Ныры дуджы телефоны руаджы бирæ хъуыддæгтæ саразæн ис, фæлæ дзы фыдгæнджытæ дæр афтæ пайда кæнынц. Рæстæгæй-рæстæгмæ фехъусæн вæййы, ома та барадхъахъхъæнæг органтæ æрцахстой фыдгæнæджы, кæцы, телефонæй пайда кæнгæйæ, бакодта фæлитой митæ. Ахæм цаутæ кæддæрты æрцæуы нæ республикæйы дæр æмæ дзы æрæджы дæр конд æрцыдис уголовон хъуыддаг.

 

Мидхъуыддæгты министрады фæдагурæн управленийы уголовон хъуыддаг бакодтой 40-аздзыд æмбæстагыл. Органты кусджытæ куыд сбæлвырд кодтой, афтæмæй ацы æмбæстаг телефонæй фæдзырдта нæ горæты 64-аздзыд цæрæгмæ, йæхи йын схуыдта йæ зонгæ адæймаг æмæ йæм бахатыд, цыма йæ машинæ фехæлдис æмæ йын 20 мин сомы хæс авæра. Афтæ хорз ын радзырдта йæ тыхстдзинад, æмæ йыл баууæндыд. Уый фæстæ йæм барвыста такси æмæ йын 20 мины рарвыста. Фыдгæнæг йæ телефон ахицæн кодта, фæлæ йæ барадхъахъхъæнæг органтæ уæддæр сбæрæг кодтой æмæ йæ бæрндзинадмæ æркодтой.

Ацы аз нæ республикæйы ахæм фыдракæнд æрцыд фыццаг хатт, фæлæ уæддæр хъуамæ нæхи хизæм цæстфæлдахджытæй. Цæмæй ахæм фæлитой адæймаджы амæттаг ма бауай, уый тыххæй алкæй ныхæстыл æууæндын нæ хъæуы, уæлдайдæр та дæ æхца куы курой, уæд. Фыццаджы уал сбæлвырд кæнын хъæуы, æцæгæйдæр дæм дæ хæстæг кæнæ дæ зонгæ дзуры, уый, æмæ уый фæстæ ахъуыды кæн дæ дарддæры къахдзæфтыл.

ДЖИОТЫ Алыксандр

 

Comments are closed, but trackbacks and pingbacks are open.