Рæхджы Хетæгкаты Къостайы номыл паддзахадон драмон театр хуссарирыстойнаг театрдзауты зæрдæтæ барухс кæндзæнис Тæбæхсауты Балойы номыл Цæгат Ирыстоны драмон театр æмæ Евгени Вахтанговы номыл уырыссаг академион театры гастролон спектакльтæй. Уымæй дарддæр ма театры программæмæ гæсгæ 5-æм апрелы уагъд æрцæудзæнис Республикæ Хуссар Ирыстоны адæмон артисткæ Гугкаты Эвелинæйы сфæлдыстадон изæр йæ 80 азы юбилейы цытæн. Уый Хетæгкаты Къостайы номыл паддзахадон драмон театры сценæйыл архайдта 50 азæй фылдæр, æмæ сæххæст кодта бирæ æндæр æмæ æндæр цымыдисон рольтæ. Фæлæ йæхæдæг артисткæ куыд зæгъы, афтæмæй йæ иуыл сæйрагдæр æмæ вазыгджындæр ролыл нымайы «Леди Макбет»-ы цы сæйраг роль сæххæст кодта, уый. Гугкаты Эвелинæйы сценæмæкæсджытæ бауарзтой йæ фыццаг къахдзæфтæй фæстæмæ аивады дунемæ æмæ абон дæр стыр аргъ кæнынц йе сфæлдыстадон куыст æмæ профессионализмæн.
Хетæгкаты Къостайы номыл паддзахадон драмон театры пресс-службæйы нын куыд фехъусын кодтой, уымæ гæсгæ Гугкаты Эвелинæ йæ юбилей банысан кодта ивгъуыд аз сентябры мæйы. Фæлæ, бæрæг аххоссæгтæм гæсгæ, уæд театрæн уыцы фадат æмæ уавæртæ нæ уыд, цæмæй артисты юбилей нысангонд æрцыдаид куыд æмбæлд, афтæ, уæрæхæй. «Нæ зынаргъ артисткæ Гугкаты Эвелинæйы номыл юбилейон изæрмæ театры къухдариуæгад фæхуыдтой Цæгат Ирыстон-Аланийы уæвæг театрты артистты дæр. Сфæлдыстадон изæры программæйыл кусынц театры коллектив, уыдон архайынц, цæмæй сæ коллегæйы æмæ театрдзауты зæрдæтæ барухс кæной цымыдисон бæрæгбонон мадзæлттæй. Уымæй дарддæр ма Гугкаты Эвелинæйы юбилейы цытæн лæвары хуызы цæттæ кæнынц хуызджын альбом 300 экземплярæй артисты цард æмæ сфæлдыстады тыххæй. Альбом рауадзыны тыххæй сын финансон æххуыс бакодта Республикæ Хуссар Ирыстоны Президент Бибылты Анатоли.
Нæ театры къухдариуæгадæн Цæгат Ирыстоны театртимæ ба-дзырд кæй ис, уый фæлгæтты дыууæ сфæлдыстадон коллектив кæ-нынц æмгуыст. Фыццаг нæм гастролон балцы фæуазæг уыдзысты цæгатирыстойнаг театрты труп-пæтæ æмæ сæм ныридæгæн нæ республикæйы æмбæстæгтæ æнхъæлмæ кæсынц æнæрхъæцæй.
Тæбæхсауты Балойы номыл паддзахадон театры æрцыдмæ хуссарирыстойнаг театруарзджытæ æнхъæлмæ кæсынц 7-æм апрелы. Уыдон нæм гастролон балцы æрцæудзысты иу боны æмгъуыд-мæ. Театры сценæйыл бонæй уыдон равдисдзысты спектакль сывæллæттæн «Кот в сапогах», изæрæй та – «Зæлийы чындзытæ». «Æрæджы Сылгоймæгты дунеон боны цытæн нæ театрмæ æр-хуыдтам Цæгат Ирыстоны Фæси-вæдон театры артистты, кæцытæ равдыстой спектакль «Ромео и Джульетта». Спектаклы режиссер у Цæгат Ирыстон-Аланийы сгуыхт артист Уалыты Гиви. Уæд ацы спектакльмæ бирæтæ нæ бакастысты, фæлæ йæм чи бакаст, уыдонæй иуты зæрдæмæ тынг фæцыдис, иннæтæм та фæзынд быцæуаг фарстытæ. Уымæ гæсгæ йæм адæмы ‘хсæн сæвзæрдис цымыдисдзинад æмæ театрдзауты домæнмæ гæс-гæ, мах ногæй сфæнд кодтам ацы спектакль равдисын цыппæрæм апрелы изæрæй. Æхсызгонæй ма æнхъæлмæ кæсæм апрелы æм-бисы Евгени Вахтанговы номыл академион театры æрцыдмæ дæр. Уыдон нæм æрцæудзысты цалдæр боны æмгъуыдмæ æмæ, кæй зæгъын æй хъæуы, равдисдзысты цалдæр спектаклы», – загътой пресс-службæйы.
Уымæй дарддæр ма Хетæгкаты Къостайы номыл паддзахадон драмон театр дæр фæнд кæны 11-æм апрелы гастролон балцы ацæуын Цæгат Ирыстонмæ иу боны æм-гъуыдмæ. Театр уырдæм ахæсдзæнис дыууæ спектаклы «Тæрхъусы амонд» æмæ «Нæлгоймаг, сылгоймаг, рудзынг, мард». Театрмæ дарддæр æнхъæлмæ кæсы дыууæ балцы. Уыдон æрæджы хуынд æрцыдысты Майкопы уагъдцæуæг æппæтадæмон фестиваль «Кавказкий меловой круг»-мæ æмæ дзы равдисдзысты спектакль «Антигона». Фестиваль цæудзæнис 22 апрелæй 28 апрелмæ. Фестивалы фæлгæтты ма театрты драматургтæн, литературон кусджытæн уагъд цæудзысты сæ куыстæн ахъазгæнæг семинартæ, тренингтæ æмæ дзы хайад райсдзысты нæ театры кусджытæ дæр. Апрелы мæйы кæрон Луганскы дæр уагъд цæудзæнис театралон фестиваль «Госпожа удача», зæгъгæ, æмæ уырдæм та фæнд кæнынц ахæссын А. Островскийы пьесæмæ гæсгæ æвæрд спектакль «Хъæд», кæцыйы сæвæрдта мæскуыйаг режиссер Андрей Цисарук. Ацы гастролон балцытæн финансон æххуыс кæны нæ республикæйы хицауад æмæ сæ театры къухдариуæгад сæ бузныг.
Нæ уацх.
Comments are closed, but trackbacks and pingbacks are open.