Фосы нымæц, се ‘нæниздзинад æмæ стæй сæ продуктивондзинад рæзын кæнын канд сæ хицауæй кæнгæ нæ вæййы, фæлæ ма ветеринарон кусджыты архайдыл дæр. Уый сæ зæрдыл дарынц Знауыры районы ветслужбæйы кусджытæ æмæ кæддæриддæр сæ хъус дарынц цæрджыты фосы æнæниздзинадмæ. Уыдон рæстæгæй-рæстæгмæ фосæн бакæнынц æмбæлон ветеринарон æххуыс æмæ сæ уымæ гæсгæ æмбæстæгтæ сты райгонд.
Алы куыстуаты размæцыд дæр фылдæр кæнгæ вæййы сæргълæууæджы æмбæлон æмæ арæхстджын разамындæй. Ахæм у фосы низты ныхмæ тох кæныны станцы хистæр Хъотайты Æхсар. Уый 1977 азæй фæстæмæ кæны ацы куыст, дæргъвæтин азты фæстиуæгæн райста фаг фæлтæрддзинад, куыстмæ у æнæзивæг æмæ йæ дæлбаруæвæг ветеринартæй дæр домы ахæм ахаст.
Районы æдæппæт ис 16 ветеринары, уыдон дих сты хицæн æмæ хицæн хъæутыл æмæ сæ алчи дæр фосы æнæниздзинадмæ дары æмбæлон хъусдард. Ахæм намысджын кусджытæ сты Козаты Зауыр, Зассеты Дауыт, Уанеты Федося, Гатыгкоты Зорик, Тъотъоты Наирæ, Дзæгъиаты Феня æмæ иннæтæ. Хъотайы фырт куыд банысан кодта, афтæмæй ацы бонты вакцинаци кæнынц эмкар низы ныхмæ. Ацы низ у тынг тæссаг, бахæцы æвзонг стуртыл æмæ сын рæстæгыл судзин арæзт куынæ æрцæуа, уæд нал фервæзынц. Уымæ гæсгæ ветеринарон кусджытæ тагъд кæнынц уыдонæн судзинтæ саразыныл. Районы æвзонг стуртæн сæ нымæц хæццæ кæны 1000 æввахс. Фылдæр фос та дарынц Мамиты Альберт, Тедеты Махар, Илакъ æмæ æндæртæ. Дарддæр ма низты ныхмæ вакцинатæ араздзысты пастереллез, сыбираг хъæдгомы ныхмæ. Сæйраг ветдохтыр банысан кодта, хъæууон хæдзарады министрад сын рæстæгыл æмбæлон хостæ кæй радих кодта.
ХУЫБИАТЫ Никъала
