Æвæдза, диссаг у цард. Иуæй-иу адæймæгты сæ хъысмæт ахæссы Райгуырæн бæстæйæ æддæмæ æмæ цæргæйæ баззайынц, дыккаг райгуырæн бæстæйы хуызæн сын чи свæййы, уым – фылдæр хатт Стыр Уæрæсейы. Фæлæ адæймаг кæмфæнды ма цæра, уæддæр æхсæв йæ фынты дæр фæуыны йæ фыццаг къахдзæфтæ цы зæххыл акæны, уыцы Фыдыбæстæйы. Зæрдæйы фидар тæгтæй баст вæййынц сæ Райгуырæн бæстæимæ.
Уæрæсейы зæххыл цæргæйæ, не ‘мзæххонтæй бирæты къухты бафтыдысты стыр æнтыстытæ æмæ афтæмæй скад кæнынц куыд сæхицæн, афтæ сæ радтæг ирон адæмæн, æмткæй сæ радтæг Ирыстонæн. Ахæмты сгуыхтдзинæдты тыххæй куы базонæм, уæд зæрдæ цины малы аныгъуылы, байдзаг вæййы сæрыстырдзинады æнкъарæнтæй.
Коцты Олег райгуырд Советон Гуырдзыстоны горæт Тбилисы. Йæ фыд Алекси уыцы рæстæджы куыста Гуырдзыстоны мидхъуыддæгты органты æмæ бинонты бахъуыд рæстæгмæ Тбилисы æрцæрыны сæр. Фæстæдæр Коцты бинонтæ фæстæмæ æрбаздæхтысты Цхинвалмæ æмæ цардысты Хъайтарты уынджы. Алекси Стыр Фыдыбæстæйон хæсты рæстæджы уыд фронтон развæдсгарæг. Хъæбатырæй тох кодта немыцаг фашистон тыхæйисджытимæ. Йе сгуыхтдзинæдты тыххæй хорзæхджын æрцыд Сырх Стъалыйы орденæй æмæ майдан «За отвагу»-йæ. Иу карз тохы рæстæджы нæмыг комкоммæ сæмбæлд йæ зæрдæйы бын. Кæд алыгъуызон госпиталты фæхуыссыд бирæ рæс-тæджы дæргъы, уæддæр нæмыг сисын сæ бон нæ бацис. Фæлæ уæззау цæф кæй фæцис æмæ йæ зæрдæйы бын нæмыг кæй хаста, уымæ нæкæсгæйæ хæсты фæстæ фæцард 30 азæй фылдæр æмæ, æгæрыстæмæй, ссис Дзауы районы милицийы хистæр, майоры цин райсгæйæ. Олегы мад Плиты Мария та бирæ рæстæджы дæргъы фæкуыста горæт Цхинвалы посты. 1966 азы Олег каст фæцис 2-æм астæуккаг скъола. Йæ фыд Алексийы фæндыд, цæмæй йæ дыууæ лæппуйы дæр суыдаиккой æфсæддонтæ. Олегы æфсымæр, йæ фыдау, куыста милицийы æмæ ссис дæлбулкъон. Фæлæ Олегæн бирæ рæстæджы дæргъы йæ къухты не ‘фтыд æфсæддон суæвын. Уарзта футбол, æмæ чингуытæ кæсын. Бафæлвæрдта Севастополы æфсæддон-инженерон денджызон ахуыргæнæндонмæ бацæуын, фæлæ бæрæг аххосæгтæм гæсгæ йæ къухты нæ бафтыд йæ фæнд сæххæст кæнын. Æмæ астæуккаг скъола каст фæуыны фæстæ йæ ахуыр адарддæр кодта Хуссар Ирыстоны паддзахадон педагогон институты филологон факультеты. Ахуыр кодта изæры хайады æмæ уыцы иурæстæджы куыста завод «Электровибромашина»-йы фрезергæнæгæй. Олег кæд педагогон институты ахуыр кодта, уæддæр бæллыд развæдсгарæн кæнæ контрразвæдсгарæн органты кусынмæ. Уыд Хуссар Ирыстоны паддзахадон æдасдзинады комитеты хайады фæсауæрцы дæр.
Институт каст фæуыны фæстæ кусын райдыдта Знауыры районы Цънелисы хъæуы астæуккаг скъолайы ахуыргæнæгæй. Фæстæдæр та куыста фæскомцæдисы Дзауы райкомы хайады сæргълæууæджы æххуысгæнæгæй. Ацы бынаты кусгæйæ, æрвыст æрцыд Бакойы уæлдæр партион скъоламæ, кæцыйы каст фæцис æнтыстджынæй. Æмæ æрмæстдæр 1979 азы ссис йæ бон лейтенанты пъагæттæ бакæнын. Кусынмæ йæ фæхуыдта Хуссар Ирыстоны Паддзахадон æдасдзинады комитеты уæды хистæр, булкъон Бететы Сергей. Ацы бынаты кусгæйæ, æрвыст æрцыд Ташкентмæ Паддзахадон æдасдзинады комитеты уæлдæр курсытæм. Ацы курсытæ каст фæуыны фæстæ службæ кæнын райдыдта Тбилисы паддзахадон æдасдзинады комитеты управленийы. Растдæр уым службæ кæнгæйæ, бахауд Ростовы областы Советон Цæдисы Паддзахадон Æдасдзинады комитеты управленимæ. Æхсæз азы дæргъы Олег йæ хъус дардта Ростовы уæлдæр ахуырадон уагдæттæм æмæ схызт хистæр оперативон æххæстбарджыны онг. 1987 азы та йæ бахъуыд Тбилисмæ раздæхын, фæлæ йын уым бирæ бакусын нæ бантыст. Гуырдзыстоны райдыдтой зынд-гонд трагикон цаутæ. Управленийы коллектив, хъыгагæн, фæцис дыууæ дихы – гуырдзиæгтыл æмæ æнæгуырдзиæгтыл. Ахæм вазыгджын уавæрты службæ кæнын фæзын Олегæн. Хорз уыд æмæ йын Гуырдзыстоны Паддзахадон æдасдзинады комитеты сæрдары хæдивæг Виталий Наводничий бауынаффæ кодта, цæмæй фæстæмæ аздæхтаид Ростовмæ. Гуырдзыстонæй ацæуын йæ бон ссис, цалынмæ Советон Цæдис кæронмæ нæ ныппырх, уæдмæ.
Ростовы Коцты Олег йе службæ адарддæр кодта организацигонд фыдракæнддзинады ныхмæ тох кæныны хайады. 1966 азы онг уыд уæлдай ахсджиагдæр хъуыддæгты фæдыл хистæр оперативон æххæстбарджын. Уый фæстæ Коцы фырт уыд кусджыты архайгæ фæсауæрцы, кæцытæ æрвыст уыдысты Ростовы областы фæдыл Уæрæсейы æфснайæн бангмæ. Нырма уыд Хуссар-Ныгуылæн банджы æдасдзинады фарстаты фæдыл сæрдары æххуысгæнæг æмæ уый фæстæ та ссис Æдасдзинады æмæ информаци бахъахъхъæныны управленийы директор – Уæрæсейы Æфснайæн бангы Хуссар-Ныгуылæн бангы правленийы уæнг, цыран бакуыста 2002 азы онг. Æфснайæн банджы йæ хорз куысты тыххæй хорзæхджын æрцыд «За службу в контрразведке»-йы нысанæй. Йе службæйы фæстаг дыууæ азы та уыд Хуссар оперативон таможнæйы хистæры хæдивæг, цыран ын лæвæрд æрцыд булкъоны цин. 1980 азы ма Олег каст фæцис Ташкенты Паддзахадон æдасдзинады комитеты уæлдæр скъола. Уый фæстæ та – Ростовы адæмон хæдзарады институт.
Йæ цардæмбал Джиоты Галинæ та каст фæцис Хуссар Ирыстоны паддзахадон педагогон институты химион-биологон факультет. Бирæ азты дæргъы бакуыста Ростовы онкологон центры. Ацы центры кусгæйæ, уый хуссарирыстойнаг цæр-джытæй бирæтæн баххуыс кодта, æмбæлон медицинон æххуыс райсыны тыххæй, сæ фыртыхстæй-иу ыл сæхи баппæрстой. Кæд ныртæккæ пенсийы ис, уæддæр æм абоны онг дæр бахатынц, искæй æххуысы сæр куы бахъæуы, уæд. Коцты Олег æмæ Джиоты Галинæ ацы аз апрелы мæйы банысан кодтой сæ къайады 40 азы. Уыдон схъомыл кодтой дыууæ тæхудиаджы хъæбулы – Аннæ æмæ Дауыты. Аннæ кусы хирург-гинекологæй, Ростовы областы нымад у йæ дæсныйады хуыздæр æвзонг специалистыл. Дауыт та у Ростовы областы адвокатты баиугæнды уæнг.
Бирæ азты дæргъы Олег активон хайад исы спорты къабазы дæр. Уый у Æдасдзинады органты ростоваг советы ветеранты æппæт спортивон ерысты хайадисæг. Уæлдай тынгдæр уарзы футбол æмæ бильярд. Фæстаг дыууæ азы уыд æнæкоммерцион спортивон организаци «Спортивный клуб ветеранов органов безопасности «Отдушина-Ростов-на-Дону»-йы правленийы сæрдар æмæ волейболон командæйы хистæр.
Коцты Олегыл сæххæст 70 азы. Ацы нысаниуæгджын боны сæраппонд Олегы тыххæй газет «Чекисты Дона»-йы мыхуыр æрцыд уац «В приоритете – спортивный образ жизни», зæгъгæ, цыран уацхæссæг Виктор Маскаленко ирдæй равдыста ирон лæджы удыхъæд. Коцты бинонтæн куыд-дæр гæнæн фæвæййы, афтæ æрцæуынц сæ Райгуырæн Ирыстонмæ æмæ сæ бирæ хиуæттимæ кæрæдзийыл фæцин кæнынц. Банысан кæнын хъæуы уый дæр, æмæ Ростовмæ сæ зонгæтæй чи бафты, уыдонæн вæййынц рæдау фысымтæ, се ‘ххуысы къух сæм фæдаргъ кæнынц алы хатт дæр.
ДЖИОТЫ Екатеринæ
Comments are closed, but trackbacks and pingbacks are open.