Хъæууон фæллойгæнæгæн цæмæй зæрдæйы фæндиаг æнтыстытæ æфта йæ къухты, уый æрмæст йæхицæй кæнгæ нæ вæййы. Цæвиттон, фосдарды къабазы сын фæхъæуы се ‘нæниздзинадмæ хъус дарын, алыхуызон низтæй сæ хъахъхъæнын æмæ сын хос кæнын. Уымæ та сæ хайбавæрд хæссынц ветеринарийы службæйы куыстуарзаг æмæ цæвиттойнаг кустджытæ.
Ацы хъуыддагмæ сæ бавæрд хæссынц Цхинвалы районы ветслужбæйы кусджытæ дæр. Аивгъуыйгæ рæстæджы сæ бакæнгæ куысты тыххæй базоныны тыххæй æз фембæлдтæн семæ, фæлæ ацы хатт сæ домæнтæ фылдæр уыдысты æмæ сæ рæгъмæ рахæссын æмбæлы. Районы бирæ хъæутæ ис, хъæуы æрзилын фосæн æнæмæнгхъæуæг æххуыс бакæныны тыххæй. Низты ныхмæ фосы хицаумæ хъуамæ фæзынай бынтон раджы, цалынмæ сæ сæрвæтмæ нæ ауадзынц, уæдмæ. Фæлæ куыд бахæццæ уыдзынæ сæумæрайсом иу кæнæ иннæ хъæумæ 10-12 километры дæрддзæгæн фистæгæй? Ам сæ æнæмæнг хъæуы сæрмагонд транспорт, фæлæ сын нæй æмæ тыхстдзинæдтæ æвзарынц. Сæ катайдзинад ноджы у, сæ мыздтæ бынтон цъус кæй сты, ууыл дæр. Цæвиттон, эпизоотолог Лолаты Владимир у хъæууон хæдзарады сгуыхт кусæг, зонæдты кандидат æмæ йæ куыстмызд у 20 минæй чысыл фылдæр. Лолайы фырт зæгъы, зæгъгæ, сын алы аз дæр фæдæттынц сæрмагонд кусæн дарæс, фæлæ йæ, хъыгагæн, ацы аз иу кусæг дæр нæ райста.
Ноджы ма зæгъын хъæуы, кæй апарахат кодтой æнæхъуаджы, цыма фæзынд фадниз. Арцеуæй æрластой дыууæ стуры æмæ сæ сæт калд, уыдон та кæмдæр бырæттæм баивæрзтысты æмæ фæхъæстæ сты. Уый фæстиуæгæн уыд бардзырд, цæмæй уыцы низы ныхмæ фосыл арæзт æрцæуа судзинтæ æмæ ветеринарийы кусджытæ уый тыххæй бафыдæбон кодтой æнæхъуаджы. Уымæн æмæ, Лолайы фырт куыд банысан кодта, уымæ гæсгæ фос ахæм низæй нæ фæрынчын сты. Цæвиттон, уыцы рæстæджы Къостайыхъæуы фысты иу дзуг хызтысты стурты цур æмæ уæд уыдоныл цæмæннæ бахæцыд уыцы низ! Уый ахæм низ у, æмæ æрмæст дымгæ куы радыма, уæддæр иу бæстæйæ иннæмæ бацæуы. Кæй зæгъын æй хъæуы, уыд бардзырд, æмæ стуртæй 2 минæй фылдæрæн сарæзтой судзинтæ, сарæзтой афтæ фыстæн дæр. Уымæй дарддæр ма 189 хуыйæн схос кодтой хуынизы ныхмæ, 70 стурæн фароны баззайгæ хосæй сарæзтой судзинтæ сыбираг хъæдгомы ныхмæ, афтæ хицæн æмбæстæгтæ самал кодтой хостæ æмæ сын эмкар низы ныхмæ схос кодтой. Хъыгагæн, ацы аз ветуправлени нæ райста иунæг вакцинæ дæр, æхца нæй,зæгъгæ.
Хъыгагæн, нæ республикæйы хъæуты азæй-аз къаддæр кæны цæрджыты нымæц æмæ уый катайаг у. Уымæ гæсгæ хъæуы фылдæр æргом уыдонмæ аздахын.
ХУЫБИАТЫ Никъала
