Дзулфыцæн комбинаты директор Цхуырбаты Вадим куыд зæгъы, афтæмæй 15-æм июлæй фæфылдæр уыдзæн социалон дзулæн йæ аргъ. Нырмæ кæд йæ аргъ уыд 22 сомы, уæд нырæй фæстæмæ та хъуамæ схиза 25 соммæ.
«Социалон дзулы аргъ аивын ис Хицауады бæрны. Æмбæлон уынаффæ дæр рахæсдзысты уыдон. Фæлæ, мах дæр иу æмæ дыууæ хаттЫ нæ фехъусын кодтам, ацы фарст рагæй аскъуыддзаггæнинаг кæй у. 2019 азмæ дзулы аргъ уыд 16 сомы. Уый фæстæ цадæггай уæлæмæ хызт. Фæлæ йæ адæм сæхиуыл уадиссаг нæ банкъардтой. Ныр дæр бæргæ архайынц хицауады уæнгтæ, цæмæй субсидиты фæрцы ма банкъарой адæм дзулы аргъы фæфылдæр. Йæ аххосаг у, Уæрæсейы хомаджы аргъ кæй схызт. Раздæр мæнæуы килограмм 15 сомы æмæ 20 къапекмæ æлхæдтам, бынатмæ ласгæйæ нын лæууыд 18 сомы. Ныр ахæм æргътæ нал ис», – зæгъы дзулфыцæн комбинаты директор.
Комбинат дзулæй канд горæты цæрджыты нæ ифтонг кæны, фæлæ ма æгас республикæйы цæрджыты дæр. Дзауы районмæ æрвылбон дæр ласынц дзул. Къуайса æмæ Знауыры районмæ та – къуыри цыппар хатты. Цхинвалы районы хъæутæм – къуыри дыууæ хатты. Ласгæ та сæ кæнынц, дзулфыцæн комбинаты цы 12 сæрмагонд машинæйы ис, уыдон.
Цхуырбаты Вадим нын куыд загъта, афтæмæй дзулы аргъыл нæ республикæйы æндавы, бынæттон ссад кæй нæ уадзæм, уый. Ссад ласæм Уæрæсейы Федерацийæ. Уым та мæнæуы аргъ хизы уæлæмæ. Хицауад алы хатт дæр дотаци кодта дзулы аргъ. Йæ аргъыл ма æндавы канд мæнæу нæ, фæлæ æндæр хæрдзтæ дæр: цæхх, хурмæзилæджы зети, æртаг æмæ афтæ дарддæр.
Цалдæр азы размæ Инвестпрограммæйы фæлгæтты дзулфыцæн комбинатæн ног кондадон бæстыхай куы сырæзт, уæд фæфылдæр кодта йæ ассортимент, байгом кодта кондитерон цехтæ дæр, кæцы алыгъуызон адджинæгтæй ифтонг кæны республикæйы скъолаты буфетты. Дзулфыцæн комбинат уадзы арахъхъ дæр, цы дзултæ дзы баззайы æнæуæйæ. Директор куыд зæгъы, афтæмæй уымæн дæр фæфылдæр уыдзæн йæ аргъ.
Кæд горæты бирæ ис амалиуæггæнджытæ, кæцытæ сæ мини-пекарниты кæнынц кæрдзын кæныны куыст, уæддæр адæм æхсызгондæрæй æлхæнынц дзулфыцæн комбинаты конд дзул. Комбинаты технологтæ цы хатдзæгтæ саразынц, уымæ гæсгæ дзулы сконды нæ вæййы адæймаджы организмæн зианхæссæг буарадтæ – пестицидтæ, фосфаттæ æмæ æндæр ахæмтæ.
УАЗÆГТЫ Марфæ
