Цхинвалы дзулфыцæн комбинат цы продук-ци уадзы, уымæн йæ ассортимент кæны уæрæхæй уæрæхдæр. Уыимæ вæййынц гъæд-джын æмæ сæ фæлхасгæнджытæ æлхæнынц зæрдиагæй. Æрæджы та райдыдтой дзулы ног хуыз уадзын. Уыцы дзул конд цæуы бынæттон мæнæуæй, æркæнгæ ссадæй æмæ вæййы бæрæг адджындæр. Уымæй дарддæр ма бынæттон мæнæуæй дзулфыцæн комбинат кæны задынтæ æмæ къуымæл дæр. Мæнæу æлхæд æрцыд Знауыры районы Бехъмар æмæ Мугуты хъæуты хæдзарадты. Мæнæукуыстгæнæг арендатортæ-иу хъаст кодтой, сæ тыллæг сын кæй ничи æлхæны æмæ æнæфтиаг кæй фæвæййынц сæ фыдæбонæй.

Дзулфыцæн комбинат фæстаг дыууæ азы бадзырдтæ сарæзта бынæттон арендатортæй хæрзгъæд тыллæг чи æркæны, уыдонимæ æмæ сын балхæны сæ мæнæу. Мæнæу ссынц бынæттон куыройы. Цы ссад æркæнынц, уый сортыл нæ ныддихтæ кæнынц. Скæнынц дзы дзул сæхи рецептмæ гæсгæ – ставд лæхурд ссадмæ бафтауынц зады ссад дæр æмæ дзы рауайы диссаджы дзул. Дзул нырма конд цæуы  цъус бæрцæй. Фæлæ ныридæгæн ссис бирæ-тæн уарзон, агурынц æй зæрдиагæй. Уымæ гæсгæ дзулфыцæн комбинат хъавы йæ бæрц ын фæфылдæр кæныныл. Бахъæудзæн ноджы цалдæр бадзырд саразын Ленингоры районы мæнæуы куыст цы хæдзарадтæ кæнынц, уыдонимæ дæр.

Задын æмæ къуымæл дæр. Уыдон дæр уадзынц бынæттон, экологон æгъдауæй сыгъдæг продукцийæ. Дыууæ продукт дæр арæзт цæуынц зæронд рецептмæ гæсгæ, æнæ æфтауæнтæй. Нæдæр сæм сой æмæ нæдæр сæкæр æфтаугæйæ. Зæгъынц, зæгъгæ, бирæтæ бафæрсынц фаг адджындзинад дам, сæм цæмæннæ ис, фæлæ сæм сæкæр æфтыд куы цæуа, уæд продукттæ натуралон нал уыдзысты. Медицинæ куыд амоны, афтæмæй задынæн ис игæр алыгъуызон шлактæй сыгъдæггæнæн хиæдтæ. Уымæ гæсгæ йæ фылдæр фелхæнынц игæр æмæ уыргты æнæниздзинад мæгуырау кæмæн у, ахæм адæймæгтæ.

Куыд зонæм, афтæмæй рæстæгæй-рæстæгмæ Дæллаг Зæрæмæджы таможнæйы сæвзæры проблемæ уæзласæн машинæтæн, кæцытæ хæлцадон продукттæй ифтонг кæнынц республикæйы. Уый, куыд зонæм, афтæмæй, фыццаджыдæр, баст у Евразиаг таможнæйон цæдисы зæкъондæттынады фæткимæ, кæцы нæ амалиуæггæнджытæн у зын æххæстгæнæн.

Мах бацымыдис кодтам, дзулфыцæн комбинатæн дæр исты проблемæтæ вæййы æви, нæ таможнæйы сæртыл хизгæ ссад æмæ æндæр продукттæ ласгæйæ. Уый фæдыл нын загътой, комбинатæн таможнæйы сæртыл хизгæйæ, проблемæтæ кæй нæ вæййы. Фæлæ фæндаг цалдæргай бонты æхгæд куы вæййы, зæйæрцыды фæстиуæгæн, уæддæр кæй нæ фæтыхсынц. Комбинатæн алы хатт дæр вæййы фæсауæрцтæ – ссад, цæхх æмæ ма ноджы цы хъæуы  комбинаты куыстæн, уыдонæй. Фæсауæрцтæн стыр æфтауцдæттæ арæзт æрцыд Инвестпрограммæйы фæлгæтты.

Комбинат дзулæй канд горæты цæрджыты нæ ифтонг кæны, фæлæ ма Уæрæсейы æфсады 4-æм базæ æмæ арæнхъахъхъæнджыты заставæты дæр. Ласынц æй респуб-ликæйы районтæм. Дзауы райцентрмæ алы бон дæр ласынц дзул сæрмагонд машинæтыл. Къуайса æмæ Знауырмæ – къуыри цыппар хатты. Ленингормæ æмæ йæ хъæутæм – къуыри æртæ-цыппар хатты. Цхинвалы районы хъæутæм – æрвылбон дæр. Уымæй дарддæр адджын гуылтæй комбинат ифтонг кæны нæ республикæйы иумæйаг ахуыргæнæндæтты буфеттæ дæр. Кæд районтæй алкæцыйы дæр ис амалиуæггæнджытæн сæрмагонд минипекарнитæ, уæддæр адæм æхсызгондæрæй æлхæнынц нæ республикæйы дзулфыцæн комбинаты конд дзул.

УАЗÆГТЫ Марфа

 

Comments are closed, but trackbacks and pingbacks are open.