ЛЕВЫ НОГ ХЪÆППÆРИС
Знауыры районы Дзагъинайы хъæуæй рацæугæ, ныртæккæ Дзæуджыхъæуы цæрæг меценат Лалыты Левы ном дыууæ Ирыстоны дæр зындгонд у йæ хæрзаудæн архайдæй. Нæ газеты фæрстыл арæх ныммыхуыр кæнæм йæ ахсджиаг æмæ хъæуæг архайды тыххæй. Лев ныр аст азы дæргъы йæхи сæрмагонд фæрæзтæй мыхуыр кæны Уæрæсейы Федерацийы, Хуссар æмæ Цæгат Ирыстоны сæргълæуджыты портреттæ æмæ сæ лæвар кæны скъолатæн, сабидæттæн, æхсæнадон организацитæн, хицауиуæгады структурæты минæвæрттæн. Иу минæй фылдæр у дыууæ Ирыстон, Кæсæг-Балхъар æмæ æндæр регионты ахуырадон уагдæттæн кæй балæвар кодта, уыцы портретты нымæц. Ацы хъæппæрисы тыххæй арæх фæдзуры: «Чысыл куы уыдтæн, уæд нæ хæдзары къулыл ауыгъд уыд Сталины портрет æмæ-иу æм алыхатт дæр бирæ фæкастæн. Уыцы рæстæджы бирæ хæдзæртты уыдысты Ленин æмæ Сталины портреттæ æмæ ма дис кодтон иу хъуыддагыл, зæгъын, къултыл цæмæннæ сты конд æндæр стыр гоймæгты партреттæ. Æмæ мæм уæд фæзынд Уæрæсейы лидер Владимир Путины, Хуссар æмæ Цæгат Ирыстоны сæргълæуджыты портреттæ адæмæн æмæ алыгъуызон организацитæн лæвар кæныны хъæппæрис».
Лалыты Левы уырны уый дæр, æмæ йæ лæвæрттæ æвзонг фæлтæры дæр кæй разæнгард кæнынц алыгъуызон хорз хъуыддæгтæ аразынмæ, раст фæндагыл æфтауынц бæрнон бынæтты кусæг къухдариуæггæнджыты. «Алы сывæллонæн дæр йæ цæсты раз хъуамæ уа цæвиттон кæмæй иса, ахæм адæймаг. Хæдзары къулыл президенты-нысанмæтырнæг адæймаджы портрет ауыгъд куы уа, кæцы нæ цæстыты раз аразы истори, уæд рæзгæ фæлтæр тырндзысты, цæмæй суой ахæм стыр гоймæгтæ æмæ царды сæ къухты бафтой стыр æнтыстытæ». Ацы хъæппæрис уæлдай актуалондæр у абон, уымæн æмæ фактон æгъдауæй райдыдта Уæрæсейы Федерацийы президенты æвзæрстыты фæдыл æвзарæн кампани, æмæ уыцы кандидаттæй иу у Владимир Путин, кæцы тынг бирæ сарæзта Хуссар Ирыстонæн…
Æхсæнадон архайæг Лалыты Левæн йæ хæдзары ис Ирыстоны политикон архайджытæ æмæ зынгæ гоймæгты портретты æнæхъæн галерея. Афтæмæй уый æвдисы, ацы адæмæн стыр кад кæй кæны, уый æмæ йæхæдæг дæр тырны сæ хорз хъуыддæгтæн сын аккаг уæвын. Æмæ йын æнтысгæ дæр кæны. Йæ хæрзаудæн акцитæ афтæ бирæ сты æмæ сæ банымайын зын у…
НОГАЗОН АКЦИ
Ног азы хæдразмæ Цæгат Ирыстон-Аланийы Культурæйы министр Фидараты Сослан, горæт Дзæуджыхъæуы Ветеранты советы сæрдар, РЦИ-Аланийы Æхсæнадон палатæйы уæнг Лалыты Лев бабæрæг кодтой æфсæддон госпиталы уæвæг цæф хæстонты.
Лалыйы фырты ныхæстæм гæсгæ, ма семæ уыдысты Дзæуджыхъæуы Культурæйы республикон колледжы коллектив æмæ студенттæ уагдоны директор Албегаты Ларисæйы сæргълæудæй. Уыдон фембæлдысты Украинæйы уагъдцæуæг сæрмагонд æфсæддон операцийы хайадисджытимæ, кæцытæн госпиталы хос кæнынц. Зæрдæбын арфæтæ сын ракодтой Ног азы цытæн. Уазджытæ сæ бузныгдзинад равдыстой хæстонтæн Уæрæсейы Федерацийы интерестæ кадимæ кæй æххæст кæнынц, уый тыххæй. Арфæйы ныхæстæ загътой Дзæуджыхъæуы æфсæддон госпиталы медицинон персоналæн дæр сæ удуæлдай куысты тыххæй.
Лалыты Лев хæстонтæн балæвар кодта йæ чиныг. Æрсидт сæм, цæмæй сæхи ма ауадзой, сæ зæрдæтæм ма ныхъусой, фæлæ дарддæр цæрой æххæст цардæй. Радзырдта сын йæхи трагикон историйы тыххæй дæр. Загъта сын, зæгъгæ, йæхæдæг у 1-аг къорды инвалид, фæлæ вазыгджын уавæртæм нæ кæсгæйæ уый нæ фесæфта ахæм хорз миниуджытæ, куыд цардуарзондзинад æмæ зæрдæхæлардзинад. Лалыты Лев кæны активон æхсæнадон архайд, æххуыс кæны фæкæсынхъуаг адæмæн. Уый æвджидарæй балæууыд дыууæ бирæсывæллонджын бинонтæн, кæцыты дарджытæ фæмард сты сæрмагонд æфсæддон операцийы.
Культурæйы республикон колледжы студенттæ æфсæддон службæгæнджытæн бацæттæ кодтой концертон программæ. Уыдон сæххæст кодтой алыгъуызон вокалон, хореографион æмæ инструменталон номыртæ. Хæстонты зæрдæмæ сæ курдиат афтæ тынг фæцыд æмæ сын кодтой тыхджын къухæмдзæгъд. Хæстонтæй бирæтæ сæхи нæ баурæдтой æмæ цыренгæнæг кавказаг мелодитæм семæ кафын райдыдтой.
Мадзалы кæрон уазджытæ æфсæддон службæгæнджытæн ныфс бавæрдтой, зæгъгæ, арæхдæр организаци кæндзысты ахæм фембæлдтытæ. Сæ рады сын хæстонтæ дæр бузныджы ныхæстæ загътой сæ хъусдард æмæ аудындзинады тыххæй.
Банысан кæнын хъæуы уый дæр, æмæ Лалыты Лев кæй фæнд кæны Уæрæсейы госпиталтæм ацæуын æмæ цæф хæстонтæн йæхи цæвиттоныл ныфсæй балæууынмæ.
Нæ уацх.
