Нæ республикæйы Хъахъхъæнынады министрады дæлбар кадетон скъолайы сырæзтыл сæххæст 13 азы. Уый фæдыл ам ауагъд æрцыдис мадзал. 13 азы кæд юбилейон нæу, стæй бирæ азтæ не сты, уæддæр уыцы цыбыр рæстæджы, ахуыргæнджыты коллективæн дæр бирæ бантыст скъолайы размæ цыды хъуыддаджы. Йæ рауагъдонтæй бирæтæ ахуыр кæнынц Уæрæсейы Уæлдæр æфсæддон ахуыргæнæндæтты. Скъолайы ахуыргæнджытæ æппæтдæр аразынц, цæмæй схъомыл кæной райгуырæн бæстæйæн æцæг патриотты.
2022 азы 20 июны скъолайæн лæвæрд æрцыд Ирыстоны хъайтар Багаты Амираны ном, кæцы 2008-æм азы хæстон архайдтыты рæстæджы фæмард знаджы нæмыгæй.
Аивгъуыйгæ азы «Коммуникациты рæзты æхсæнадæмон институт Мир-Мост – Осетия»-йы фонд æмæ Республикæ Хуссар Ирыстоны Хъахъхъæнынады министрад сæ къухтæ æрфыстой Сывæллæттæ æмæ фæсивæды патриотон хъомылад организаци кæныны фæдыл сразыдзинадыл. Æмгуыстады фæлгæтты æххуыс цæуы Кадетты скъолайæн. Скъолайы компьютерон кълас ифтонг æрцыд хъæуæг техникæйæ. Хъусдарды бын сты нæ республикæйы къухдариуæгадæн дæр.
Кадеттæн æмæ сæ ахуыргæнджытæн арфæйы ныхæстæ загътой скъолайы рауагъдонтæ, Хъахъхъæнынады министрады минæвæрттæ, ахуыргæнинæгты ныййарджытæ æмæ цытджын уазджытæ. Йæ директор Балыкъоты Фатимæ банысан кодта, скъола баконд кæй æрцыд, республикæ иууыл уæззаудæр уавæры куы уыд. Æппæт зындзинæдтæм нæ кæскæйæ, абон скъола йæ разылæууæг хæстæ иттæг хорз æххæст кæны.
«Сæрбæрзондæй зæгъдзынæн, скъолайы сырæзтæй фæстæмæ ам цы ахуыргæнджытæ кусынц, уыдон цæсгомджынæй кæй æххæст кæнынц сæ разы æрæвæргæ хæстæ. Не скъола хъомыл кæны алы ахуыргæнинаджы дæр патриотизмы æнкъарæнтыл, уый махæн у нæ сæйраг хæс, цæмæй съомыл кæнæм нæ Райгуырæн бæстæйæн æцæг патриотты æмæ æхсарджын адæймæгты», – загъта Балыкъоты Фатимæ.
Мадзалы рæстæджы иу уысм æмырæй алæугæйæ ссардтой Кадетон скъолайы ахуыргæнджытæй, рауагъдонтæй Фыдыбæстæйы тыххæй сæ сæртæ нывондæн чи æрхаста, уыдоны рухс нæмттæ.
Арфæйы ныхæстæ ма загъта «Коммуникациты рæзты æхсæнадæмон институт Мир-Мост-Осетия»-йы фонды директор Тадтаты Таймураз.
«13 азы тынг цъус рæстæг у, фæлæ ацы æмгъуыдмæ бирæ цыдæртæ арæзт æрцыд скъолайы размæцыдæн. Арфæ кæнын, ахуыры хорз æнтыстытæ чи равдисы æмæ республикæйы æмвæзадыл алыгъуызон мадзæлтты активон хайад чи райсы, уыцы ахуыргæнинæгтæн. Иууыл ахсджиагдæр уæ ахуырдзинады нымад цæуы патриотизм. Уыцы æнкъарæнимæ уæ, уæ фыццаг бонæй фæстæмæ, зонгæ кæнынц уæ ахуыргæнджытæ. Уыдонæн егъау æнтыстытæ ис ацы фадыджы æмæ уый та уæлдай æхцондзинадхæссæг æнкъарæн у», – загъта Тадтаты Таймураз. Уый куыд банысан кодта, афтæмæй фонд дарддæр дæр æххуыс кæндзæн гуманитарон æмæ социалон программæтæ аразыны рæстæджы, афтæ ма Кадетон скъолайы ахуыргæнинæгтæн лæвæрд цæудзæн премитæ.
Бузныджы ныхæстæ загътой скъолайы ахуыргæнджытæн скъолайы рауагъдонтæ æмæ сæ ныййарджытæ дæр.
Уый фæстæ Кадетон скъолайы ахуыргæнинæгтæ равдыстой концерт.
ТАНДЕЛАТЫ Виленæ
