Аивады æвзонг курдиæтты фестиваль

Ивгъуыд къуырийы нӕ горӕты ӕрцыдис Ӕлборты Феликсы номыл сывӕллӕтты ӕмӕ ӕрыгӕтты ӕрвылазон музыкалон фестиваль. Мадзал дӕр уагъд ӕрцыдис Ӕлборты Феликсы номыл музыкалон ахуыргӕнӕндоны залы. Йӕ организатор уыдис нӕ республикӕйы Культурӕйы министрад. Хайад дзы райстой нӕ горӕты музыкалон скъолаты ахуыргӕнинӕгтӕ, музыкалон скъола-студи «Бонвӕрнон»-ы хъомылгӕнинӕгтӕ, Ленингоры ӕмӕ Дзауы музыкалон скъолаты ахуыргӕнинӕгтӕ.

Фестиваль бацӕуӕн ныхасӕй байгом кодта Культурӕйы министрады сӕйраг специалист Наталья Жуйкова. Уый ӕрдзырдта фестивалы нысаниуӕджы тыххӕй, загъта, зӕгъгӕ, йӕ ауадзын ахъаз кӕны ирон классикон музыкӕ кӕстӕр фӕлтӕры ‘хсӕн пропагандӕ кӕнынӕн.

Музыкалон фестивалы жюрийы уӕнгтӕ та уыдысты Дзӕуджыхъӕуы Петр Чайковскийы номыл 1-ӕм музыкалон скъолайы директор ӕмӕ Гергиты Валерийы номыл аивӕдты колледжы ахуыргӕнӕг Козаты Заремӕ ӕмӕ Дзӕуджыхъӕуы Гергиты Валерийы номыл аивӕдты колледжы фортепианойы хайады ахуыргӕнӕг Наталья Коломиец, уый ма уыдис фестивалы жюрийы сӕрдар дӕр.

Фестивалы хайад райстой 25 сывӕллоны бӕрц.

Фестивалы фыццаг номырӕй байгом кодта нӕ горӕты 1-ӕм музыкалон скъолайы ахуыргӕнинаг София Боровик ӕмӕ фортепианойыл сӕххӕст кодта композитор Плиты Христафоры уацмыс «Зул цӕстӕй мӕм ма кӕс». Уый фӕстӕ цалдӕр сахаты дӕргъы фестивалы иннӕ хайадисджытӕ архайдтой, музыкалон уацмыстӕ чи куыд аивдӕр сӕххӕст кӕна, ууыл. Сӕ аивадон арӕхст-дзинад ӕвдыстой вокалӕй, фортепианойыл, аккордеон, ирон фӕндыр, домра ӕмӕ скрипкӕйыл цӕгъдынӕй. Фестивалы иннӕ хайадисджытӕ та уыдысты Ӕлборты Жаннӕ, Хацырты Рузаннӕ, Исаакян Хлоя, Козаты Дианӕ, Биазырты Алан, Дзидздзойтты Виктория, Тетриашвили Кетеван, Читашвили Барбара, Кибилова Ани, Гуыбеты Виктория, Быценты Анна-Мария, Хуыбылты Алан. Ходты Арсен, Цхуырбаты Илья домрӕты ансамбль йӕ уӕнгтӕ Гӕззаты Аленӕ ӕмӕ Козаты Дианӕ ӕмӕ ноджы бирӕ ӕндӕртӕ. Уыдон ӕххӕст кодтой дыгай уацмыстӕ, иу ирон композиторы уацмыс, иннӕ та – уырыссаг.

Фестивалы Гран-прийы хицау ссис нӕ горӕты 1-ӕм музыкалон скъолайы 5-ӕм къласы ахуыргӕнинаг ирон фӕндырдзӕгъдӕг Ходты Арсен, йӕ ахуыргӕнӕг та у РХИ-йы сгуыхт ахуыргӕнӕг Куымӕридтаты Тинӕ.

Музыкалон мадзалы иннӕ хайадисджытӕ та райстой дипломтӕ ӕмӕ зӕрдылдарӕн лӕвӕрттӕ.

Жюрийы уӕнг Козаты Заремӕ ӕх-сызгонӕй банысан кодта, зӕгъгӕ, мӕнӕн тынг ӕхсызгон у, ахӕм фестиваль Хуссар Ирыстоны уагъд кӕй фӕцӕуы ӕрвылаз дӕр. Ӕхсызгон ма мын уый у, ӕмӕ музыкалон ахуырдзинад райсынӕн ам ӕппӕт уавӕртӕ дӕр кӕй ис. Уымӕ гӕсгӕ, зӕгъгӕ, ӕз ацы мадзал нымайын стыр бӕрӕгбоныл.

Наталья Коломиец та фестивалы тыххӕй загъта ахӕм хъуыды, зӕгъгӕ, ӕз ацы конкурсмӕ хуынд дӕн ныр цып-пӕрӕм хатт ӕмӕ куыд уынын, афтӕмӕй азӕй азмӕ йӕ хайадисджыты ӕмвӕзад бӕрзонддӕр кӕны. Фӕнды ма мӕ, цӕмӕй фестивалы хайадисджытӕ фылдӕрӕй-фылдӕр кӕной. Сӕ къухдариуӕггӕнджыты архайд дӕр у раппӕлинаг, уыдон хорз бакусынц сӕ репертуарыл, уӕлдайдӕр та ирон композиторты уацмыстыл. Иудзырдӕй, сӕ бацӕттӕгонд программӕ вӕййы тынг хорз. Сывӕллӕтты музыкалон фестивалӕн ацы аз у юбилейон ӕмӕ йын мӕ зӕрдӕ зӕгъы стыр аивадон ӕнтыстытӕ, – загъта жюрийы сӕрдар.

Туаты Ларисӕ