Республикон бирæпрофилон медицинон центры тугуадзæн станцы хистæр Хуыгаты Светланæ куыд зæгъы, афтæмæй нæ республикæйы цæрджытæ æмбаргæ ахаст дарынц донортæм. Тугуадзынæн ис йæхи уагæвæрдтæ. Зæгъæм, тобæгонд у хроникон низтæ кæмæн ис, уыдонæй донорон туг исын. Стæй ма туг дæттæн нæй арæх. Нæлгоймæгтæн æрмæстдæр афæдз цыппар хатт, сылгоймæгтæн та – фондз хатты онг. Куыд зонæм, афтæмæй туг фæдæттынц экстренон рæстæджы. Уымæ гæсгæ рынчынæн донор свæййы йе’ввахс адæймæгтæй сæ иу. Бирæ ис ахæм адæм, кæцытæ цæттæ вæййынц æцæгæлонæн баххуыс кæнынмæ дæр. Фæлæ уымæн æрмæст мотиваци фаг нæу. Донор туг куы радта, уæд «Туджы донорад æмæ йæ компонентты фæдыл» закъоны куыд фыст ис, уымæ гæсгæ хъуамæ райса фиддон, кæцыйы бæрц у фæллойадон минималон мызды фондз проценты бæрц. Лæвæрд сын хъуамæ цæуа æнæаргъ хæлц дæр, кæцытæ туджы структурæ баххæст кæной æмæ донор тагъд рæстæджы йе нæниздзинад банывыл кæна. Стæй ма активон донортæн лæвæрд æрцæуы паддзахадон хорзæх «Кады донор»-ы нысан. Æндæр бæстæты уыцы номы ‘руаджы гæнæн ис алыгъуызон льготæтæ райсын. «Мæн фæнды, цæмæй нæ донортæн дæр уа ахæм бартæ. Уый тыххæй нæ хайад рапорт арвыста Æнæниздзинад æмæ социалон райрæзты министрадмæ. Уым немæ сразы сты æмæ нын баныфсæрдтой ацы аз уыцы фарстатыл кæй бакусдзысты. Канд фиддонтæ нæ, фæлæ ма активон донортæн æнæаргъ хæлцадон продукттæ кæй дæтдзысты».
Хуыгаты Светланæ ма куыд зæгъы, афтæмæй фæстаг рæстæджы донортæ зивæггæнгæйæ кæй райдыдтой туг дæттын, ома тæссаг у коронавирус сыл куы бахæца туг дæттыны рæстæджы. Фæлæ уыцы тасæн бындур нæй, уымæн æмæ рынчындонмæ чи бахауы, уымæн экстренонæй арæзт æцæуы ПЦР. Йæ историйы та фыст вæййы цы инфекцион æмæ вирусон низтæй рынчын уыд, уый фæдыл зонæнтæ.
УАЗÆГТЫ Марфа
Comments are closed, but trackbacks and pingbacks are open.