Хуссар Ирыстон æмæ Гуырдзыстоны арæнтæм хæстæг цæрæн пункт Эргнеты уагъд æрцыд Инциденттæ ма æруадзын æмæ сæм хъусдард здахыны фæдыл механизмты форматы радон фембæлд. Бæрæг куыд у, уымæ гæсгæ механизмты фæлгæтты фембæлдтытæ уагъд цæуынц Фæскавказы æдасдзинады фæдыл Женевæйы дискусситы фæлгæтты. Хайад дзы исынц Хуссар Ирыстон, Уæрæсе, Гуырдзыстон, æмæ дунеон организацитæ – Евроцæдис æмæ ЕÆÆО-йы минæвæрттæ.
Традицимæ гæсгæ фембæлды уынаффæ цæуы æдасдзинады фарстытыл, механизмты фæстаг фембæлдæй фæстæмæ паддзахадон арæнтæ халыны цауты статистикæйыл æмæ, кæй зæгъын æй хъæуы, Знауыры районы Уисты хъæуы цы гуырдзиаг æнæзакъонон полициæгты пост ис, уый аиуварс кæнын.
Механизмты фæлгæтты хуссарирыстойнаг делегацийы сæргълæууæг, Фæсконфликтон фарстатæ бæстон кæныны фæдыл РХИ-йы Президенты Æххæстбарджын минæвары хæдивæг Коцты Егор фембæлдæн хатдзæгтæ аразгæйæ банысан кодта, зæгъгæ, Хуссар Ирыстоны территорийæ гуырдзиаг полициæгты пост аиуварс кæныны фарсты фæдыл нырма къухты ницы уадиссаг æнтыстытæ æфты.
Уисты хъæуæй ацы æнæзакъонон пост аиуварс кæныны фарст æппынæдзух механизмты рабадты хаст æрцæуы фыццæгтæм. Йæ бынатæй кæд не ‘ггуырсы, уæддæр ыл цæуы куыст æппынæдзух æмæ йыл дарддæр дæр цæудзæн.
Куыд банысан кодта, афтæмæй хуссарирыстойнаг фарс домдзæн Хуссар Ирыстоны территорийæ гуырдзиаг полициæгты пост аиуварс кæнын.
Хæлд цæуынц паддзахадон арæнтæ
Хуссар Ирыстонæй делегацийы сæргълæууæг куыд радзырдта, уымæ гæсгæ стабилондзинад æмæ æдасдзинады сæйраг гаранти у – Хуссар Ирыстон æмæ Гуырдзыстоны æхсæн паддзахадон арæнты кæуылты цæуынц, уый сбæлвырд кæныны хъуыддаг.
Механизмты фæлгæтты хуссарирыстойнаг фарс радон хатт æрсидт Гуырдзыстоны минæвæрттæм, цæмæй æрбадой бадзырдон фынджы уæлхъус æмæ æруынаффæ кæной, паддзахадон арæнтæ кæуылты цæуынц, уыцы ахсджиаг фарстыл. Кæд æмæ, зæгъгæ, искæй зæрдæмæ нæ цæуынц политикон терминтæ «делимитаци» æмæ уый фæстæ та «демаркаци», уæд уал мах нырма цæттæ стæм арæнты хаххыл æруынаффæ кæнын, картæйыл банысан кæнын кæй территори кæм æмæ куыд цæуы, уыдæттыл.
«Фæлæ гуырдзиаг фарс иу фембæлдæй иннæ фембæлдмæ цæлхдуртæ æвæры ацы фарсты раз, ома йæ Хуссар Ирыстоны фарс политизаци кæны. Æмæ хъуыддагæй та Хуссар Ирыстон æмæ Гуырдзыстоны æхсæн паддзахадон арæнты хахх сбæлвырд кæнын у стабилондзинад æмæ æдасдзинадмæ комкоммæ фæндаг», – банысан кодта Егор.
Фæфылдæр сты паддзахадон арæнты фæткхалджытæ
Механизмты фæстаг фембæлдæй фæстæмæ Хуссар Ирыстон æмæ Гуырдзыстонимæ паддзахадон арæнты фæткхалæн цæуты нымæц фæфылдæр.
Коцты Егоры ныхæстæм гæсгæ фæстаг фембæлды рæстæджы нысан æрцыд арæнтæ халыны цаутæ кæй фæкъаддæр сты, уый.
«Хъыгагæн, уыцы тенденци нæ адарддæр – февралы æмбисæй фæстæмæ хынцыд æрцыд бирæ фæткхалæн цаутæ Гуырдзыстоны ‘рдыгæй. Уыцы нымæцы гуырдзиаг полициæгты ‘рдыгæй дæр. Уыд ахæм цаутæ дæр, æмæ Хуссар Ирыстоны территоримæ полициæгты минæвæрттæ æрбаввахс сты дæс метры дæрддзæгæн æмæ фæстæмæ аздæхтысты», – банысан кодта делегацийы сæргълæууæг.
Хуссар Ирыстоны делегаци гуырдзиаг фарсæн бацамыдта, цæмæй паддзахадон арæнтæ халыны ахæм æнгæс цаутæ мауал æруадзой.
Уымæй дарддæр ма нæй гæнæн, æмæ Евроцæдисы хъусдарджыты миссийы кусджытæ арæнтæм æввахс лæууой. Радон хатт бамбарынчындæуыд фæрстæн, хаттæй хатт арæнгæрон быру кæй хонынц, уыцы санитарон быру арæнтæ кæуылты цæуынц, уыцы хахх нæу. Ныхасгæнæг куыд банысан кодта, афтæмæй арæнтыл хицæн бынæтты уыцы быру ис Хуссар Ирыстоны территорийæ 10 -50 метры мидæгдæр.
«Уыдон сты нæ паддзахадон арæнтæ аразыны фæдыл техникон арæзтæдтæ æмæ сæм нæ хъус хъуамæ дарæм. Æмæ цæмæй дыууæ фарсæрдыгæй дæр уыдонмæ персонал сæ хъус дарой, уый тыххæй арæзт цæуы арæны хаххæй чысыл мидæгдæр ахизæн», – дзырдта уый.
Коцты Егор ма куыд радзырдта, уымæ гæсгæ хæлд æрцыд уæлдæфон тыгъдад æнæпилотон тæхæн аппараты руаджы. Уый тыххæй «тæвд хаххы» руаджы гуырдзиаг фарс фидар кодта, ома аппарат æрбатахт Хуссар Ирыстоны территорийæ.
«Хъуыддаг уый мидæг ис, æмæ мах ахæм информаци куы дæттæм, уæд минутгай фыссæм кæцырдæм тæхы аппарат, йæ курс, цы бæрзæнды тæхы æмæ фæстæмæ куыд атæхы. Уыцы хъуыддæгтæ нæ бахынцы гуырдзиаг фарс.
Уыцы тæхæн аппарат рахызт Гуырдзыстоны арæнтыл территорийæ æмæ аздæхт фæстæмæ. Хуссар Ирыстоны уæлдæфон тыгъдады бирæ рæстæг нæ уыд, мидæмæ дæр уадиссаг не ‘рбатахт æмæ нæ республикæйæн ницы разиан кодта», – банысан кодта уый.
Коцты Егор ма куыд банысан кодта, уымæ гæсгæ механизмты фæлгæтты радон фембæлды агъоммæ ма уагъд æрцæудзæн техникон фембæлд апрелы мæйы кæрон. Уым дзырд цæудзæн Тирипоны донæры доны къанауы фарстыл. Механизмты фæлгæтты радон фембæлд та нысан æрцыд 16 маймæ.
КЪÆБУЛТЫ Маринæ
