РХИ-йы Президент Бибылты Анатоли Цæгат Ирыстон-Аланийы Сæргълæууæг Битарты Вячеславимæ иумæ хайад райста мадзалы, кæцы уагъд æрцыд Цæгат Ирыстоны Алагиры районы Уналы хъæуы Цæллæгаты этнокомплексы, фæсарæнты цæрæг æмфыдыбæстæйонты минæвæрттæн уагъдцæуæг сæрдыгон культурон-ахуырадон курс «Этнолагерь – 2019»-ы фæлгæтты.
«Æхсызгон мын у, ныр фæндзæм аз фæд-фæдыл мах кæй æрæмбырд вæййæм, æмæ нæ фембæлдтытæ Ирыстоны дыууæ хайы арæнмæ æввахс ахæм рæсугъд историон æмæ символикон бынæтты уагъд кæй æрцæуынц, уый. Æмæ мын иууыл æхсызгондæр та уый у, сымах æмæ уе ‘мфыдыбæстæйонтæ – Ирыстонæй ра-цæугæтæ тынг кæй цымыдис кæнынц сæ адæмы культурæ æмæ æгъдæуттæм, уый», – загъта РХИ-йы Президент «Этнолагерь – 2019»-ы хайадисджытæн.
Бибылты Анатоли банысан кодта, Туркмæ ирæттæ дзыллон æгъдауæй куы алыгъдысты, уæдæй фæстæмæ æппæт дунейы цæрæг ирæттæ æмæ сæ историон Райгуырæн бæстæйы чи цæры, уыцы ирæтты ‘хсæн дæргъвæтин рæстæджы бæрæг бастдзинад кæй нæ уыд.
«Национ ахастыты фарстыты фæдыл Республикæ Цæгат Ирыстон-Аланийы министрады æмæ уыцы лæппуты фæрцы, кæцытæ аскъуыддзаг кодтой афтæ саразын, цæмæй æппæт дунейы цæрæг ирæттæ цæуой ардæм, ахуыр кæной сæ истори æмæ уыной сæ адæмы цардуаг, уый сæ къухты æфтгæ дæ бакодта. Ныр 5 азы дæргъы ардæм чи æрцæуы, уыцы бирæ æвзонг лæппутæ зонгæ кæнынц сæ истори æмæ сæ Райгуырæн бæстæимæ. Уый, кæй зæгъын æй хъæуы, фидар къахдзæф у, фæсивæд кæрæдзиимæ куы ныхас кæной, уæд ын фидæны уыдзæн серьезон фæстиуджытæ», – загъта уый.
Бæрæг куыд у, уымæ гæсгæ алы адæймагæн дæр, нацимæ нæ кæсгæйæ, сæ зæрдæйæ баст вæййынц сæ фыдæлты сидт æмæ Райгуырæн бæстæимæ.
«Йæ историон Райгуырæн бæстæйы чи нæ цæры, уыдонæй алкæцы ироны дæр фæнды йæ фыдæлты историимæ базонгæ уæвын, æмæ ир-æтты истори та куыд зонæм, афтæмæй тынг хъæздыг у, скифтæ, сæрмæттæ, алантæй райдайгæйæ суанг нырыккон ирæтты онг», – загъта Бибылты Анатоли.
Йæ рады Битарты Вячеслав дæр арфæ ракодта «Этнолагерь – 2019»-ы хайадисджытæн æмæ банысан кодта, зæгъгæ, азæй-азмæ фылдæр кæны, Ирыстонмæ æрцæуын кæй фæнды, уыдоны нымæц.
«Зынаргъ хæлæрттæ!
Æхсызгон мын у сымахæн уæ фыдæлты Райгуырæн бæстæйы раарфæ кæнын. Ацы акци æрбаиу кæны дунейы æппæт къуымты цæрæг ирон фæсивæды. Æхсызгон мын у уый дæр, æмæ азæй-азмæ «Этнолагерь»-ы географи кæй уæрæхдæр кæны. Уый дзурæг у ууыл, зæгъгæ, ирон фæсивæды хъæуы кæрæдзиимæ ныхас кæнын æмæ уый та у нæ фæсивæды иудзинад. Мах иу адæм стæм. Ацы аз мах уадзæм «Этнолагерь»-ы дыууæ фæлтæры, уымæн æмæ ацы форумы хайад райсын кæй фæнды, уыдон кæнынц фылдæрæй фылдæр. Куы бахъæуа, уæд мах дæр фæфылдæр кæндзыстæм фæлтæрты нымæц», – загъта уый.
Банысан кæнын хъæуы уый дæр, æмæ проект «Этнолагерь» ныр фæндзæм аз кæй æрбаиу кæны дунейы алы къуымты цæрæг этникон ирæтты. Проекты фæлгæтты ацы аз Ирыстонмæ æрцыд æртын адæймаджы аст паддзахадæй æмæ Уæрæсейы Федерацийы дыууæ субъектæй.
Ацы мадзалы нысан у Хуссар æмæ Цæгат Ирыстонæн æддейæ цæрæг ирон фæсивæды ирон адæмы традицитæ, культурæ æмæ историимæ зонгæ кæнын æмæ кæрæдзиимæ ныхас кæнын.
Проекты хайадисджытæ сты, 18 азæй 35 азы онг кæуыл цæуы, фæсивæды ахæм минæ-вæрттæ.
РХИ-йы Президент æмæ Хицауады
Пресс-службæ
Comments are closed, but trackbacks and pingbacks are open.