Хуссарирыстойнаг æвзонг боксертæ 19 майданы рамбылдтой Минеральные Водыйы муниципалон зылды гом турниры. Уыцы майдантæй аст уыдысты сыгъзæринтæ, иууæндæс та – æвзист. Ерысты хайад истой 200 боксерæй фылдæр. Уыдон уыдысты Абхаз, Ростов-на-Дону, Волгоград æмæ Стъараполы крайæ.
Командæйы тренертæй сæ иу Куымæридтаты Родионæн та лæвæрд æрцыд «Ерысты хуыздæр тренер»-ы сæрмагонд приз.
Спортсменты тренертæ сты Дзигойты Ацæмæз, Куымæридтаты Родион, Бестауты Чермен, Гæбæраты Гамлет æмæ Коцты Вадим.
АРМРЕСТЛИНГ
Хуссарирыстойнаг армрестлер Хæбæлаты Арсен Мæскуыйы ссис профессионалон турнир «Вершина 20»-ы уæлахиздзау. Ирон спортсмен хæцыд Калугайы областы минæвар Сергей Степаненкоимæ, кæцы дзы уыд уæззаудæр. Фæлæ уымæ æнæкæсгæйæ Арсен равдыста хорз цæттæдзинад, йемæ рахæцыд фондз хатты æмæ дзы цыппары фæуæлахиз. Афтæмæй 4:1 хыгъдæй рамбулгæйæ, ссис турниры уæлахиздзау.
Спортсмены тренер Джиоты Валери куыд фехъусын кодта, афтæмæй Арсен ныр æртыккаг хатт рамбылдта ацы турнир.
ÆМХÆЦЦÆ ÆМБУАРХÆСТ
Æмхæццæ æмбуархæстæй архайæг ирон спортсмен Хæбæлаты Леван фæуæлахиз украинæйаг Николай Плязинскийыл. Тох цыд Лос-Анджелесы турнир LFA 177 фæлгæтты. Леван йæ ныхмæлæууæджы нокауты арвыста фыццаг раунды, афтæмæй йæ профессионалон карьерæйы ныр рамбылдта цып-пæрæм хатт.
УÆЗЗАУ АТЛЕТИКÆ
Дыгуры уагъд æрцыд æрыгæтты ‘хсæн РЦИ-Аланийы чемпионат уæззау ателтикæйæ. Уым 12 азы онг кæуыл цæуы, уыцы спортсменты ‘хсæн 89 кг уæзы категорийы фæуæлахиз хуссарирыстойнаг спортсмен Къæбысты Арсен. Уый тыххæй хъусын кæны «РХИ-йы уæззау атлетикæйы федераци»-йы президент Кæсæбиты Александр.
НОМАРÆН ТУРНИР
Ленингоры поселочы уагъд æрцыд Советон Цæдисы чемпион Цгъойты Сурены номарæн турнир дзюдойæ. Хайад сæ райстой 60 æвзонг спортсменæй фылдæр. Ерысты фæстиуджытæм гæсгæ уæлахиздзаутæ систы: Козаты Сослан, Хуыгаты Руслан, Дзабиты Руслан, Куыдзеты Андрей, Георги Гвазава, Гуццаты Дзамбулат, Бедойты Тенгиз æмæ Ходты Михаил.
ХУРИТЫ Батрадз
