Къуырисæры 27-æм июны Хуссар Ирыстон æмæ Уæрæсейы фæсивæд банысан кæндзысты сæ бæрæгбон. Ацы цауы тыххæй фембæлдтæн æмæ ныхас кодтон нæ горæты цалдæр æрыгон æмбæстагимæ æмæ мын сæ хъуыдытæ загътой бæрæгбон æмæ фæсивæдмæ сæ ахасты тыххæй.
Джиголаты Наташа: Цхинвалы районы администрацийы статистикон фæткдаруаты специалист.
– Æз алы хатт дæр стыр цин æмæ æхсызгон æнкъарæнтимæ æмбæлын ацы бæрæгбоныл. Уымæн æмæ хатын, нæ æрыгон фæлтæртæн æппынæдзух сæ хъуыдытæ, фæндтæ æмæ бæллицтæ кæй сты Ирыстон æмæ ирон адæмы хæрзиуæгæн. Нæ фæсивæды архайдтытæ бирæ цæмæйдæрты сты раппæлинаг, фæлæ мæ хъуыдымæ гæсгæ, уæлдай раппæлинаг сты, сæ дарддæры фæндтæ æххæст кæныны хъуыддагмæ кæй нæ зивæг кæнынц, уый тыххæй.
Бæрæгбон кæд æрвылаз дæр банысан кæнæм, уæддæр мæм афтæ кæсы, æмæ нысан нæ фæцæуы куыд æмбæлы, афтæ. Мæ хъуыдымæ гæсгæ йæ хъæуы уæрæхдæрæй нысан кæнын, раззагдæр æмæ хуыздæр æрыгæттæн фылдæр кад кæнын. Фæсивæды ‘хсæн алыгъуызон мæдзæлттæ уадзыны хъуыддаджы дæр нæм ис цухдзинæдтæ.
Мæхимæ цы хауы, уым та банысан кæндзынæн уый, æмæ зонын æмæ æмбарын, фæсивæды раз цы стыр æмæ вазыгджын хæстæ ис, уыдон æмæ сæ æххæст дæр кæнын. Мæхи хорз цæвиттоныл цайдагъ кæнын æндæрты дæр. Искæй рæдигæ куы фенын, уæд, раст кæй нæ кæны, уый йын æнæзæгъгæ нæ фæвæййын.
Куыд зонæм, афтæмæй алы æвзонг адæймагмæ дæр вæййы бирæ æмæ алыгъуызон хорз хъуыдытæ æмæ фæндтæ, ахæмтæн бæрæгбоны агъоммæ мæ зæрдæ зæгъы, цæмæй сын иу-уылдæр æххæст æрцæуой сæхи удты фæндиаг.
Гæджиты Олгъæ – Тугъанты Махарбеджы номыл Цхинвалы нывгæнæн ахуыргæнæндоны цыппæрæм курсы студенткæ.
– Æвæццæгæн, куыд мæнмæ, афтæ алы æвзонг адæймагмæ дæр йæ дарддæры царды тыххæй фæзыны раст æмæ бæллиццаг хъуыдытæ. Ахæм хъуыдытæ дзæвгар ис мæнмæ дæр, фæлæ се ‘ххæст кæнынæй абоны онг нæма бафæлладтæн. Цалынмæ сæ нæ саразон, уæдмæ сæ æххæст кæныныл архайдзынæн стыр тырнындзинæдтимæ.
Æвзонг адæймагæн йæ сæйрагдæр хæс у ахуыр кæнын. Скъолайы ма куы ахуыр кодтон, уæд равзæрстон нывгæнæджы дæсныйад æмæ уыцы хæс æххæст дæр кæнын. Ацы аз фæуд кæнын нывгæнæн ахуыргæнæндон æмæ уымæй, куыд фæзæгъынц, мæ дзул лæвæрд нæ фæуыдзæнис, мæ дæсныйад хуыздæр базоныны сæраппонд хъавын мæ ахуыр адарддæр кæнынмæ.
Мæ цардвæндаг дæргъвæтин нæу, фæлæ цы рæстæг рацардтæн, уым, куыд ирон æвзонг адæймаг, афтæмæй нæдæр ме ‘мкарæнты, нæдæр мæхиуæтты истæмæй фæхудинаг кодтон. Куыд ахуыргæнæндоны, афтæ мын цъус нæй, тынг хорз кæй æмбарын æмæ мæ хорз чи æмбары, ахæм æвзонг æмбæлттæ. Алкæимæ дæр сæ арын иумæйаг æвзаг, алчи дæр мæм сæ дары хорз ахаст æмæ уымæй дæр æххæст кæнын æвзонг æмбæстаджы хæстæ.
Æлборты Дзамболат – Хуссар Ирыстоны паддзахадон автоинспекцийы инспектор, милицийы лейтенант.
– Фæсивæды бæрæгбоныл æз дæр æмбæлын хорз æнкъарæнтимæ. Уымæн æмæ ацæугæ аз каст фæдæн уæлдæр милицион скъола, æрыздæхтæн Ирыстонмæ æмæ кусын райдыдтон. Куысты мæ райстой хорз æмæ мæ уый ноджы тынгдæр разæнгард кæны мæ хæстæ хуыздæр æххæст кæнынмæ. Куыд фæзæгъынц, дарддæр ахуыр кæныны хъуыддаджы мæ дзул лæвæрд нæма фæцис, фæнд кæнын милицийы академимæ. Мæ бæллиц æххæст куы æрцæуа, уæд мæ бон æнцонæй зæгъын у, æмæ цасдæрбæрцæй бæрзонд кæй хæцын нæ фæсивæд, Ирыстоны кадыл. Ирыстоны алы æвзонг æмбæстагæн дæр бæрæгбоны цытæн арфæ кæнын æмæ сын мæ зæрдæ зæгъы, цæмæй цыфæнды хъуыддаджы дæр дардыл хъуысой æрмæстдæр сæ хорзы æмæ æнтыстыты кæйттæ.
Банысан кæнын ма мæ фæнды уый дæр, æмæ уæлдæр милицион скъола каст фæдæн не ‘мзæххонтæ Чехойты Мансур, Икъаты Инал æмæ Коцты Владиславимæ. Уыдон дæр сæ ахаст æмæ архайдæй сты раппæлинаг. Кусæм иумæ æмæ æрвылбон дæр æнтысгæйæ æххæст кæнæм нæ разыллæуæг хæстæ.
Иуæй-иу æрыгæттæн та мæ зæгъын фæнды уый, æмæ цард иу ран нæ лæууы, æппынæдзух тындзы размæ æмæ дæ абоны аразинæгтæ арæзт куы нæ æрцæуой, уæд сыл райсом нал фæтых уыдзынæ. Уый тыххæй алы æвзонг æмбæстаг дæр хъуамæ архайа ууыл, цæмæй йæ царды иу бон дæр ма фæуа æнæхъуаджы.
ГÆЗЗАТЫ Иван
Comments are closed, but trackbacks and pingbacks are open.