Республикæ Хуссар Ирыстоны Президент Бибылты Анатоли йæхимæ райста Республикæ Хъырымы минæвæртты: Республикæ Хъырымы Базарадон-сæудæджерадон палатæйы президент Артем Мальцев æмæ индивидуалон амалиуæггæнæг Константин Дроздовы. Фембæлды ма хайад райста Хуссар Ирыстоны Базарадон-сæудæджерадон палатæйы президент Æлборты Алан.
Нæ бæстæйы сæргълæууæг раарфæ кодта уазджытæн æмæ загъта, зæгъгæ, йын æхсызгон у Хуссар Ирыстоны зæххыл сæ фенд.
«Республикæ Хуссар Ирыстоны æмæ Уæрæсейы Федерацийы æхсæн цы процесстæ цæуынц, уыдоны кæддæриддæр вæййы Республикæ Хъырымы фарст дæр. Не ‘махастытæ æмæ размæцыд махæн дæттынц фидардзинад æмæ сты бæрзонд æмвæзадыл. Афтæ кæй у, уый ирдæй бæрæг у, РХИ æмæ Республикæ Хъырымы базарадон-сæудæджерадон палатæты æхсæн арæзт кæй æрцыд сразыдзинад. Мæн ныфс ис, сымах ныфсджынæй цы плæнттыл дзырдтат, уыдон æххæст кæй цæудзысты. Уырны мæ, уыцы плæнттæ фæстиуæгджын кæй уыдзысты æмæ нæ разы цы хæстæ æвæрд æрцыдысты, уыдон къухты кæй бафтдзысты»,- загъта Президент
Республикæ Хъырымы Базарадон-сæудæджерадон палатæйы президент Артем Мальцев фыццаджы-дæр бузныджы ныхæстæ загъта Президент Бибылты Анатолийæн Республикæ Хъырымы Сæргълæууæг Сергей Аксеновы номæй. Арфæйы ныхæстæ ма загъта, афтæ хорз сæ кæй райста, уый тыххæй æмæ банысан кодта, зæгъгæ, фидар къухтæм цы паддзахад райстай, уымæн йæ экономикæ кæй уыдзæн перспективон.
«Цы здæхтытæ – хъæууон хæдзарад, туризм – рахицæн кодтай, уыдон сты уæлдай перспективондæр. Мах сбæрæг кодтам къорд мадзалы, кæцытæ уыдзысты фæстиуæгджын, бирæ хъуыдытæ нæм ис РХИ æмæ Хъырымы паддзахадон бюджеттæ баххæст кæныны тыххæй. Базарадон-сæудæджерадон палатæтæ куыд алы хатт, афтæ ныр дæр уыдзысты дыууæ республикæйы æхсæн бизнесы хид. Уырны мæ, мах кæй ис хорз фидæны ныфс, æмгуыстад æмæ æндæр ахастыты», – банысан кодта Артем Мальцев.
Бибылты Анатоли ноджыдæр стыр бузныг загъта уазджытæн, Сразыдзинадыл къухтæ æрфыссыны сæрмагондæй хайад кæй райстой, уый тыххæй.
«Ныфс мæ ис, нæ разы цы хæстæ æрæвæрдтам, уыдонæн æмбæлон фæстиуæг кæй уыдзæн. Мæн фидарæй уырны, æмæ цы иумиаг хиды кой скодтат, уый Хъырымы хидау кæй разындзæн фидар æмæ рæсугъд. Мæ зæрдæ уын зæгъы стыр æнтыстытæ уæ куысты мидæг», – загъта Президент.
Нæ уацх.
Comments are closed, but trackbacks and pingbacks are open.