15-æм æмæ 16-æм апрелы Куадзæны бæрæгбонон мадзæлтты рæстæджы барадхъахъхъæнæг органтæ кусдзысты фæтыхджындæргонд куысты режимы. Кувæндæтты æмæ ма мадзæлттæ кæм цæудзысты, уымыты æхсæнадон фæтк æмæ сабырдзинад хъахъхъæндзысты мидхъуыддæгты органты кусджытæ.
15-æм апрелы изæры 8 сахатæй фæстæмæ фæндагон змæлды æдасдзинады инспекци æрæхгæндзысты Мады Майрæмы аргъуанмæ ‘ввахс Ирæтты, Сомихæгты æмæ Донбылгæрон уынгтæ. Ӕртæиууон Хуыцауы аргъуанмæ ‘ввахс дæр Джиоты Аланы проспект æхгæд æрцæудзæнис мадзæлтты фæудмæ.
Саперон-инженерон хайады кусджытæ развæлгъау басгардзысты аргъуантæ æмæ сæ алыварс территоритæ, æмæ ма кæмдæриддæр уагъд цæуой мадзæлттæ, уыцы бынæттæ. Аргъуанты фæзуæттæм бахизæнты бакæндзысты контролон-уадзæн пункттæ æмæ металлодетектортæй пайда кæндзысты, цæмæй тæссаг предметтæ мачи бахæсса.
16-æм апрелы райсомы 11 сахатæй фæстæмæ Згъудеры уæлмæрдмæ схизæны æмæ Цхинвалы 5-æм скъоламæ æввахс службæ хæсдзысты патрулон экипажтæ. Стационарон постыты фæфылдæр кæндзысты службæхæсджыты нымæц æмæ милицийы патрулон экипажтæ та уæлдай хъусдард здахдзысты, бæрæгбонон мадзæлттæ кæм цæудзысты, уырдæм.
ДЖИОТЫ Алыксандр
