Хуссарирыстойнаг спортсментæ æртæ майданы рамбылдтой армрестлингæй РЦИ-Аланийы чемпионаты. Иуазон паузæйы фæстæ та йæ спортивон карьерæ сног кодта Гасситы Сослан æмæ та йын ногæй аккаг ныхмæлæууæг нæ разынд. Сослан сыгъзæрин майдан рамбылдта 110 кг уæзы категорийы. Ацы уæзы æртыккаг та ссис Бететы Алан.
Цхинвалмæ ма сыгъзæрин майданимæ æрыздæхт Хæбæлаты Арсен. Уый та иууыл цæттæдæр разынд 80 кг уæзы категорийы.
Спортсменты бацæттæ кодта тренер Джиоты Валери.
ФУТБОЛ
Дзæуджыхъæуы футболон командæ «Алани» Турчы цæттæгæнæн сборты акодта дыккаг контролон хъазт. Ныр та алайнæгтæ фембæлдысты казахстайнаг «Тобол»-имæ. 39-æм минутыл хыгъд байгом кодтой казахстайнæгтæ æмæ ууыл ахицæн хыгъд. Афтæмæй «Алани» фæхæрд дыккаг контролон хъазты. Раздæр ма ахæм хыгъдæй фембылд узбекаг клуб «Насаф»-æн.
ДЗЮДО
Ног сезоны дзюдойæ «Гран-при»-йы фыццаг турнир уагъд æрцæудзæн португалиаг Одивелашы. Уым 100 кг уæзы категорийы хайад райсдзæн ирон спортсмен, Европæ æмæ дунейы чемпион Тасойты Инал.
Ерысты æдæппæт хайад райсдзысты 89 бæстæйæ 640 дзюдоисты.
ХУРИТЫ Батрадз
