РХИ-йы Президент Бибылты Анатоли йæхимæ райста Постконфликтон бæстонкæнынады фарстаты фæдыл Президенты æххæстбарджын минæвар Джиоты Мураты. Уый паддзахады сæргълæууæджы базонгæ кодта Фæскавказы æдасдзинад æмæ стабилондзинады фæдыл Женевæйы дискусситы 43-æм раунды фæстиуджытимæ.
Æххæстбарджын минæвары ныхæстæм гæсгæ дискусситæ уагъд цыдысты раздæр сфидаргонд программæмæ гæсгæ. 27 марты уыдысты дыууæфарсон фембæлдтытæ хуссарирыстойнаг делегаци æмæ ЕÆÆО, Евроцæдис æмæ ИНО-йы делегациты минæвæрттимæ.
Хуссарирыстойнаг-гуырдзиаг паддзахадон арæныл стабилондзинад æмæ æдасдзинады фарстатыл уынаффæ кæнгæйæ, банысан чындæуыд, фæстаг рæстæджы дзы серьезон инциденттæ кæй не ‘рцыд.
«Арæныл хизыны стыр эксцесстæ не ‘рцыд. Мах нæ хъыгдзинад загътам, Евроцæдисы хъусдарджыты миссийы æвæлмас ахастæй Гуырдзыстоны делегаци кæй нал æрбацыд Инциденттæ ма æруадзыны æмæ сæ фæдыл мадзæлттæ æххæст кæныны механизмты фæлгæтты фембæлдмæ, кæцы хъуамæ уыдаид 1 марты. Гуырдзиаг фарс уый æмбарын кодта уымæй æмæ æмбæстаг Татунашвилийы амæлæты фоныл уыдонæн сæ бон кæй нæ уыд æндæр фарстатыл уынаффæ кæнын. Уый фæдыл мах фехъусын кодтам, уыцы бон цы фарстатыл хъуамæ уынаффæ кодтаиккам, уыдон дæр ахсджиаг кæй уыдысты, арæнмæ хæстæг районты чи цæрынц, уыцы цæрджытæн», – загъта хуссарирыстойнаг делегацийы сæргълæууæг.
Мурат куыд радзырдта, уымæ гæсгæ гуырдзиаг фарс фæлвæрдта, Гуырдзыстоны æмбæстаг Арчил Татунашвили Цхинвалы кæй амард, уымæй Хуссар Ирыстоны адресыл демагогон азымты спайда кæнын æмæ хуссарирыстойнаг делегаци равдыста йæ бындуриуæгджын позици уыцы æнæраст азымтæм ахасты, афтæ ма, зæгъгæ, фехъусын кодтам, Арчил Татунашвилийы мæлæты фактæй кæй нæ хъæуы пайда кæнын фальсификациты æмæ гуымир политикон провокациты, кæцыты аразы гуырдзиаг фарс.
«Æз сын дзуапп радтон, гуырдзиаг фарсмæ кæй нæй Татунашвилийы амæлæты фæдыл хатдзæг, хуссарирыстойнаг фарс сæм йæ мард буаримæ цы экспертон хатдзæг радта, уымæй дарддæр æмæ сæ ныхæстæ политикон амбицитæ йедтæмæ кæй ницы сты», – загъта Джиоты Мурат.
Уыимæ ма уый банысан кодта, зæгъгæ, Женевæйы дискусситы хайадисджыты хъусдард аздæхтам уымæ, æмæ Гуырдзыстоны Парламент уынаффæ кæй райста Татунашвилийы амæлæты фæдыл.
«Æз банысан кодтон, сæ сæйраг нысан кæй уыдис радон хатт уæрæсейаг фарсы фæазымджын кæнын æмæ Гуырдзыстоны ориентаци НАТО-йы ‘рдæм кæй у, уый ноджыдæр банысан кæнын», – загъта Президенты æххæстбарджын минæвар.
Хуссарирыстойнаг делегацийы уæнгтæ сæрмагонд хъусдард аздæхтой, Евроцæдисы хъусдарджыты миссийы хъусдарджытæ къорд хæттыты кæй фехæлдтой паддзахадон арæныл хизыны фæтк, афтæмæй та уыдонæн кусыны мандат ис æрмæстдæр Гуырдзыстоны тырриторийыл.
Афтæ кæй у, уымæ гæсгæ хуссарирыстойнаг делегаци ногæй æрсидт гуырдзиаг фарсмæ, цæмæй æрæвналой иумæйаг куыстмæ Республикæ Хуссар Ирыстон æмæ Гуырдзыстоны ‘хсæн паддзахадон арæны хахх сбæлвырд кæныны фæдыл.
Джиоты Мураты ныхæстæм гæсгæ, фыццаг кусæгон къорды сæйраг хъусдард здæхт æрцыд тыхæй не спайда кæныныл æнувыддзинады тыххæй дискуссийы хайадисджыты хъусынгæнинаджы проектмæ. Уый гæнæн уыд æмæ суыдаид Гуырдзыстоны фарсæрдыгæй Хуссар Ирыстон æмæ Абхазы æдасдзинадæн гаранти дæттæг документыл, дарддæр кусынмæ æмæ æдасдзинады, регионалон стабилондзинады системæ саразынмæ ахсджиаг къахдзæф.
Америкæйаг делегацийы минæвæрттæ сæхи равдыстой бынтон æнæконструктивонæй, уыдон фæндон бахастой, цæмæй хъусынгæнинаджы проектмæ хаст æрцыдаиккой, райсæн кæмæн нæй, ахæм ивындзинæдтæ кæцытæ уыдысты форматы, Женевæйаг дискусситы мидисы ныхмæ, бынтондæр иуварс кодтой, æууæнкдзинад сæндидзын кæныныл раздæры бирæ раундты цы хъарутæ бахардз, уыдоны.
«Бæлвырддæрæй та хъусынгæнинаг хъуамæ райсой 2008 азы 12 августы сразыдзинады бæстæтæ-хайадисджытæ, уымæй та уыдон фæлвæрдтой хайадисджытæй Хуссар Ирыстон æмæ Абхазы сисын. Мах сын загътам, ахæм формулировкæмæ мах кæсгæ дæр кæй не ‘ркæндзыстæм æмæ ситуацийы кæй дестабилизаци кæны растдæр америкæйаг делегаци», – загъта уый æмæ ма банысан кодта, Женевæйы дискусситы хайадисджыты хъусын-гæнинаг бацæттæ кæныны фæдыл куыст кæй адарддæр кæндзысты радон раунды.
Гуманитарон фарстаты фæдыл къорды бæстон ныхас цыдис æндæр ахсджиаг темæты фæдыл, уыдоны нымæцы Гуырдзыстоны территорийыл æбæрæгæй сæфт ирæтты проблемæ дæр.
«Мах бафарстам Евроцæдисы минæвæртты, Татунашвилийы хъуыддаджы фæдыл хъæлæсыдзаг хъусынгæнинæгтæ аразгæйæ, цæуылнæ дзурынц, 10 азы дæргъы Хуссар Ирыстоны мæдтæ кæй нæ зонынц, сæ хъæбултыл цы ‘рцыд, кæцытæй сæ иуыл уæд 16 азы дæр нæма цыдис?!», – загъта Мурат.
ЕÆÆО-йы минæвæрттæ бафидар кодтой, Хуссар Ирыстоны æбæрæ-гæй сæфт æмбæстæгты агурыны фæдыл дунеон эксперты куыст дарддæр кæй кæндзæн.
Культурон бынты фæдыл фарстытыл уынаффæ кæнгæйæ, дискусситы хайадисджыты хъусдард здæхт æрцыд Гуырдзыстоны контролы бын уæвæг Скæсæн Ирыстоны территорийыл ирон историон-культурон цыртдзæвæнтæ бахъахъхъæныны проблемæмæ.
«Америкæйаг делегацийы сæргълæууæг йæ раныхасы банысан кодта, Гуырдзыстоны, æцæгæйдæр, фадат кæй нæй ирон æвзагыл ахуыр кæнынæн», – загъта Джиоты Мурат.
Муратмæ байхъусгæйæ, Президент бузныг загъта хуссарирыстойнаг делегацийæн æнтысгæ куысты тыххæй.
«Хъæуы уæрæхдæрæй æмгуыст кæнын, Женевæйы дискусситы хайад чи исынц, уыцы дунеон организацитимæ. Уый сымах æнтысгæйæ аразут æмæ уын зæгъын стыр бузныг. Мæ хъуыдымæ гæсгæ дарддæр æмгуысткæнынад тынгдæр кæндзыстут, Хуссар Ирыстоны интерестæ хъæхъхъæнгæйæ», – загъта Бибылты Анатоли.
Уый ма афтæ банысан кодта, зæгъгæ, Арчил Татунашвилийы мард буар раттыны фæдыл Хуссар Ирыстоны разамынады архайдтытæ уыдысты раст.
«Æз куыд бамбæрстон, афтæмæй уыимæ сæ мидзæрды сразы сты европæйæгтæ. Хъыгаг у, иуæй-иу политиктæм хъусын, кæцытæ ахæм æнгæс хъуыддæгтæ хæссынц политикон æмвæзадмæ. Бирæтæ, сæхи уæзгæ политиктыл нымайгæйæ, райдайынц мæллæг кæнын, сæхи нысæнттæн кæмæй пайда кодтой, Уæрæсейы уыцы финансон фæрæзтæй дард кæй ацыдысты, уымæ гæсгæ. Ныртæккæ уыдонæн ницыуал баззадис Хуссар Ирыстоны разамынады цавæрдæр æнæраст архайдтыты азымджын кæнынæй дарддæр. Мах алцыдæр сарæзтам раст», – фехъусын кодта паддзахады сæргъ-лæууæг.
Бибылты Анатоли банысан кодта, æппæт тыхтæ дæр кæй аздахын хъæуы æбæрæгæй сæфт адæймæгты агурынмæ, куыст фæтыхджындæр хъæуы максималон æгъдауæй, уыцы нымæцы дунеон организациты минæвæрттимæ.
«Ныфс мæ ис, уыцы лæппуты мах кæй ссардзыстæм. Нæ хæс у уыдоны кæронмæ агурын. Мах цæттæ стæм æхцайы фæрæзтæ ахæм адæймæгтæн бафидын, кæцытæ нын ратдзысты, кæм сты, уый тыххæй цыдæр информаци уæддæр», – загъта Президент.
Comments are closed, but trackbacks and pingbacks are open.