10-æм сентябры 85 азы сæххæст уыдаид Уæрæсейы цæрæг зындгонд ирон фыссæг-фантаст, журналист, уæздан æмæ æцæг хорз адæймаг Фæрниаты Константин Георгийы фырты райгуырдыл.
Фæрниаты Константин райгуырд æмæ схъомыл горæт Пятигорскы. Астæуккаг ахуырад куы райста, уæд æм æрсидтысты службæ кæнынмæ æфсады рæнхъытæм. Константин йе ‘фсæддон хæс куы сæххæст кодта æмæ сæхимæ куы æрыздæхт, уæд сфæнд кодта уæлдæр ахуырад райсын æмæ бацæуæн фæлварæнтæ радта Ташкенты университеты филологон факультетмæ. Фæрниайы фырт ацы уæлдæр ахуыргæнæндон каст фæцис æнтыстджынæй æмæ уайтагъд куысты бынат дæр ссардта Цæгат Ирыстоны АССР-ы телеуынынад æмæ радиоалæвæрдты паддзахадон комитеты. 1978-1980 азты та куыста Цæгат Ирыстоны паддзахадон чингуыты рауагъдад «Ир»-ы. Курдиатджын æмæ куыстуарзаг журналист фæстæмæ æрбаздæхт телеуынынадмæ æмæ ссис хистæр редактор. Уыцы иурæстæджы уыд паддзахадон телерадиокомпани «Алани»-йы коммерцион телеалæвæрдты директор дæр.
Фæрниаты Константинæн Цæгат Ирыстоны чингуыты рауагъдад «Ир»-ы 1975-æм азы мыхуыры рацыдис йæ фыццаг чиныг – документалон уацау «Будь на земле хозяином», зæгъгæ, ахæм номимæ. Уый хæдфæстæ та йын рухс федта йæ детектив «Перстень». Фыссæг æдзухдæр фæлдисыны куыст кæй кодта æмæ йын бирæ кæй æнтыст, уымæ гæсгæ та йын 1978 азы мыхуыры рацыдис йæ радон фантастикон уацау «Взорванные лабиринты», кæцыйы архайд цæуы æрæмысæггаг бæстæ Аранийы. Сюжеты сæйраджыдæр дзырд цæуы Зæххыл æндæр дунейæ æрцæуæггæгты социологон эксперименты тыххæй. 1980-æм азы чиныг «Взорванные лабиринты» бахауд Берлины дунеон чиныгон равдыст-армукъамæ æмæ йын уым саргъ кодтой куыд чиныгкæсджытæ, афтæ фысджытæ дæр. Ацы чиныджы ма ногæй рауагътой 1991 æмæ 1992 азты. Дарддæр Фæрниаты Къоста йе ‘мбисонты базонгæ кодта йæ дыккаг фантастикон уацау «Забытое племя»-имæ. Аккаг аргъ ын куы скодтой, уæд ын рауагъдад «Ир»-ы 1982 азы рухс фед-та.
Фæрниаты Константин цы бирæ чингуытæ рауагъта, уыдон уыдысты æндæр æмæ æндæр темæтыл. Зæгъæм, йæ уацау «Паутина»-йы уый æвдисы, фæсхæсты период чекисттæ куыд тох кодтой бæстæйы знæгтимæ Цæгат Ирыстоны, уый. Константин кæд уырыссагау фыста, уæддæр йæ дадзинты цыдис ирон туг æмæ дзы рох никуы уыд Ирыстон æмæ ирон культурæ, тынг уарзта нарты кадджытæ. Фыссæгæн чысылæй фæстæмæ йæ бæллиц уыдис, цæмæй нарты кадджытæм байхъуыстаид æмæ бакастаид телеэкраныл. Уымæ гæсгæ 2001-æм азы мыхуыры рауагъта чиныг «И сотворил Бог нартов».
Фæстæдæр нарты кадджытыл цы кинофильм систой, уый сценарийы автор уыд Фæрниаты Константин.
Фæрнийы фыртæн æрдæгфыстæй баззадысты йæ фæстаг чингуытæ – роман «Конец империи лжи» æмæ уацаутæ: «Десница» æмæ «Костры на баш-нях». Кæронмæ фыст не ‘рцыдысты йе сценаритæ дæр.
Фæрниаты Константин Георгийы фырт йæ цардæй ахицæн 2007-æм азы. Литературæмæ цы бирæ хуынтæ æрбахаста, уыдон фаг сты, цæмæй йæ ном баззайа цæргæйæ.
ЦХУЫРБАТЫ Лариса
Comments are closed, but trackbacks and pingbacks are open.