Цæмæннæ ис интернет-бастдзинад?

5-æм февралæй 6-æм февралмæ æхсæвы тыхджын митуард бахъыгдардта электроэнерги æмæ интернет бастдзинады телтæ Ленингоры районы хъæуты. Дзауы, Къуайсайы æмæ Знауыры районы дæрддзæф хъæуты нырма дæр нæй электроны рухсытæ, митæй сæм бацæуæнтæ кæй нæй, уый аххосæй. Цух сты интернет бастдзинадæй дæр. «Мегафон Южная Осетия»-йы æхсæнадимæ бастдзинады специалист Бежанты Заринæ нын нæ фарстæн дзуапп радта: «Канд хъæуты нæ, фæлæ ма Цхинвалы иуæй-иу рæтты дæр интернет-бастдзинæдты къуылымпыдзинад сæвзæрд хуылыдз митуарды аххосæй. Нæ техникæйæн йæ бон бацæуын нæу бастдзинады мæсгуытæм, фæндаг сыгъдæг кæй нæу, уый аххосæй. Нæ бон куыд у, афтæ архайæм. 8-æм февралы нæ къухы бафтыд, Знауыры районы Мугуты хъæуы нын цы мæсыг лæууы, уым бастдзинад сцалцæг кæнын. Иу бригадæ та арвыстам Ручъы хызæгтæм. Ленингоры районмæ фæндаг нæ уыд, ныр æй асыгъдæг кодтой æмæ 9-æм февралы уырдæм ацыд специалистты бригадæ. Къуыдаргомы ‘рдæм уавæр зындæр у, хæхтыл митуард нæма банцад. Бирæ хъæстытæ нæм цæуы дæрддзæф хъæутæй. Не специалисттæ архайдтой Къуайсайæн йæхи мидæг æмæ сын бантыст бастдзинады телтæ сцалцæг кæнын. Ныр нæ тыхтæ радтам ацы бонты бастдзинад æххæстæй скусын кæнынмæ, Къуайсайы мæсыгмæ техникон службæтæ хафынц фæндаг.

«Юг – Телеком»-ы интернет-бастдзинады куыстытæ дæр æххæст цæуынц стыр къуылымпытимæ. Уый тыххæй та нын радзырдта ацы компанийы коммерцион директор Джиоты Эрнæ. «Нæ абонентты 80 проценты абон иугонд сты интернет-хызæгмæ. Фæлæ нæм хъæстмæ цы адæм цæуы, уыдонæн æмбарын кæнæм, цалцæггæнæн куыстытæ кæй цæуынц. Митуард бирæ бæлæстæ афæлдæхта горæты уынгты æмæ нæ хызæгтæ дæр ныскъуыдтæ сты. Цалынмæ хæрзарæзтады комбинат уыцы куыстытæ бакодта, уæдмæ махæн бавналæн нæ уыд нæхи куыстытæ бакæнынмæ. Микрорайонтæ «Цæгаттаг» æмæ «Хурзæрин»-ы алцыдæр æрбæстон кодтам. Ныртæккæ та Октябры уынгыл кусдзысты не специалисттæ», – загъта Джиоты чызг.

УАЗÆГТЫ Марфæ