2-æм сентябры РХИ-йы Парламенты Сæрдар Бибылты Анатолийæн фемæблд уыд Цхинвалы горæтон æмæ районон поликлиникæты коллективтимæ. Ацы медицинон уагдæтты кусджытимæ ныхас кæныны рæстæджы РХИ-йы Парламенты Сæрдар æрæмбырдуæвджытæн загъта, цæмæй йæм радтой, цы фарстытæ сæ цымыдис кæнынц, уыдон, афтæ ма йын сæ хъуыдытæ зæгъой, цы цæуы, уый тыххæй. Бибылты Анатоли банысан кодта, зæгъгæ, алыхатт дæр цæттæ у алкæмæ дæр байхъусынмæ æмæ сæ цы проблемæтæ тыхсын кæнынц, уыдоныл æруынаффæ кæнынмæ. Куыд рабæрæг, афтæмæй ацы поликлиникæты медицинон персоналтæ катайы бахаудтой кæйдæр интересты тыххæй бæстыхæйттæй сæ иуы ссæрибар кæныны тыххæй поликлиникæты баиу кæныны фæдыл дам-думты тыххæй.

Афтæ ма уыд хъæстытæ дæр иуæй-иу кусджыты кусæгон бартæ хæлд кæй цæуынц, æмæ поликлиникæтæм хауæг уынаффæтæ исыны рæстæджы арæх кусджытæн развæлгъау кæй нæ фехъусын кæнынц, уый тыххæй дæр. Иннæты та тыхсын кодта кусджыты нымæц кæй фæкъаддæр кæндзысты, уыцы фарст æмæ горæтон поликлиникæйы æндæр бынатмæ рахæссыны æмæ куысты график фæивыны фарстытæ нырма æнæбафидаргонд информацимæ гæсгæ. Сæрмагондæй, нысан цыд, зæгъгæ, куы бахъæуа, уæд поликлиникæты персонал цæттæ у райсомы 7 сахатæй изæры 8 сахаты онг кусынмæ, фæлæ фактмæ гæсгæ поликлиникæмæ 3 сахатæй фæстæмæ ничиуал æрбацæуы, уымæ гæсгæ ца-лынмæ исты реформæтæ сплан кæнай, уый размæ сыл хъæуы медицинон уагдæтты коллективтимæ æруынаффæ кæнын. Йæ рады Бибылты Анатоли куыд загъта, уымæ гæсгæ ахæм фарстытæ скъуыддзаг кæнгæйæ, хъæуы æнцой кæнын ахæм æмбарынадтыл куыд куысты эффективондзинад æмæ рационалон организаци, уымæн æмæ дзырд цæуы адæмы интерестыл. Уый æддейæ ма, хъуамæ хъахъхъæд цæуа Фæллойы кодекс æмæ коллективы хъуыды хынцын. Парламенты Сæрдар ма банысан кодта, зæгъгæ, æнæмæнгхъæуæг у сбæрæг кæнын поликлинкæ æндæр ранмæ ахæссын æмæ бæстыхай радтыны тыххæй дам-думтæн исты бындур ис æви нæ, уый. «Кæд æмæ уый раст разына, уæд мах уыдзыстæм категорион æгъдауæй йæ ныхмæ. Районы поликлиникæ дæр хъуамæ уа горæты, уымæн æмæ Цхинвалы район дих кæны дыууæ хайыл, горæт Цхинвалы дыууæ  фарсырдыгæй. Зæгъæм, районы поликлиникæ Къостайыхъæумæ куы ахæссой, уæд Громы хъæуы цæрджыты бахъæудзæн нырма Цхинвалмæ æрцæуын, æмæ уый фæстæ та  Къостайыхъæумæ. Уый дæр уыцы рæстæджы, æмæ транспорт хъæутæм арæх алы сахат нæ фæлæ боны дæргъы иу хатт йеддæмæ куынæ фæцæуы. Цы хъуамæ саразой уæд цæрджытæ? Ахæм фарстыты хъæуы хуымæтæджы адæмы интерестæ хынцын. Уыимæ никæмæн ис бар æмæ коллектив цыран хъуамæ куса, уый сæ бæсты скъуыддзаг кæна», — банысан кодта Бибылты Анатоли.

Кусджыты ахасты фæллойы закъондæттынады халыны факттыл уынаффæ кæнгæйæ, Парламенты Сæрдар равдыста йе нæразыдзинад ахæм практикæйы тыххæй. «Æрæджы æз уыдтæн Луганскы Адæмон Республикæйы æмæ дисы бахаудтæн, уыйбæрц тыхджынæй сæм кусы профцæдисты институт. Профцæдистæ сæ хъус дарынц кусджыты бартæ куыд хъахъхъæд цæуынц, уымæ æмæ уайтагъд ралæууынц фæллойы закъондæттынады бартæ халыны ныхмæ. Цæмæннæ ис гæнæн æмæ Хуссар Ирыстон дæр райса уыцы фæлтæрддзинад? Абон махмæ кæцыфæнды къухдариуæггæнæгæн дæр йæ бон у йæхи фæндонмæ гæсгæ кусæджы куыстæй арвитын, хорз кусæг у æви æвзæр, уымæ нæ кæсгæйæ. Уый категорион æгъдауæй райсинаг нæу.

Нæ республикæйы дæр хъæуы æцæг архайæг профцæдисты институт саразын, кæцыйæн йæ бон уаид кусджыты бартæ бахъахъхъæнын къухдариуæгады ‘рдыгæй æнæбара-дон уынаффæтæ райсыны фæдыл, РХИ-йы Конституцийы æмæ закъондæттынады фыст адæймаджы бартæм гæсгæ. Алы кусæг дæр йæхи хъуамæ æнкъара хъахъхъæдгондæй», — банысан кодта Бибылты Анатоли. Ацы фарстыты йеддæмæ ма, Парламенты Сæрдар горæтон æмæ районон поликлиникæты медицинон персоналтимæ æруынаффæ кодта уыцы уавæрыл, кæцы сæвзæрд гуырдзиаг агрессийы рæстæджы фæцæфуæвджыты, фæмардуæв-джыты бинонты æмæ иуæй-иу æндæр категориты льготон хостæй сифтонг кæныны фарсты тыххæй. Медицинон уагдæтты кусджытæ куыд фехъусын кодтой, уымæ гæсгæ ацы категоритæ цух уыдысты льготон хосты ифтонгадæй. «Уый бынтондæр раст уынаффæ нæу. Мах æрæвæрдзыстæм ацы фарст иууыл серьезон æмвæзадыл», — загъта Бибылты Анатоли.

Дæргъæвтин фембæлды рæстæджы уынаффæ кодтой æндæр актуалон фарстытыл дæр, кæцытæ тыхсын кæнынц горæтон æмæ районон поликлиникæты кусджыты.

РХИ-йы Парламенты информацион-аналитикон управлени

Comments are closed, but trackbacks and pingbacks are open.