Радон фембæлд Ергнеты
Инциденттæ ма æруадзын æмæ сæм хъусдард здахыны фæдыл механизмты фæлгæтты фембæлды рæстæджы уынаффæ цыд ацы форматы фæстаг фембæлдæй фæстæмæ Республикæ Хуссар Ирыстон æмæ Гуырдзыстонимæ æмарæн территоритыл æрцæугæ цаутимæ баст фарстатыл. Механизмты фæлгæтты фембæлдтытæ уагъд цæуынц Хуссар Ирыстон, Гуырдзыстон, Уæрæсе æмæ Евроцæдисы æмæ ЕÆÆО-йы мисситы хъусдарджыты хайадистæй.
Куыд зонæм, уымæ гæсгæ ацы форматы фембæлдтытæ уагъд цæуынц æнæ информацион фæрæзты хайадистæй. Фембæлды боны фæтк æмæ йын хатдзæгтæ аразгæйæ, Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ-йы Президенты æххæстбарджын минæвары хæдивæг Коцты Егор афтæ радзырдта, зæгъгæ, хуссарирыстойнаг фарс радон хатт бацамыдта, цæмæй Хуссар Ирыстоны территорийыл Уистæйы хъæуы цы æнæзакъонон гуырдзиаг полициæгты пост ис, уый уырдыгæй иуварс æрцæуа.
Куыд банысан кодта, уымæ гæсгæ механизмты фæлгæтты фæстаг фембæлдæй фæстæмæ ацы постимæ баст инцидент хынцыд не ‘рцыд, фæлæ уый нæ нысан кæны, æмæ хуссарирыстойнаг фарс ацы фарст рæгъмæ нал рахæсдзæн, уый нæ фæлæ æппынæдзух амоны гуырдзиаг æмæ дунеон организациты минæвæрттæн, цæмæй пост уырдыгæй ист æрцæуа.
Арæнтыл фæтк халынц гуырдзиаг æмбæстæгтæ
Механизмты радон фембæлды рæстæджы Хуссар Ирыстоны делегаци ногæй рæгъмæ рахаста, Гуырдзыстоны æмбæстæгтæ паддзахадон арæнты фæтк кæй халынц, уыцы фарст.
«Уый фылдæр хатт вæййы кæнæ арæнтæ кæуылты цæуынц, уый кæй нæ фæзонынц, кæнæ та нозтджын вæййынц. Ахæм рæстæджы гуманон ахаст æвдыст æрцæуы, фæткхалджытæ ивар цæуынц æмæ сæ республикæйæн æддæмæ арвитынц. Кæд æмæ арæны фæткхалæгмæ контрабандæ кæнæ наркотикон фæрæзтæ ссардæуы, уæд уыдон тыххæй конд æрцæуы уголовон хъуыддаг æмæ сыл тæрхон цæуы», – банысан кодта уый.
Фембæлды рæстæджы хуссарирыстойнаг фарс раразмæ кодта, Евроцæдисы миссийы хъусдарджытæ паддзахадон арæнтæ кæй ма хъуамæ халой, уыцы фарст. Азы райдианæй Евроцæдисы хъусдарджытæ цалдæр хатты фехæлдтой арæнтыл хизыны фæтк. Уыцы цаутæ хынцыд æрцыдысты Хуссар Ирыстоны фарсæрдыгæй. Ацы миссийы ног сæргълæууæг Патриция Бугани ныфс бавæрдта, æмбæлон мадзæлттæ ист кæй æрцæудзæн æмæ дарддæр уыцы фæткхалæн цаутæ уагъд кæй нал æрцæудзысты.
Æнæпилотон тæхæн аппараттæ дæр халынц уæлдæфон тыгъдад
Ацы фарст дæр уынаффæмæ рахаста механизмты фæлгæтты хуссарирыстойнаг фарс. Хуссар Ирыстонæй делегацийы сæргълæууæг куыд банысан кодта, уымæ гæсгæ тæхæн аппараттæ кæй сты, уый сбæрæг кæнын алы хатт къухты нæ бафты. Гуырдзиаг фарс сæ хуссарирыстойнаг æнæпилотон тæхæн аппараттæ хоны, фæлæ Хуссар Ирыстонмæ ис факттæ, Гуырдзыстоны тæхæн аппараттæ кæй сты, уый фæдыл.
Донхæры донæй ифтонгад
Коцты Егор куыд банысан кодта, уымæ гæсгæ Инциденттæ ма æруадзын æмæ сæм хъусдард здахыны фæдыл механизмты фæлгæтты 26 апрелы уагъд æрцыд техникон фембæлд, цыран уынаффæ цыд Тирипоны къанауы донхæры дон дæттыны фарстыл.
Уыцы бадзырдты руаджы Цъинагары зонæйы алфæмблай – Орчъосан æмæ Абреуы хъæуты цæрджытæ дæр истой донхæры дон. Уыцы фарст фембæлды рæстæджы сног æмæ хуссарирыстойнаг фарс цæттæ у донхæры донæй гуырдзиаг фарсы сифтонг кæнынмæ, гуырдзиаг фарс та йæ райсынмæ у цæттæ.
Механизмты фæлгæтты радон фембæлд уагъд æрцæудзæн 23 июлы.
Нæ уацх.
ИА Рес-æй ист къам
