæййынц. Чи дзы цæуыл фæхæст вæййы, кæцы дзы равзары, уым та хъуамæ ныууадзай лæджы фæд. Фæцæрын, азтæ батонын, уый диссаг нæу. Диссаг уый у, цы дзы равзæрстай æмæ дзы цы сарæзтай.

Театралон фæндаг равзæрста йæ сабион бонты нæ абоны курдиатджын актертæй иу — Харебаты Жан-Жак.

Жан-Жакæн æрдз радта удыгъæды хорз миниуджытæ: зæрдæйы хæлардзинад, зонды рæсугъд хъуыдытæ, тых æмæ æмгæртты уарзын, Ир æмæ Ирыстоныл аудын, национ театры артдзæсты кусын, йæ къонайы арт кæнын.

Харебайы фырт абон у нæ Республикæйы  театры сгуыхт артист. Нæ театры кусы 1994 азæй фæстæмæ, Мæскуыйы Михаил Щепкины номыл театралон ахуыргæнæндон каст куы фæцис, уæдæй. Æниу институты агъоммæ дæр иу 8 азы бакуыста алыгъуызон бынæтты нæ театры. Республикæйы сгуыхт артисты ном та райста 2004 азы. Æвзонгæй ахæм бæрзæндмæ схизай, уый чысыл хъуыддаг нæу.

Йæ царды фæндæгтæ лæгъз æмæ æнцонцæуæн нæ уыдысты, нæ зыдта фыды рæвдыд, йæ мад — дохтыр Розалинæ фæбадт йæ иунæджы номыл, ракодта йæ царды фæндагыл, радта йын астæуккаг ахуырад.

Жан-Жак астæуккаг скъолайы хæнтфæстæ не ‘ссис студент æмæ йæ фидæны ахуыры азæн та хъуыд куысты ныллæууын. Йæ хорз зонгæ йæ бакодта театрмæ «сау» кусæгæй.  Æвзонг лæппу фæцыд коллективы зæрдæмæ, цы йын хæс кодтой, уый арæзта æнæзивæгæй, æххæст кодта къаннæг ролтæ дæр.

Ралæууыд 1990 аз. Уæд та ногæй Мæскуыйы Михаил Щепкины номыл театралон ахуыргæнæндон йæ дуæрттæ байгом кодта Хуссар Иры фæсивæдæн. Æрвыст æрцыд ахуырмæ 10 лæппуйы æмæ 6 чызджы. Сæ институт æнтыстджынæй каст фесты 1994 азы æмæ, зæгъæн ис, абоны театры уæз уыдоны уæхсчытыл кæй æнцайы. Уыдон та сты: Бибылты Сослан, Хуыгаты Дзамболат, Багаты Георги, Джиоты Аслан, Пæррæстаты Димитр, Гаглойты Артур, Медойты Алыксандр, Харебаты Жан-Жак, Елбачиты Рамаз, Чилæхсаты Эдуард, Гобозты Галинæ, Джиоты Альмæ, Джиоты Бэлæ, Таугазты Дзерассæ, Гæбæраты Иринæ, Дыгъуызты Жаннæ.

Нæ адæм уæззау дуджы къухы бахаудтой 1989 -2008 азты. Кæд куыста нæ театр, уæддæр йæ тых саст уыд. Мæнгард сыхæгты ныббырст нæ театрæй сарæзта хуыдон, ныппырх кодтой къуымтæ, Къостайы цырт. Цы дзы уыд хорзæй, уыдон аластой. Театр нæ ахуыссыд, змæлыд. Уыцы тугуарæнты уыдис æвзонг Жан-Жак дæр.

Жан-Жак хорзæн мысы Мæскуыйы театралон рæстæг, йæ аивадон къухдариуæггæнæг Монахов В.Б., Исаты Мæхæмæт æмæ йæ бинойнаджы, уыдон сын кастысты лекцитæ ( уæлдайдæр — йæ бинойнаг) ирон литературæйы, стæй уæд нæ театры историйæ, нæ драматургийæ. Хорзæн мысы Ерохина Татьяна æмæ иннæ лекторты дæр.

Нæ театрмæ æрыздæхтысты цыппар стыр хуынимæ: «Худæджы хабар» (К. Го-льдони), Шекспиры «Ромео æмæ Джульеттæ», «Медея» (Софокл), стæй уæд Уанеты Вл. «Алантæ» — имæ. Цыппар спектаклы дæр егъау уыд Жан-Жакы хайбавæрд, ахсджиаг ролтæ дзы æххæст кодта.

Алыварсон курдиаты хицау у Жан-Жак. Канд актер нæу, фæлæ ма бирæ вазыгджын куыстытæ æххæст кæны нæ театры. Спектаклты цы кæфтытæ, музыкæ, зарджытæ вæййы, уыдон æвæрæг — Жан-Жак.

Иу рæстæджы нæ университеты куыста аивæдты факультет. Уый каст фесты, æмæ уæлдæр кæй ранымадтон, уыдонимæ уæхскуæзæй кусынц: Æлборты Агуындæ, Букуылты Сослан, Куымæридтаты Батрадз, Битеты Миленæ, Харебаты Лейлæ, Хуыгаты Альбинæ, Чохели Натия æмæ Цоциты Никъала.

Театралон предметтæ сын амыдтой: Цоциты Къæдзæх, Таугазты Гаврил, Зæгъойты Руслан, Харебаты Федя æмæ Жан-Жак. Фондз азы фæкуыста уыдонимæ Жан-Жак, сæйраджыдæр сын амыдта фехтовани, хъаматæ æмæ æхсаргæрдтимæ архайын.

Абоны бон дæр дзы рох нæу ахуыр — хъомыладон куыст. Кæд ын дард у, уæддæр æнæзивæгæй цæуы Знауыры скъоламæ, кусы дзы ахуыры хайады уагæвæрды хистæрæй.

Æнæрынцой зæрдæйы хицау у Жан-Жак, бирæ цыдæртæ йæ фæнды саразын Ирыстоны фæлтæрæн. Нæ сахары театрæй дарддæр архайы бирæ ахсджиаг хъуыддæгтыл. Арæх исы къаннæг-цыбыр кинонывтæ дæр. Цы сарæзта, уы-доны сæйрагдæртæ сты: «Месть и закон» («Мастисæн æмæ закъон»), «Везунчик» («Йæ хъул сах бады», «Рихиджынтæ хъуыддаджы» ). Мастисыны фæндæгтæ, дохтырты митæ æмæ милицийы хъуыддæгтæ — уыдæттæ сты йæ ныхасы сæйраг æууæлтæ ацы къаннæг кинонывты.

Се ‘ппæт дæр хорз, фæлæ нæ ныхасы сæйрагдæр у — Жан-Жак-актер.

Дзæвгар у сæ нымæц, Жан-Жак цы спектаклты хъазыд æмæ хъазы, уыдонæн. Йæ саразгæ фæлгæндзтæ канд Ирæттæ не сты, уынæм дзы æндæр нациты минæвæртты фæлгæндзтæ дæр.

Йæ ирон фæлгæндзтæ, æмæ пьесæтæ сты: Уанеты В. «Алантæ» — Сафайы роль; Галуанты Л. «Дзæнæты фæндаг зындонмæ» — Фидар; Гаглойты Вл. «Ныййарæджы кадæг» — Дади; йæ уырыссаг фæлгæндзтæ сты: Пушкины «Пир…»-ы — Моцарт; А.  Толстойы «Буратино»- йы — Базилио; фæсарæйнаг пьесæтæ: Шекспиры «Юлий Цезарь»-ы — Октавий, «Ромео æмæ Джульетта»-йы — Пьетро, Гольдонийы «Сугътаг фыдсылты» — Хъазуат, Жан Мольеры «Мещанин во дворянстве»-йы — Ковель, Томас Брантоны «Чарлейы мады хо»-йы — Бабс, Пинтер Гарольды «Хъахъхъæнæг»-ы — Астон, Фернандо Аррабаль — «Фандо и Лис»-ы — Митаро, С.Арутюнян «Къулбадæг устыты» — Бирæгъ, Псафасы «Хъæуы нæ фæлитой» æмæ æнд.

Дзæвгар у сæ нымæц, Жан-Жак нæ телеуынынады цы инсценировкæтæ сарæзта, уыдонæн дæр.

Театры спектаклты сфæлындзыны хъуыддаджы егъау у йæ хайбавæрд. Фæлындзыны хъуыддагмæ хауынц: музыкæ равзарын, кæфтытæ сæвæрын, сценæйы массон хылтæ, тохтæ. Ахæм спектаклтæ сты: Ж.Мольеры «Мещанин во дворянстве», Пинтер Гарольды «Сторож», А. Толстойы «Буратино», Хæмыцаты Цæрайы «Дыууæ усгуры», Р.Куни «Нæлгоймаг, сылгоймаг, рудзынг æмæ мард», В.Шекспиры «Гамлет»; фильмтæ: «Месть и закон-2», «Везунчик», «Рихиджынтæ — хъуыддаджы» — уыдис æвæрæг-режиссер.

Жан-Жакы къухæй арæзт æрцыд киностуди «Театр — арт». Уый тыххæй йæм сæрмагонд арфæйы фыстæг æрбарвыста уæды президент Кокойты Эдуард. Ахæм фыстæг ма райста сахар Ульяновскæй дæр.

Кады грамотæтæ бирæ хæттыты æрцыд лæвæрд Жан-Жакæн нæ президенттæй, 2004 азы — Республикæ Хуссар Ирыстоны сгуыхт артисты ном.

Йæ фыццаг бонтæй фæстæмæ арæх æмбæлæм Жан-Жакы тыххæй зæрдæрухсгæнæн ныхæстыл, йæ хъæппæрисадон куыст æмæ тырнындзинæдты тыххæй. 2004 азы газет «Южная Осетия» фыста: «Ж. Ж. Харебов верит и надеется, что все получится. Актер также занимается музыкальным оформлением сценических постановок, а порой и сам сочиняет музыку к спектаклям, обращается к фольклору» (газета «Южная Осетия», 2004 г.)

2003 азы, августы мæйы, кæд змæст дуг бонæй — бон карздæр кодта, уæддæр нæ театр гастролон балцы уыд Ачъарайы. Семæ аластой спектаклтæ: «Блуждающие ангелы», «Юлий Цезарь», «Чарлейы мады хо» æмæ «Амран». Режиссер æмæ сын аивадон къухдариуæггæнæг уыд Дзуццаты Тамерлан.

Батумы театрдзаутæ зæрдæрухсæй сæмбæлдысты нæ театры минæвæрттыл. Егъау аргъ скодтой Бибылты С., Багаты Г., Хаситы В., Тъехты В., Хъæцмæзты Ф., Чохели Н., Хуыгаты А., Къуезерты Ф. æмæ Пæррæстаты Димитры хъазт æмæ архайдæн. Федтой Батум, кæй ис аккаг коллектив Хуссар Иры театрæн, кæй кусы семæ æвзонг, хъаруджын æмæ курдиатджын режиссер Дзуццаты Тамерлан.

Газет «Ачъария» цæстуарзон ныхæстæ фæфыста нæ театры актерты дæсныйады тыххæй, сæ диссаджы арæхстдзинæдтыл. Æнæхъуаджы нæ фæхицæн кодтой режиссер Дзуццайы фырты æмæ актер Харебаты Жан — Жакы.

Тамерланы тыххæй фыстой: «Надо сказать, что коллектив театра во многом обязан своими успехами Тамерлану Дзуццову. Молодой, но уже снискавший признание опытный режиссер, он руководит театром и формирует его творческое направление… Поиск новых изобразительных средств, владение всем арсеналом художественных приемов характерны для его постановок». (г. «Аджария», 23.08.2003).

Батумы театрдзаутæн сæ цæст уæлдай тынгдæр схæцыд Жан -Жакыл. Иууыл арфдæр сæ зæрдæмæ айстой Т. Брантоны комеди «Тетушка Чарлея». Газет фыссы: «Нельзя без восхищения смотреть на исполнителя главной роли актера Жан-Жака Харебова. У зрителя уже сложилось определенное впечатление об этом актере по предыдущим спектаклям. Он одинаково хорошо представляет в разноплановых ролях, перевоплощаясь, то в один, то в другой образ (будь то драматический или комический). Это говорит о его таланте, профессионализме».

Стыр дисы сæ бафтыдта æндæр хъуыддаг дæр. Сæйраг ролы, мады хойы ролы йæ хъазгæ куы федтой, уæд бынтон егъау аргъ скодтой Жан-Жакæн, сæ дисæн кæрон нал уыд. Сæ газет дæр æй уымæн банысан кодта: «Даже женщина не смогла бы так ярко сыг-рать женскую роль, да ещё и проявить свои музыкальные способности» (уый дæр уым).

Харебайы фырт абон дæр уæхск-уæзæй кусы нæ театры, у сценæйы дæсныйады 15 къæпхæны хицау.

Нæ театры коллектив йæхи цæттæ кæны дыууæ стыр бæрæгбонмæ. Фыццаг у: театры сырæзтыл ацы аз æххæст кæны 85 азы. Дыккаг  — ног театр йæ дуæрттæ байгом кæндзæн ацы аз, 2016 азы. Дыууæ стыр цауы, дыууæ стыр хъуыддаджы банысан кæнинаг сты театры коллективæн, директор æмæ режиссертæн. Цы ахсджиаг мадзæлттæ æрцыд банысан уыцы бонтæм, уым егъау уыдзæн Жан-Жакы хайадист дæр. Алыварсон курдиаты хицау у Жан-Жак. Зæгъы йын нæ зæрдæ бирæ азты цæрæнбон йæ адæм æмæ йæ уарзон сценæимæ.

Плиты Гацыр

Comments are closed, but trackbacks and pingbacks are open.