Хицауады Сæрдар Джуссойты Константин ауагъта 2024 азы РХИ-йы социалон-экономикон рæзтæн ахъазгæнæг инвестицион программæйы объектты арæзтадыл контроль кæныны фæдыл штабы рабадт.
Боны фæткы сæйраг фарсты размæ æмбырды хайадисджытæ æруынаффæ кодтой июны фыццаг декадæйы республикæйы тæрккъæвдатæ æмæ ихуарды фæстиуджытæ аиуварс кæнынимæ баст фарстатыл.
Банысангонд æрцыд, профилон службæтæ дарддæр дæр кæй архайынц районты пырх фæндæгтæ æмæ хидтæ цалцæг æмæ фидар кæныныл, афтæ ма цæрæнуатон-коммуналон хæдзарады коммуникациты арæзтадыл.
Дзауы районы Мзиугомы арæзтцæуæг сывæллæтты лагеры тыххæй радзырдта подрядон организаци «Бадо»-йы къухдариуæггæнæг Уалыты Владислав.
Уый банысан кодта, зæгъгæ, объекты куыстытæ сты фæуыны стадийыл. Коттеджты æвæрд æрцыд гъæдджын ламинат, фæцис сантехникон ифтонгады монтаж. Ныртæккæ дзы æвæрынц хъæдын дзаумæттæ. Афтæ ма дарддæр цæуынц лагеры алыварс территорийы хæрзарæзтдон куыстытæ, сæйраджыдæр, бацæуæн фæндæгтæ.
Аразджытæ ныфс æвæрынц, объект лæвæрд кæй æрцæудзæн банысангонд æмгъуыдæй раздæр, ома 2024 азы октябры мæймæ.
Æмбырды фæлгæтты æруынаффæ кодтой 2023-2025 азты Инвестпрограммæйы æндæр объектты арæзтадыл, сæйраджыдæр, Зонкъары донæмбырдгæнæны æхгæнæн шлюзон комплекс, 13 Коммунары уынджы хиды æмæ Сиукъайы фырты уынджы арæзтад. Ныхас ма цыд Цхинвалы къæвдадæтты канализациты æнæкъуылымпы куыст сифтонг кæныны фарстытыл.
Арæзтад, архитектурæ æмæ цæрæнуатон-коммуналон хæдзарады министры хæстæ рæстæгмæ æххæстгæнæг Цоциты Зауыр куыд банысан кодта, афтæмæй Инвестпрограммæйы объекттæн æхцайы фæрæзты æмæ арæзтадон æрмæджытæй ифтонг кæныны проблемæ нæй, куысты темптæ сты хорз æмвæзадыл.
Хицауады сæргълæууæг банысан кодта, зæгъгæ, ныры Инвестпрограммæйы фæдыл куыстытæ хъуамæ æххæст æрцæуой рæстæгыл.
«Сæрдыгон рæстæг æмæ хорз боныгъæдтæй хъæуы спайда кæнын куыст фæтагъддæр кæнынæн. Уыимæ иумæ республикæйы арæзтадон фæзуæттæ хъуамæ уой цæстдарæн органты хъусдарды бын», – загъта Джуссойты Константин.
Æмбырды ма хайад райстой автомобилон фæндæгты арæзтад æмæ эксплуатацийы фæдыл комитеты сæрдар Гæбæраты Алан, Паддзахадон унитарон куыстуат «Энергоресурс», «УКС» æмæ «Водоканал»-ы къухдариуæггæнджытæ Къæбысты Ацæмæз, Джыгкайты Вадим æмæ Сиукъаты Иван.
РХИ-йы Хицауады официалон сайт
