2024-25 ахуыры азы милицийы хаххыл Уæрæсейы Федерацийы уæлдæр ахуыргæнæндæттæм ацæуын кæй фæнды, уыцы 29 æрыгон лæппуйы республикон стадионы радтой фыццаг фæлварæн физикон цæттæдзинадæй. Ацы аз Уæрæсейы уæлдæр ахуыргæнæндæттæ хуссарирыстойнаг курсанттæн радтой 20 лимиты.
Иннæ азтау та фæлварæнтæ истой Тыбылты Алыксандры номыл ХИПУ-йы физикон хъомылады кафедрæйы ахуыргæнджытæ. Бынаты ма кандидатты æв-зыгъддзинадмæ сæ хъус дардтой исæн къамисы уæнгтæ.
Физикон цæттæдзинад сбæлвырд кæны-ны норматив конд у дыууæ хайæ – 3 километры дæрддзæг рæстæгмæ алидзын æмæ турникыл 15 хатты хи сисынæй. Фароны курсанттæм абаргæйæ ацы азы кандидаттæ равдыстой бирæ хуыздæр цæттæдзинад æмæ сæ фылдæр иттæг хорз сарæхстысты нормативтæ раттынмæ, 26 июны та фӕлва-рӕн радтой уырыссаг ӕвзагӕй – ныффыссын сын кодтой диктант. Ныр ма сын баззад дыууӕ фæлварæны – историйæ æмæ æхсæнадзонынадæй.
Ацы аз Уæрæсейы Федерацийы Мид-хъуыддæгты министрад лимиттæ радта цыппар уæлдæр ахуыргæнæндонмæ фæй-нæ фондз бынаты – Санкт-Петербургы универ-ситет, Краснодары университет, Ростовы юридикон институт æмæ В.В.Лукьяновы номыл Орловы юридикон институт-мæ. Кандидаттæй фæлварæнты рӕстӕджы æнтыстджындӕр чи разына æмæ курсанты ном чи райса, уыдонимæ РХИ-йы Мидхъуыддæгты министрад развæлгъау бафысдзæн контракт, цæмæй ахуыр фæуы-ны фæстæ сæ райгуырæн бæстæмæ æрæз-дæхой æмæ сæ службæ адарддæр кæной бынаты.
Мидхъуыддæгты министрады хаххыл Уæрæсейы уæлдæр ахуыргæнæндæттæм ахуырмæ æрвитын райдыдтой 2009 азæй фæстæмæ. Уыцы аз дыууæ министрады сарæзтой бадзырд æмæ уый фæлгæтты Уæрæсе йæхимæ хæс райста нæ республикæйæн кадртæ бацæттæ кæныны фæ-дыл. Ацы хъуыддаг хорзæрдæм бандæвта нæ æрыгон республикæйыл æмæ комкоммæ зæгъгæйæ та – Мидхъуыддæгты министрадыл. Ныридæгæн зæгъæн ис, ми-лицийы кусджытæн сæ зынгæ хай кæй сты Уæрæсейы уæлдæр ахуыргæнæндæтты рауагъдонтæ.
ДЖИОТЫ Алыксандр
