Кæронмæ бахæццæ Хуссар Ирыстоны Президенты Кубок рамбулыны сæраппонд 3-аг турнир. Ерыстæ стыр цымыдисдзинад сывзæрын кодтой спортуарзджытæм. Республикæйы иууыл хуыздæр 16 командæйы тох кодтой сæйраг призыл.
3-аг бынатыл тох кодтой командæтæ Дыргуис æмæ Цхинвалы ветеранты командæтæ. Хъазт рауад фæстиуæгджын æмæ фæцис 6:4 хыгъдæй Дыргуисы микрорайоны футболистты пайдайæн æмæ бацахстой 3-аг бынат. Дарддæр хъазæн фæзмæ рахызтысты турниры финалисттæ – Нæузæххонты æмæ Хъайтарты уынгты командæтæ. Хъазты райдианы Нæузæххонты уынджы футболисттæн бантыст хыгъд байгом кæнын. Дарддæр дæр сын уыд цалдæр хорз гæнæны дыккаг пурти бакъуырынæн, фæлæ сæ не спайда кодтой. Хъайтарты уынджы хъазджытæ æппæт дæр арæзтой дзуаппон фæстиуæгджын атакæ саразыны тых-хæй, фæлæ сын нæ уад комбинацитæ аразын. Фембæлды дыккаг хайы сæ хъазтмæ бахастой ивындзинæдтæ æмæ сын бантыст хыгъд сæмхуызон кæнын. Уымæй 5 минуты фæс-тæдæр Нæузæххонты уынджы хъазджытæн фадат уыд ногæй размæ ацæуынæн. Сæ ныхмæлæууæг командæйы хъахъхъæнæг йæ иварон фæзуаты ахъазыд къухæй æмæ тæрхонгæнæг снысан кодта 11-метрон цæф. Фæлæ кулдуаргæс ахъазыд хорз. Хъазты кæронмæ хыгъд нæ фæивта æмæ та уæлахиздзау сбæрæг кæныны тыххæй бахъуыд пенальтиты сери сæххæст кæнын. Ам спортивон амонд бахудт Хъайтарты уынджы коман-дæмæ, 11-метрон цæфтæм гæсгæ рамбылдтой 3:2 хыгъдæй æмæ та ногæй систы Президенты кубокы хицæуттæ. Турниры хуыздæр командæты схорзæхджын кæныны церемонийы хайад райста Президент Бибылты Анатоли.
«Турнир ссис традицион æмæ йе ‘мвæзад азæй-азмæ кæны бæрзонддæр. Хъайтарты уынджды футболисттæн та бантыст рамбулын. Фæлæ сын иннæ аз ноджы зындæр уыдзæн рамбулын», – банысан кодта паддзахады сæргълæууæг.
Президент ма фехъусын кодта, зæгъгæ, турниры финал хъуамæ уагъд æрцыдаид раз-дæр, фæлæ, зæгъ, фæстæдæрмæ хаст æрцыд Цхинвал-Дменисы фæндаджы æрцæугæ трагедийы тыххæй. Æвзонг лæппуты рухс ном ссардтой, иу уысм æмырæй алæугæйæ.
Уый фæстæ Президент кубоктæ æмæ æхцайы премитæй схорзæхджын кодта турниры призерты. Уæлахиздзауæн та радта Президенты цæугæ кубок. Бæрæг ма æрцыдысты хуыздæр хъазджытæ. Хуыздæр кулдуаргæсы приз райста Хъайтарты уынджы минæвар Багаты Дзамболат, кæцы фæд-фæдыл æртыккаг хъазты пенальтитæм гæсгæ уæлахиз æрхаста йæ командæйæн.
Хуыздæр хъахъхъæнæг ссис Дыргуисы хъазæг Зæгъойты Алим, хуыздæр размæбырсæджы призæй хорзæхджын æрцыд Нæузæххонты уынджы футболист Къæбулты Константин, турниры иууыл хуыздæр хъазæгыл та нымад æрцыд Цхинвалы ветеранты командæйы æрдæгхъахъхъæнæг Тыджыты Константин. Сæрмагонд призæй хорзæхджын æрцыд турниры хуыздæр тæрхонгæнæг Къусраты Ромео. Президент ма схорзæхджын кодта иууыл хуыздæр спортуарзæг Хъуылымбегты Вадимы.
ТУРНИР ЛЕНК КÆНЫНÆЙ
Кропоткины уагъд цыд ленк кæнынæй турнир «Новогодние старты». Ерысты 7 майданы рамбылдтой хуссарирыстойнаг спортсментæ. Æртæ сыгъзæрин майданы рамбылдта Уалыты Даянæ æмæ иу та – Тыджыты Дианæ. Дыккаг ссис Уалыты Александр æмæ æртыккаг бынæттæ та бацахстой Хъазиты Ирэнæ æмæ Тохъмайты Александр.
ÆМБУАРХÆСТ
ММА-йæ архайæг ирон спортсмен Балаты Марат фæуæлахиз бразилиаг Диего Брандаойыл. Фембæлд цыд Санкт-Петербурджы АСА 103 турниры фæлгæтты. Мараты архайдæй та тох рауад ирд æмæ цымыдисон. Фыццаг раундæй уый цыд размæ. Æмæ кæд тæрхонгæнджытæ фыццаг раунд радтой йæ ныхмæлæууæгæн, уæд дыккаг æмæ æртыккаг раундты хуыздæр архайдта Балайы фырт æмæ йæ тæрхонгæнджытæ банымадтой уæлахиздзауыл.
ХУРИТЫ Батрадз
Comments are closed, but trackbacks and pingbacks are open.