Цалдæр боны размæ куыд Уæрæсейы, афтæ Хуссар Ирыстоны дæр цытджын æгъдауæй банысан кодтой Фыдыбæстæ хъахъхъæнæджы бон. Уæрæсе нæ дыккаг Райгуырæн бæстæ кæй у, уымæ гæсгæ мæ абон мæ  уацы  æрдзурын фæнды, ацы аз 3-æм февралы Сирийы уæрæсейаг майор цы стыр хъайтардзинад равдыста, уый тыххæй. Уый йæ диссаджы æхсардзинадæй дисы баппæрста æнæхъæн дунейы. Æгæрыстæмæй, УФ-йы Фæсарæйнаг хъуыддæгты министр Сергей Лавров Сербийы кусæгон балцы куы уыд, уæд ын ацы бæстæйы президент Александр Вучич фехъусын кодта, зæгъгæ, йæ адæмы номæй фыстæг ныффыста Роман Филиповы бинонтæм. Фыстæджы дзырдæуыд, зæгъгæ, уæрæсейаг тæхæджы сгуыхтдзинад дисы баппæрста сербиаг адæмы.  Уæрæсейы ахæм хъайтартæ бирæ кæй ис, уый фæдыл йæ хæлæгдзинад равдыста польшæйаг политолог Томаш Мацейчук дæр, кæцы æппынæдзух дзуры Уæрæсейы ныхмæ.  Филиповы адресыл æппæлæн ныхæстæ нæ бавгъау кодтой, æгæрыстæмæй, америкæйæгтæй  дæр бирæтæ. Уæрæсейы йæ абарстой Мотросовимæ, уый  дыккаг Мотросов у, зæгъгæ.

Уыцы бон, 3-æм февралы «Идлиб»-ы деэскалацийы зонæйы æхстытæ æруромыны режимыл контроль кæныны тыххæй атахт æххæст кæнгæйæ, майор Роман Филипов цы штурмовик “Су-25 СМ”-ыл тахт, уый террористтæ фехстой хæсгæ зенитон ракетон комплексæй æмæ майоры бахъуыд скатапультикаци кæнын. Парашютыл йæхи зæхмæ куы æрцæйуагъта, уæд æй террористтæ райдыдтой  æхсын. 33 аздзыд Романæн йæ бон бацис æрбадын, фæлæ знаджы территорийыл. Æрæмбæхст  æмæ йæ уавæры тыххæй  фехъусын кодта Хмеймимы агурæн-ирвæзынгæнæн службæмæ. Цыдæр рæстæджы тæхæг æхста террористты, æрмæстдæр æм пистолет уыд, афтæмæй. Фæлæ йæ фæстагмæ бахъуыд йæхи гранатæйæ спырх кæнын. Уый знæгтæм амынæты бахауыны бæсты хуыздæрæн равзæрста кадимæ амæлын. Гранатæйы срæмыгъды фæстиуæгæн ма йæхицæй дарддæр фæмард сты, æввахс æм цы цалдæр боевикы бацыдысты, уыдон дæр.

Роман Филиповы мард буар æрластой Уæрæсемæ æмæ  8-æм февралы æфсæддон цытимæ ныгæд æрцыд йæ райгуырæн горæт Воронежы Кады аллеяйы.

Æвзонг майорæн йæ амæлæты фæстæ лæвæрд æрцыд Уæрæсейы Федерацийы Хъайтары ном. Калининград æмæ Владивостокы йæ номыл схондзысты уынгтæ, Воронежы цы астæуккаг скъолайы ахуыр кодта, уый хæсдзæн Роман Филиповы ном. Ацы æвзонг хъайтары сгуыхтдзинадимæ базонгæйæ, мæ зæрдыл æрлæууыдысты фыссæг Николай Островскийы ныхæстæ  «Человеку жизнь дается один раз и надо прожить ее так, чтобы не было мучительно больно за бесцельно прожитые годы, чтобы умирая мог сказать, что все силы и знания были отданы самому прекрасному на свете – борьбе за освобождение человечества». Советон Цæдисы рæстæджы фыссæджы ацы ныхæстæ зыдта алкæцы фæскомцæдисон дæр. Алы советон скъоладзау дæр зыдта  литературон хъайтар Павел Корчагины, кæцыйы ном хастой ногдзауты æмæ фæскомцæдисон къордтæ æмæ дружинæтæ. Æмæ æрмæст литературон хъайтартыл нæ хъомыл кодтой уæды æвзонг фæлтæртæ. 70-æм азты Дзауы  скъола-интернаты  куы ахуыр кодтон, уæд скъолайы фыццаг уæладзыджы къулыл конд уыдысты Стыр Фыдыбæстæйон хæсты рæстæджы хъайтардзинд чи равдыста, уыцы æвзонг лæппутæ æмæ чызджыты нывтæ. Мах иууылдæр зыдтам Зоя Космедемянская, Любовь Шевцова, Олег Кошевой,  Лиза Чайкина,   Павлик Морозов, Сергей Тюленин, ногдзау-хъайтар  Марат Козейы æмæ æндæрты нæмттæ æмæ се сгуыхтдзинæдты тыххæй.…  Уыдон скъола-интернаты ахуыргæнинæгтæн уыдысты хъайтардзинады ирд цæвиттонтæ. Ахæм бон нæ уыдаид æмæ-иу мах æвзонг хъайтарты нывты раз ма алæууыдаиккам. Уыдон нæм кастысты уæларвон зæдты хуызæн æмæ цæрæнбонтæм нæ зæрдæты аккаг бынат ссардтой. Уæд мæм афтæ каст цыма æрмæстдæр ацы æвзонг адæймæгтæн бауыдаид сæ бон ахæм хъайтардзинæдтæ равдисын æмæ сын сæ хъайтардзинад ничиуал сфæлхатт кæндзæн. Фæлæ рæдыдтæн, абон къаддæр хъайтардзинад нæ равдыстой Роман Филипов æмæ бирæ æндæр адæймæгтæ.

Гуырдзиаг-ирон ныхмæлæуды рæстæджы куыд фæбæрæг, афтæмæй къаддæр æхсардзинад нæ равдыстой ирон лæппутæ дæр. Сæрбахъуыды рæстæджы уыдон дæр фæстæ ницæмæй фæлæууыдысты гуырдзиаг тыхæйисджыты ныхмæ тох кæнгæйæ. Советон дуджы рæстæджы хъуыды дæр никуы ничи акодтаид, зæгъгæ, рацæудзæн цалдæр дæс азы æмæ нæ райгуырæн Хуссар Ирыстоны хъахъ-хъæнджытæ дæр æвдисдзысты хъæбатырдзинады  ахæм диссæгтæ. Бирæ ирон цардбæллон лæппутæ бабын сты сæ радтæг Ирыстоны сæраппонд. Уыдонæй кæд бирæтæ знæгтæм удæгасæй бахаудтой, уæддæр сæ никæйы басастой, кæд сын стыр хъизæмæрттæ æвзарын кодтой, уæддæр. Цæвиттонæн æр-хæсдзынæн Санахъоты Гришикы. Ацы цардбæллон хъæбул йæ фæстаг сулæфты онг дæр йæ дзыхыдзаг хъæр кодта, «æз ирон дæн», зæгъгæ. Кæд ын æнахуыр фыдмитæ фæкодтой, уæддæр йæ радтæг адæмы, йæ Ирыстоны сæрвæлтау равзæрста кады мæлæт. Æмæ цал æмæ цал цæвиттонæн æрхæссæн ис.

Уæдæ диссагæн дзуринаг куыннæ у Джиоты Владикы (Басмачы) хъæбатырдзинад дæр. Уый айнæг хохау иунæгæй тохы бацыд дæсгай гуырдзиæгты ныхмæ æмæ сæрыстырæй йæ цард нывондæн æрхаста йæ райгуырæн Ирыстоны сæрвæлтау. Диссагæн дзуринаг не сты 2008 азы августы æнæмсæр тугуарæн хæсты рæстæджы Багаты Амиран æмæ Джиоты Азæмæты хъæбатырдзинæдтæ. Уыдон дыууæйæ æрлæууыдысты гуырдзиаг тыхæйисджыты танкæты раз æмæ сæ цасдæр рæстæджы не ‘рбауагътой гортæмæ æрбахизын. Уыдон дæр хъæбатырæй сæ мæлæт ссардтой сæ Райгуырæн Ирыстоны сæраппонд. Уæдæ Джиджджойты Джетæ иунæгæй, гуырдзиæгтæ Сталины уынджы кæцы хæдзары æмбæхстысты, уырдæм кæй бацыд, уый дæр хъайтардзинад нæу? Уый йæ кæд æмбæрста фæстæмæ сæрæгасæй, гæнæн ис æмæ мауал рахиза, уæддæр  бабырста уырдæм æмæ уый уыд уымæн дæр Филиповау йæ фæстаг тох. Æмæ чи фæнымайдзæнис ирон лæппутæй стыр хъайтардзинæдтæ чи равдыста, уыдоны.  Бирæ, тынг бирæ сты уыдон, фæлæ иу уацы æрдзурæн нæй алкæйы тыххæй. Сæ хъайтардзинæдты тыххæй уыдоны никуы ферох кæндзысты сæ радтæг адæм.

Джиоты Екатеринæ

Comments are closed, but trackbacks and pingbacks are open.