Славяйнаг фыссынад æмæ культурæйы боны цытæн 24-æм майы Тыбылты Алыксандры номыл Хуссар Ирыстоны паддзахадон университеты уагъд æрцыдис æхсæнадæмон зонадон конференци «Кириллица, как основа культурно-языкового притяжения русского и осетинского народов», зæгъгæ, ахæм номимæ. Славяйнаг фыссынады бæрæгбонон мадзалмæ фæхуыдтой уæрæсейаг уазджыты дæр.

Зонадон конференци бацæуæн ныхасæй байгом кодта уырыссаг æвзаг æмæ литературæйы ахуыргæнджыты ассоциацийы президент, ХИПУ-йы уырыссаг æвзаджы кафедрæйы гæс, профессор Тедеты Залинæ. Уый, фыццаджыдæр, арфæ ракодта славяйнаг фыссынад æмæ культурæйы боны цытæн конференцийы æппæт хайадисджытæн дæр æмæ сæрмагондæй бузныджы ныхæстæ загъта уазджытæн, рæстæг кæй ссардтой æмæ сæм кæй фæуазæг сты, уый сæраппонд. «Конференци уагъд цæуы славяйнаг фыссынадыл 1155 азы сæххæсты боны цытæн. Æфсымæртæ Кирилл æмæ Мефодийæн славяйнаг алфавит саразыны хъуыддаджы сæ хайбавæрд у егъау æмæ ацы бæрæгбоны тыххæй мах æрвылаз дæр фæуадзæм алыгъуызон тематикон мадзæлттæ. Славяйнаг фыссынад махæн у æнæмæнгхъæуæг æмæ ацы традицихъуамæ дарддæр кæнæм», – загъта Тедеты Залинæ.

Мадзалы хайад райстой Хуссар Ирыстоны Уæрæсейы Федерацийы минæварады уынаф-фæгæнæг Сергей Манько, «Россотрудничество»-йы къухдариуæггæнæг Михаил Степанов, политолог, æхсæнад «Двуглавый орел»-ы минæвар Артур Атаев, социалон зонæдты доктор, Хуссар Федералон университеты минæвар Максим Васьков, филологон зонæдты доктор, А. Солженицыны номыл уырыссаг – фæсарæнты хæдзары культурæйы хайады гæс Татьяна Марченко, Уæрæсейы Федерацийы журналистты цæдисы уæнг, программæ «Звезды русского мира»-йы автор æмæ амонæг Ирина Бреусова, РХИ-йы Ахуырад æмæ зонады министр Гасситы Натали, йæ хæдивæг Гаглойты Элисаимæ, РХИ-йы Культурæйы министр Зассеты Жаннæ. Конференцийы куысты ма хайад райстой университеты минæвæрттæ сæ сæргъ ректор Тедеты Вадим æмæ нæ республикæйы скъолаты ахуыргæнджытæ æмæ директортæй уырыссаг æвзаг æмæ литературæйы ахуыргæнджыты ассоциацийы чи архайы, уыдон.

Тедеты Залинæ ма банысан кодта уый æмæ университетæн уырыссаг æвзагыл кæй цæуы зонадон-методикон æмæ æхсæнадон-литературон журнал «Русское слово», кæцы уагъд цæуы Республикæ Хуссар Ирыстоны Президент Бибылты Анатолийы æххуысы руаджы.

Конференцийы раныхас кодта ХИПУ-йы ректор Тедеты Вадим. Уый дæр йæ рады бузныджы ныхæстæ загъта уазджытæн конференцийы хайад кæй исынц, уый тыххæй. Дарддæр ма цыбыртæй æрдзырдта университеты куысты тыххæй, цы уавæрты архайдта Хуссар Ирыстонæн уæззау рæстæджыты æмæ сын ныртæккæ, Уæрæсейы Федерацийы æххуысы руаджы, цавæр æнтыстытæ ис, æппæт уыдæттыл.

Зонадон конференцийы программæмæ хаст æрцыдис цалдæр доклады. Уырыссаг æвзаджы кафедрæйы гæс Тедеты Залинæ адæмы рæгъмæ рахаста цымыдисон доклад ахæм темæйыл «Лингводидактический понтенциал кириллицы», цыран бæстонæй æрдзырдта Славяйнаг фыссынад æмæ культурæйы боны егъау нысаниуæгыл. Славяйнаг фыссынад ирон адæмæн цы пайда хæссы æмæ сын сæ разы цы фæндæгтæ гом кæны, æппæт уыдæттыл. «Кириллица стыр ахъаз фæцис ирон культурæ æмæ националон интеллигенцийы рæзтæн. Кириллицайы алфавиты бындурыл ирон адæмæн фыссынад саразын стыр ахъаз фæцис нæ бæстæйы æмæ йæ адæмы размæцыд æмæ рæзты хъуыддагæн», – загъта Тедеты чызг. Уый ма йæ доклады банысан кодта, зæгъгæ, славяйнаг фыссынады бæрæгбоны традици у ирон æмæ уырыссаг адæмты историон бастдзинад фидар-гæнæг.

«Значение наследия Кирилла и Мефодия. Защита русского языка в рамках современности», зæгъгæ, ахæм темæйыл та доклад бакаст И. Бреусова. Уый дæр йæ доклады æмбарын кæны, Уырыссаг æвзаг кæй у Уæрæсе æмæ Хуссар Ирыстоны адæмы хъæздыгад, кæй сæ æввахс кæны. Докладгæнæг ма банысан кодта славяйнаг фыссынады егъау нысаниуæг æмæ йæ авналæнтæ, афтæ ма дыууæ æфсымæры куыст кæй уыдис нысанмæздæхт. Уыдон бакуыстой ууыл, цæмæй адæмы хæттыты ‘хсæн уыдаид кæрæдзиæмбарынад. Зын бамбарæн у, Кирилл æмæ Мефодий куы нæ уыдаиккой, уæд цы æвзагыл дзырдтаиккам мах кæрæдзимæ абон, уый. Абон куыд æвæрд цæуы  уырыссаг æвзаг, литературæ æмæ культурæ бахъахъхъæныны фарст, афтæ никуыма уыд. «Ацы фарст у националон æдасдзинады стыр фарст æмæ йыл хъæуы кусын», – банысан кодта И. Бреусова.

Конференцийы ма докладтæ бакастысты ХИПУ-йы уырыссаг æмæ фæсарæйнаг литературæйы кафедрæйы гæс, доцент Пæррæстаты Мананæ «Кысь» Т. Толстой в дискурсе нового времени», Татьяна Марченко –  «Мировое значение русской литературы. Нобелевская закулиса».

Бæрæгбонон мадзалы тыххæй ма конференцийы кæрон сæ хъуыдытæ загътой Сергей Манько, Артур Атаев, Дзиццойты Юри æмæ æндæртæ. Дзиццойты Юри йæ раныхасы уазджытæн радзырдта ирон фыссынады сырæзты истори æмæ йæ фæндæгтыл, куыд баст у кириллицæимæ, ууыл æмæ сын балæвар кодта чингуытæ.

Кæронбæттæны университеты ректор конференцийы æппæт хайадисджытæн дæр загъта бузныджы ныхæстæ æмæ уый фæстæ уазджытæн фенын кодта ног университетон комплекс.

Цхуырбаты Ларисæ

Comments are closed, but trackbacks and pingbacks are open.