ДÆ ЦÆСТ АХÆСС ДУНЕЙЫЛ

БАНЫХÆСТÆ СОЧИЙЫ

Сочийы уагъд æрцыд Сирийы фæдыл «Астанайаг формат»-ы дæсæм рабадт. Уым хайад райста Сирийы фæдыл ИНО-йы сæрмагонд минæвар Стаффан де Мистура. Бæстæтæ-гаранттæй дарддæр ма баныхæсты хайад райстой арабаг республикæйы, гарзджын оппозици, ИНО æмæ Иорданийы минæвæрттæ. Сирийаг конфликты фæдыл фæрстæ равдыстой сæ цæттæдзинад амынæтты æмæ фæмардуæвджыты мард буæрттæ баивыны фæдыл пилотон проекты тыххæй. Æмæ бæстæтæ-гаранттæ та бадзырдтой сентябры мæйы ИНО-йы Генералон секретары сæрмагонд æрвыст лæг Де Мистураимæ консультацитæ ауадзын Сирийы конституцион къамис саразыны фæдыл.  Баныхæсты активон хайад райста сирийаг оппозици, кæцыйы минæвæрттæ фембæлдысты уæрæсейаг делегациимæ, уый размæ та – туркаг æмæ ИНО-йы минæвæрттимæ. Боны фæткы сæйраг фарстытæ уыдысты Сирийы конституцион реформæ, архайæг хицауад æмæ оппозицийы ‘хсæн диалог æмæ, кæй зæгъын æй хъæуы, лигъдæтты раздахыны фарст. Абоны онг лигъдæттæ систы 7 милуан сирийаджы. Уыдонæн сæ фылдæр хай сты арабаг республикæимæ сыхаг бæстæты.

ИНО-йы сæрмагонд минæвар Стаффан де Мистура фехъусын кодта, зæгъгæ, Сочимæ йæ балц уыд фæстиуæгджын.  Бæстæтæ-гарантты минæвæрттимæ сæ хъуыдытæ загътой кæрæдзийæн Сирийы конституцион къамисы сконд æмæ функциты тыххæй.

ЦÆТТÆ У ИРАНЫ ПРЕЗИДЕНТИМÆ ФЕМБÆЛЫНМÆ

АИШ-ы президент Дональд Трамп фехъусын кодта, зæгъгæ, цæттæ у Ираны президент Хасан Роуханиимæ баныхæстæ ауадзынмæ. АИШ-ы президент бартхъирæн кодта ирайнæгтæм, зæгъгæ, уыдон Америкæмæ куы æртхъирæн кæной, уæд райсдзысты ахæм мадзæлттæ, кæцытимæ никуыма ничи сæмбæлд. Америкæйаг лидеры ахæм ныстуантæ бирæтæ банымадтой ядерон цæф ныккæныны тыххæй дзырдæппарæныл. Уый размæ Роухани фæсаууонмæ бафæдзæхста америкæйæгты, цæмæй уыдон ма сфæнд кæной «домбайы къудийыл фæхæцын», Тегераныл æндавгæйæ.

РАМБЫЛДТА ХЪАСТ

Уæрæсе Украинæйæ рамбылдта вагæтты фæдыл хъаст Дунеон базарадон организацийы. Организацийы арбитражон тæрхондон нæ райста Уæрæсемæ Украинæйы претензиты, кæцыты балæвæрдта 2015 азы октябры мæйы. Киев фæлвæрдта сбæлвырд кæнынмæ, зæгъгæ, Мæскуы барæй не ‘лхæны æфсæнвæндаджы бастдзинадæн украинæйаг куыстуæтты рауадзгæ продукци. Уый размæ Дунеон базарадон организацийы арбитраж сæххæст кодта нитрат аммонийы фæдыл фиддонты тыххæй Украинæмæ ахасты Уæрæсейы претензитæ.

ЙÆ КЪУХ ÆРФЫСТА БАРАМЫНДЫЛ

Уæрæсейы Президент Владимир Путин йæ къух æрфыста Хъахъхъæнынады министрады Сæйраг æфсæддон-политикон управлени саразыны тыххæй барамындыл. Барамындмæ гæсгæ, ног ведомствойы сæргълæууæгæй нысан æрцыд Ныгуылæн æфсæддон зылды раздæры командæгæнæг, инæлар-булкъон Андрей Картаполов. Банысанчындæуыд, зæгъгæ, ног ведомствойы сæйрагдæр нысæнттæй иу у æфсæддон службæгæнджыты ‘хсæн патриотон хъомылад фæбæрзонддæр кæнын.

РАЙДЫДТА КЪУЛЫ АРÆЗТАД

АИШ-ы президент Дональд Трамп куыд фехъусын кодта, уымæ гæсгæ Мексикæимæ арæныл райдыдта къулы арæзтад. Иугонд Штатты хицауад тырны максималонæй бæстæйы арæнтæ сæдас кæнынмæ.  Ацы здæхты къахдзæфтæй иу у Мексикæимæ къулы арæзтад. Трампы ныхæстæм гæсгæ, ныридæгæн йæ арæзтады тыххæй бахардз кодтой 1,6 миллиард доллары, фæлæ ма бахъæудзæн уæлæмхас фæрæзтæ.

АМАРДТОЙ УÆРÆСЕЙАГ ЖУРНАЛИСТТЫ

Централонафрикæйаг республикæйы æбæрæг боевиктæ амардтой æртæ уæрæсейаджы – журналист Орхан Джемаль,  режиссер Александр Расторгуев æмæ оператор Кирилл Радченкойы. Дзыллон информацийы фæрæзты бæрæггæнæнтæм гæсгæ, фæмардуæвджыты мард буæртты ссардæуыд Кемойы префектурæйы горæт Сибюйæ 23 километры æддæдæр. «Эхо Москвы»-йы сæйраг редактор Венедиктовы ныхæстæм гæсгæ, Орхан Джемаль документалон фильм хъуамæ систаид режиссер-документалист Александр Расторгуевимæ.

«АККАГ ПАРТНЕР»

Гуырдзыстоны райдыдтой НАТО-йы масштабон ахуыртæ «Аккаг партнер», зæгъгæ. Бирæнацион ахуыртæ уагъд цæудзысты 1 августæй 15 августмæ æмæ сæ хайад райсдзысты АИШ, Герман, Стырбритани, Эстони, Франц, Литва, Польшæ, Норвеги, Турк, Украинæ, Азербайджан æмæ Сомихстоны дæлхæйттæ. Ахуырты нысан у хъахъхъæнынады фæлтæрддзинадыл бакусын, иумиаг æфсæддон цæттæдзинад фæбæрзонддæр кæнын. Ахуырты хайад исдзысты æфсæддон техникæйы 450 иуæджы, кæцыты иу хай ныридæгæн æрластой Гуырдзыстоны столицæмæ æввахс «Вазиани»-йы базæмæ.

ЙÆ ПОЗИЦИ ЙЫН БАНЫМАДТА РАСТЫЛ

Италийы премьер-министр Джузеппе Конте Урс хæдзары Трампимæ иумиаг пресс-конференцийы рæстæджы фехъусын кодта, зæгъгæ, НАТО-йы бæстæтæ-хайадисджыты хъахъхъæнынадон хæрдзтæ дих кæныны æмæ G8 формат сæндидзын кæныны фæдыл Уæрæсейы фæстæмæ æрбаздахгæйæ,  АИШ-ы президент Дональд Трампы позици у раст.  Уый банысан кодта, зæгъгæ, хæцдзæн ацы боны фæткы æвварс æмæ ацы позицийы тыххæй фехъусын кæндзæн æндæртæн дæр. Итали ма нымайы, зæгъгæ, АИШ æмæ Уæрæсейы ‘хсæн диалог у бындурон, цæмæй стабилондзинад æмæ æдасдзинады цæстæнгасæй глобалон перспективæйы æвæрццаг фæстиуджытæ къухты æфтой, уый тыххæй. Уыимæ премьер-министр зæрдыл æрлæууын кодта, зæгъгæ, Уæрæсейы ныхмæ санкцитæм нæ кæсгæйæ,  Италийæн ис Уæрæсеимæ интенсивон экономикон ахастыты фарсхæцынады традици. Конте банысан кодта, зæгъгæ, Мæскуыйы ныхмæ Ныгуылæн цы санкцитæ бакодта, уыдон Римы хъуыдымæ гæсгæ æнустæм нæ уыдзысты.

ФЕМБÆЛД «2+2»-ЙЫ ФОРМАТЫ

Мæскуыйы уыд «2+2»-йы форматы уæрæсейаг æмæ япойнаг фæрсты радон фембæлд, цыран хайад райстой УФ æмæ Японы фæсарæйнаг хъуыддæгты министртæ Сергей Лавров æмæ Таро Коно æмæ хъахъхъæнынады министртæ Сергей Шойгу æмæ Ицунори Онодэра. Фемлæды размæ Таро Коно банысан кодта, зæгъгæ, Япон æмæ Уæрæсейы диалог æдасдзинады фадыджы æмæ æмахастытæ фæарфдæр кæнынмæ тырнындзинад ахсджиаг сты Азиаг-Сабырденджызон регионы иумиагæй. Мæскуы æмæ Токиойы ахастытæ рæзынц фæстаг рæстæджы. Уæрæсе ныридæгæн Японмæ ласын райдыдта гречихæ, терминонæй бакуыстгонд фыдызгъæл, фæлæ ис хъæууонхæдзарады æмгуыстады проекттæ уæрæсейаг территорийыл дæр. Япойнаг бизнес хайад исы уæрæсейаг территорийыл хъæрмуатон хæдзарадтæ саразыны. Стыр перспективæтæ гом кæнынц нымæцон экономикæйы къабазы дыууæ бæстæйы хъæздыг зонадон-технологон потенциал хынцгæйæ, кæцыйы тыххæй майы мæйы уæлдæр æмвæзады баныхæсты хатдзæгтæм гæсгæ къухтæ æрфыстæуыд уæрæсейаг-япойнаг къорд документтыл.

СПЫРХ МИНÆЙЫЛ

Афганистаны ныгуылæн хайы минæйыл спырх бæлцæттæласæн автобус, кæцыйы фæстиуæгæн фæмард сты аст адæймаджы,  хъыгдард та баййæфтой 40 адæймаджы. Инцидент æрцыд Фарахы провнцийы.

СЧЪИЗИ КОДТОЙ РАЗВÆДСГАРÆДЖЫ ИНГÆН

Ногæй та Львовы вандалтæ счъизи кодтой Стыр Фыдыбæстæйон хæсты ветеран, легендарон развæдсгарæг Николай Кузнецовы ингæн. Уый размæ 2017 азы августы вандалтæ Советон Цæдисы Хъайтары ингæны плитæйæ схафтой дамгъæтæ æмæ нымæцтæ, кæцытæ æвдыстой Кузнецовы райгуырды æмæ амæлæты бонтæ. Ныр та Кузнецовы ном сахуырстой бур ахорæнæй. Уымæй дарддæр ма неонацисттæ Кады обауы дурыл ныффыстой «Кузнецов – враг УПА», – зæгъгæ. Развæдсгарæг амард 1944 азы 9 марты украинæйы зæххыл бандеровонты къухæй, кæцыты ныхмæ хæцыд уый.

ÆРХАУДТА БÆЛЦÆТТÆЛАСÆН ХÆДТÆХÆГ

Мексикæйы Дурангойы штаты æрхауд бæлццæттæласæн хæдтæхæг, кæцыйы бортыл уыд 101 адæймажы. Хæдтæхæг фæлвæрдта аварион æрбадт саразыныл, фæлæ йæ къухты нæ бафтыд. Дурангойы штаты губернатор Росас Аиспуройы ныхæстæм гæсгæ, бæлцæттæй ничи фæмард, хъыгдард баййæфтой 90 адæймаджы .

Информацион агентадты хъусынгæнинæгтæм гæсгæ