Хъæбатырдзинад æмæ адæмы иудзинады боны цытæн Цхинвалы уагъд æрцыд æвзæнгты ‘хсæн республикæйы чемпионат боксæй. Ерысты хайад райстой 12 азæй 17 азы онг кæуыл цыд, ахæм спортсментæ. Уыдон дих уыдысты æртæ кары къордыл. Дыууæ боны дæргъы спортуарзджытæ федтой 80 тохы бæрц. Ерысты фæстиуджытæм гæсгæ арæзт æрцæудзæн Хуссар Ирыстоны æмбырдгонд командæ, æмæ республикæйы спортивон кад хъахъхъæндзæн æппæтуæрæсейон ерысты.
Банысан кæнын хъæуы уый дæр, æмæ Хъæбатырдзинад æмæ адæмы иудзинады боны цытæн Президенты Кубок рамбулыны сæраппонд уагъд кæй цæуынц ерыстæ спорты ахæм хуызтæ, куыд футбол, волейбол æмæ баскетболæй. Афтæ ма ерыстæ уагъд цæудзысты стрит варкаутæй.
Къуырийы кæрон ма уагъд æрцæудзæн Олимпион хъæзтыты дыууæ хатты призер Къудухты Бесикы номарæн турнир уæгъдибар хъæбысхæстæй.
УÆГЪДИБАР ХЪÆБЫСХÆСТ
Хуссарирыстойнаг æвзонг богалтæ хайад райстой Мæздæджы уагъдцæуæг турнир «Моздокский ковер»-ы, зæгъгæ. Уым бронзæйон хорзæхтæ бафтыдысты Гуыззыдтаты Батрадз æмæ Артур Комшишвилийы къухты. Сæ тренертæ сты Хъесаты Петр, Багаты Вадим æмæ Плиты Руслан. Турниры ма бронзæйон хорзæхтæ рамбылдтой Плиты Дмитри, Гæбæраты Артур æмæ Дзабиты Аслан. Уыдоны цæттæ кæнынц тренертæ Коцты Тамерлан, Гæджиты Марат æмæ Бикойты Азæмæт.
***
Кæронмæ бахæццæ дыууæ хатты Олимпион чемпион Андиаты Сосланы номарæн турнир уæгъдибар хъæбысхæстæй. Ерысты ирон богалтæн бантыст 5 сыгъзæрин, 5 æвзист æмæ 4 та бронзæ майданы рамбулын. Ерысты уæлахиздзаутæ систы Хъызынты Джамбулат (65 кг), Сечъынаты Георги (70 кг), Хъарданты Магомет (74 кг), Цоколаты Алан (79 кг) æмæ Джиоты Георги (125 кг). Æвзист майдантæ та бафтыдысты Гобозты Тамерлан (57 кг), Куыдзойты Алан (70 кг), Бетанты Дэвид (79 кг), Мæхъиты Зауыр (86 кг) æмæ Цæкуылты Батырбегы (125 кг) къухты. Бронзæйон призертæ та систы Найфонты Алан (86 кг), Габуты Аслан (92 кг), Плиты Алан (97 кг) æмæ Дзугаты Давид (125 кг).
Банысан кæнын хъæуы уый дæр, æмæ иууыл уæззаудæр уæзы категорийы фæуæлахизуæвæг Джиоты Георгийæн лæвæрд кæй æрцыд автомашинæ. Ацы уæзы йæ спортивон карьерæйы рæстæджы хæцыд Андиаты Сослан йæхæдæг дæр.
ХУРИТЫ Батрадз
