Цхинвалы районы администрацийы адӕмон ахуырады хайад хыгъдон рӕстӕджы бакодта бӕрӕг куыст, уыдон цыдысты скъолатӕм ӕмӕ сын дарддӕр кодтой методикон ӕххуыс. Ӕвзонг специалисттимӕ арӕзт ӕрцыд куысты график.
Комплексон ацыды рӕстӕджы методисттӕ басгарынц: программӕты уӕвындзинад, тематикон ӕмӕ уроктӕ уадзыны плӕнттӕ, ахуыргӕнæн æрмæджытæй ифтонгдзинад, фыссыны куыстыты хуызтӕ ӕмӕ нормӕтӕ ӕххӕст кӕнын, ахуыргӕнинӕгты зонындзинӕдтӕ ӕмӕ ахуыр фӕразондзинады ӕмвӕзад. Ахуыры азы дӕргъы скъолаты уагъд цыдысты контролон куыстытӕ, олимпиадӕтӕ, фронталон бафарстытӕ ӕппӕт ахуыргӕнӕн дисциплинӕ-тӕй. Уыдӕттӕ уымӕн, цӕмӕй рабӕрӕг чындӕуыдаид ахуырдзауты зонындзинӕдты гъӕд ӕмӕ рацӕугӕ ӕрмӕг куыд бахъуыды кодтой. Арӕзт ӕрцыдысты предметон олим-пиадӕтӕ уадзыны тесттӕ ӕмӕ республикон олимпиадӕмӕ кандидаттӕ равзарын. Ахуыры азы райдианы РХИ-йы Ахуырад ӕмӕ зонады ми-нистрадӕй райстӕуыд ӕмӕ дихгонд ӕрцыдысты ног ахуыргӕнӕн чингуытӕ, афтӕ ма программӕтӕ ӕмӕ методикон рекомендацитӕ ирон ӕвзаг ӕмӕ литературӕйӕ. Районы ахуырдзаутӕ активон хайад райстой къласӕн ӕмӕ скъолайӕн ӕддейӕ мадзӕлтты куыд районы, афтӕ республикæйы фӕлгӕтты дӕр.
Ауагъдгонд мадзӕлттӕн арӕзт ӕрцыдысты ӕмбӕлон плӕнттӕ ӕмӕ сценаритӕ. Скъолаты ахуыргӕнджытӕ ӕмӕ ахуыргӕнинӕгтӕ бацӕттӕ кодтой ӕмӕ ауагътой тематикон бӕрӕгбонтӕ: Республикӕйы тырысайы бон, Республикӕ расидыны бон, Фыдыбӕстӕ хъахъхъӕнӕджы бон. 15-ӕм майы республикӕйы нысан кодтой Ирон ӕвзаджы бон ӕмӕ скъолаты се ‘ппӕты дӕр уагъд ӕрцыдысты гом уроктӕ ӕмӕ поэзийы изӕртӕ. 2019 азы расидт ӕрцыд Къостайы азӕй ӕмӕ алы ахуыргӕнӕн уагдоны дӕр развӕлгъау бацӕттӕ кодтой мадзӕлтты план, ауагъдӕуыд гом уроктӕ. Республикон фӕлгӕтты мадзӕлттӕ уагъ ӕрцыдысты Къостайыхъӕу ӕмӕ Дменисы астӕуккаг скъолаты, уырдӕм фӕхуыдтой Ахуырады министрады минӕвӕртты, фысджыты, «Стыр ныхас»-ы змӕлды уӕнгты ӕмӕ горӕт Цхинвалы ирон ӕвзаг ӕмӕ литературӕйы ахуыргӕнджыты. Сӕххӕст 150 азы Д. И. Менделеевы химикон элементты периодикон таблицӕйыл ӕмӕ уӕлдӕр загъдгонд астӕуккаг скъолаты ацы зӕрдылдарӕн цауы тыххӕй ауагъдӕуыд цымыдисон мадзӕлттӕ. Аивгъуыйгӕ азы скъолатӕн се ‘ппӕты дӕр уагъд ӕрцыдысты техникон фӕлындзынад, стӕй ма полилингвалон системӕйы ахуыры тыххӕй ахуыргӕнӕн чингуыты хыгъд. Ахуыры азы дӕргъы скъолаты ахуырдзаутӕ хуыцаубонты цыдысты Сывӕллӕтты сфӕлдыстадон галуанмӕ ӕмӕ сын уагътой ахуыртӕ ахӕм темӕйӕ: «Дунейыл афӕлгӕст». Республикон конкурс «Зонды къуыбар»-ы Тъбеты ӕнӕххӕст астӕуккаг скъолайы ахуыргӕнинаг Бибылты Ацӕмӕз сси уӕлахиздзау ӕмӕ хорзӕхджын ӕрцыд грамотӕ, сертификат ӕмӕ зӕрдылдарӕн лӕвӕрттӕй. Зӕрдӕйӕн ӕхсызгон у, Къостайыхъӕуы астӕуккаг скъолайы цур аивадон скъола-студийы ахуыргӕнинӕгты ӕнтысты. Уыдон активон хайад райсынц куыд республикон, афтӕ уымӕн ӕддейӕ дӕр алыгъуызон равдыстыты ӕмӕ бирӕ хӕттыты систы ӕхсӕнадӕмон конкурсты лауреаттӕ.
Дменисы скъолайы ахуыргӕнинӕгтӕ хайад райстой ӕфсӕддон-спортивон хъазт «Зарница»-йы, уымӕн йӕ дыккаг этап та уыдзӕн 2020 азы уалдзӕджы. Республикон театрализацигонд ӕркаст «Мир сказки»-йы Дменисы минӕвӕрттӕ фӕстӕ нӕ фӕлӕууыдысты ӕмӕ систы «Хуыздӕр декораци»-йы призы аккаг.
Районы 16 ахуыргӕнӕджы ӕнтысгӕйӕ ацыдысты радон аттестацийы. Хайад бӕрӕг куыст бакодта ӕмӕ фӕдзӕхста барадхалджыты, ӕнахъомты ‘хсӕн уагътой профилактикон мадзӕлттӕ ӕмӕ рабӕрӕг сты, скъолаты фӕтк чи хӕлдта, ахӕмтӕ. Беседӕтӕ уагъдӕуыд зынхъомылгӕнӕн сывӕллӕтты ныййарджытимӕ.
РХИ-йы Ахуырады министрады бахӕсмӕ гӕсгӕ Мӕскуымӕ арвыстой дыууӕ ахуырдзауы ногазон бӕрӕгбон ӕмӕ Сывӕллӕтты хъахъхъӕныны Ӕхсӕнадӕмон боны хайад райсыны тыххӕй. Иумӕйагахуырадон скъолаты ахуыргӕнджытӕ систематикон ӕгъдауӕй ӕрвыст цыдысты квалификаци фӕбӕрзонддӕр кӕныны курсытӕм.
Кӕй зӕгъын ӕй хъӕуы, районы скъолаты куысты ис бӕрӕг ӕнтыстытӕ, фӕлӕ дзы нырма ис цухдзинӕдтӕ дæр. Уыдон аиуварс кӕныныл та хъуамӕ бакусой куыд иумӕйагахуырадон уагдӕтты къухдариуӕггӕнджытӕ, афтӕ хайады кусджытӕ дӕр. Куыд уымӕй размӕ азты, афтӕ ныр дӕр республикон предметон олимпиадӕйы хайад райста ӕрмӕстдӕр Рустауы астӕуккаг скъолайы ахуыргӕнинаг Кокойты Ланӕ ирон ӕвзаг ӕмӕ литературӕйӕ, кӕцыйӕн лӕвӕрд ӕрцыд дыккаг къӕпхӕны диплом. Хъыгаг у, республикон олимпиадӕйы фӕстиуджытӕ районы ахуыргӕнинӕгтӕн кӕй сты мӕгуырау. Уымӕ гӕсгӕ скъолаты къухдариуӕггӕнджытӕ сӕ хъусдард хъуамӕ тынгдӕр аздахой ӕмӕ олимпиадӕтӕм хайад исынмӕ кӕной, ӕрмӕстдӕр хорз ӕмӕ иттӕг хӕрзтыл чи ахуыр кӕны, уыцы ахуыргӕнинӕгты. Уымӕй дарддӕр ма скъолаты нӕй химийы кабинеттӕ, нӕй сӕм химийы фӕлтӕрӕнтӕ уадзыны тыххӕй реактивтӕ, стӕй цӕстуынгӕ ӕрмӕджытӕ ирон, уырыссаг ӕмӕ англисаг ӕвзӕгтӕн. Спортивон зал ис ӕрмӕстдӕр Къостайыхъӕуы астӕуккаг скъолайы, иннӕ ахуыргӕнӕн уагдӕтты кӕнӕ не сты кӕнӕ та дзуапп нӕ дӕттынц абоны домӕнтӕн. Алы аз дӕр районы ахуырдзауты нымӕц кӕны къаддæр ӕмӕ афтӕ куы ахӕсса, уӕд скъолаты нымӕц дӕр зынгӕ фӕкъаддӕр уыдзӕн.
ХУЫБИАТЫ Никъала
Comments are closed, but trackbacks and pingbacks are open.