ДÆ ЦÆСТ АХÆСС ДУНЕЙЫЛ

Банымадта йæ æдылыдзинадыл

Чехийы президент Милош Земан, загъта, зæгъгæ, Сирийыл ракетæтæ кæй рауагътой, уый у æдылыдзинад æмæ æбæрнон къахдзæф АИШ æмæ йе ‘мцæдисонты ‘рдыгæй, кæцы халы дунеон барадон принциптæ. Уый, зæгъ, гæнæн ис æмæ ноджы фæвазыгджындæр кæна Арабаг Республикæйы уавæр.

Кæрон æрцыд сæ архайдæн

УФ-йы Æдасдзинады федералон службæ кæрон скодта ИГИЛ-ы иу къорды архайдæн, кæцы план кодта Ростовы областы теракттæ саразын. Къорды раздзоджы куы баурæдтой, уæд йæхи спырх кодта. Иннæ дыууæ террористы ахст æрцыдысты. Уыдонмæ уыд хæцæнгæрзтæ, къухы гранатæтæ æмæ хиаразгæ бомбæ. Уымæй дарддæр ма сæм разынд бастдзинады фæрæзтæ, терроризм чи пропагандæ кæны, ахæм æрмæджытæ æмæ рæмудзæн æрмæджытæ аразыны фæдыл инструкцитæ. Æдасдзинады федералон службæйы куыд фехъусын кодтой, уымæ гæсгæ террористон къордыл кухдариуæгад кодтой Сирийы территорийæ.

Бахъыгдардтой сæ уæрæсейаг денджызонтæ

Уæрæсейаг донбындзугæнæг наутæ фадат нæ радтой бритайнаг субмаринæйæн Сирийы ныхмæ операцийы хайад райсынæн, – уый тыххæй фехъусын кодта газет The Times. Газеты информацимæ гæсгæ, бритайнаг донбындзугæнæг нау Astute-йы, кæцы гæрзифтонг уыд базырджын ракетæтæй, бахъуыд маневртæ аразын уæрæсейаг субмаринæты ныхмæ, кæцыты ныгуылæны хонынц «Черные дыры» сæ цыды сабырдзинады тыххæй. Уыдон уыдысты сирийаг Тартусæй рацæугæ донбындзугæнæг наутæ «Кипо». Бритайнаг денджызонты ма бахъуыд уæрæсейаг дыууæ фрегаты æмæ науты ныхмæ лæууæг хæдтæхæгæй аленк кæныны сæр дæр. Уымæ гæсгæ субмаринæйы къухты нæ бафтыд æввахс æрбацæуын, цæмæй ныццавтаиккой Сирийы территорийы. «Уадз нæ оппонеттæ фидæны сæ зæрдыл бадарæт, мах потенциалон ныхмæлæууæгмæ нæ хъус кæй дардтам, дарæм æмæ дарддæр дæр кæй дардзыстæм, уый», – загъта адмирал Владимир Валуев.

Уынаффæ кодтой Уæрæсеимæ ахастытыл

Люксембургы Евроцæдисы бæстæты Фæсарæйнаг хъуыддæгты министрадты сæргълæуджытæ æруынаффæ кодтой Уæрæсейы Федерациимæ ахастытыл, уыцы нымæцы Сирийы фæдыл дæр. Фæлæ контексты ног санкцитæ нæ уыд. «Министртæ нæ уынаффæ кодтой санкциты темæйыл. Дзырд цыд иумиагæй Уæрæсеимæ ахастытыл. Минстртæ банысан кодтой Уæрæсеимæ ахастытæ аразыны фондз принципы. Уыдонæй сæ иу у «Минскы сразыдзинæдты» æххæст реализаци, æнæ уымæй Уæрæсеимæ гъæдджын ахастыты рæзт гæнæн нæй, – загъта Могерини. Уый ма банысан кодта, зæгъгæ, Сирийы сæвзæргæ уавæр хъæуы политикон æгъдауæй æрбæстон кæнын æмæ бæстæтæ-гаранттæ та хъуамæ сифтонг кæной деэскалацийы зонæйы хæстон архайдтыты æрурæд. Министрты иу къорд та æрсидт Мæскуы æмæ Тегеранимæ диалогмæ.

***

Владимир Путин телефоны ныхас кодта Германы канцлер Ангела Меркелимæ. Уыдон æруынаффæ кодтой Сирийы алыварс уавæр кæй фендыгъддæр, ууыл. Путин банысан кодта, зæгъгæ, АИШ æмæ йе ‘мцæдисонтæ Сирийыл ракетæтæ кæй рауагътой, уый у агрессийы акт æмæ дунеон барадон нормæты фехæлд, уыцы нымæцы ИНО-йы Устав дæр. Дыууæ лидеры ма уынаффæ кодтой «Северный поток 2»-йыл дæр.

ИНО-йы рабадт

Уагъд æрцыд ИНО-йы радон рабадт, цыран дзырд цыд куыд иумиагæй Сирийы уавæрыл, афтæ сирийаг горæт Раккайы уавæрыл дæр. Гуманитарон фарстыты фæдыл ИНО-йы Генералон секретары хæдивæг Марк Лоукок куыд фехъусын кодта, уымæ гæсгæ Раккайы коалицийы операцийы фæстæ, кæцыйы сæргъ лæууыд АИШ, пырх æрцыдысты æмæ разианчындæуыд хæдзæртты 70-80%. ИНО-йы УФ-йы æдзухон минæвар Василий Небензя банысан кодта, зæгъгæ, абоны онг дæр хæдзæртты пырхæнты бын сты цæрджыты мард буартæ. Америкæйæгтæ, зæгъ, æппындæр ницы сарæзтой цæрджыты хæрзиуæгæн.

Фæзындзæн йæ филиал

Зындгонд Курчатовы институт фæнд кæны йæ филиал Севастополы бакæнын. Национ иртасæн центр æндидзын кæны Сауденджызон КОРРОзийон станц. Институты президент æмæ горæты губернатор сæ къухтæ æрфыстой æмгуыстады тыххæй сразыдзинадыл. Ам уагъд цæудзысты иртасæн куыстытæ наутæцалцæггæнæн æмæ наутæарæзтады куыстуæттæн æххуысы тыххæй, фæлæ хъусдард æрмæст флотмæ здæхт нæ цæуы. Курчатовы институт ма план кæны Севастополы климатон станц саразын дæр.

Ссардтой боевикты химион лаборатори

Радиацион, химион æмæ биологон хъахъхъæныны уæрæсейаг æфсæдтæ сирийаг горæт Думайы ссардтой боевикты химикатты æфтауцдон æмæ лаборатори, кæцыйы бацæттæ кодтой хъæстæгæнæн буарадтæ уадзыны тыххæй. Специалисттæ ссардтой химион буарадтæ тиодигликоль, диэтаноламин, кæцытæ æнæмæнгхъæуæг сты сондоны æмæ азоты иприт райсынæн. Уымæй дарддæр ма æфтауцдоны уыд хлоримæ баллон, кæцыйæ гæнæн ис æмæ спайда кодтой 7-æм апрелы Думайы химион атакæйы рæстæджы.

Ратахт астероид

Зæххмæ æввахс атахт, 1908 азы Зæххыл чи сæмбæлд, Тунгуссаг уыцы метеориты бæрцы хуызæн астероид. Астроновттæн сæ бон ссис  Зæхмæ тæссаг æввахсæй чи тахт, уыцы егъау астероиды банысан кæнын.  Схуыдтой  йæ номыр 2018 GE3. Егъау бæрцмæ нæ кæсгæйæ, астероиды  астрономтæ сбæрæг кодтой æрмæстдæр ма йæ Зæххимæ максима-лонæй æрбаввахсмæ  21 сахаты куыд хъуыд, афтæ.

Фидыдадмæ нæ кæсгæйæ

Украинæйы гарзджын тыхтæ, Куадзæны фидыдад фехалгæйæ, фехстой Луганскы район, цыран равæрд сты ацы бæстæйы хæстон техникæ. Техникæ цæттæ кодтой Уæлахизы боны парады хайад райсынмæ. Украинæйы гарзджын тыхты 80-æм хицæн десантон штурмгæнæн бригадæ Луганскы æхстой артиллерион хæцæнгæрзтæй. Æхстыты фæстиуæгæн не ‘рцыд уды зиæнттæ. Хъыгдард баййæфта Стыр Фыдыбæстæйон хæсты рæстæджыты танк Т-34.

Спырх уæлдæфы

АИШ-ы бæлцæттæласæн хæдтæхæджы змæлынгæнæг спырх уæлдæфы. Хæдтæхæг тахт Нью-Йоркæй Далласмæ.  Бортыл уыд 143 бæлццоны æмæ экипажы фондз уæнджы. Хъыгдард баййæфтой 10 адæймаджы, уыдон фæцæфтæ сты змæлынгæнæджы схъистæй.

Змисы тымыгъ

Интернетæй пайдагæнджытæ уынаффæ кæнынц ирайнаг горæты змисы тымыгъы тæссаг кадртыл. Ираны рагон горæты æрæмбæрзта змисы тыхджын тымыгъ. Видеойы рыджы къул ахсы горæты уынгтæ. Рагон бæстыхæйттæ фесты змисы бæзджын мигъты бын. Æрдзон æнамонддзинад проблемæтæ æрхаста бынæттон цæрджытæн. Змисы тоннæтæ æркалдысты горæтыл иу сахаты мидæг 100 километры тагъдадæй.

 

Информацион агентадты хъусынгæнинæгтæм гæсгæ