1989-æм азы 23-æм ноябрь фыст æрцыд Хуссар Ирыстоны ног историйы. Æрвылаз дæр банысан кæнæм уыцы бон. Уымæн æмæ раст уæдæй фæстæмæ бирæ æвзонг лæппутæ æмæ чызджытæн фæивтой сæ царды фæндтæ. Гуырдзыстоны æнæформалты баиугæндтæ «сабыр митинг» ауадзынмæ бирæнымæц автобустæ æмæ рог машинæтыл куы æрбацыдысты, уæд фæивтой, сæ фидæны цардыл хъуыдытæ.
Уыцы азтæн ферохгæнæн нæй, зæрдыл æй хорз бадардтой уыцы азты студенттæ чи уыд, уыцы æвзонг фæсивæд дæр.
Уыдон дыууæйæ Джиоты Мадинæ æмæ Бедойты Зураб сæ мысинæты афтæ зæгъынц:
«Æз уыцы рæстæджы ахуыр кодтон Хуссар Ирыстоны педагогон институты ирон-фæсарæйнаг факультеты. Кæд иннæ факультеты студенттæ дæр активон уыдысты, уæд-дæр мах факультеты фылдæр активисттæ уыд. Арæх-иу æрæмбырд стæм фæслекцитæ институты актон залы. Цоциты Алан нын йæ докладты цы историон факттæ рæгъмæ хаста, уыдонмæ-иу хъуыстам æмæ не уæнгтæ патриотизмы æнкъарæнтæй дзаггкодтой. Хатт-иу æнæхъæн лекци ацыд, знаджы ныхмæ цы амæлттæй тох кæнын хъæуы æмæ фæсивæд цырд куыд хъуамæ фæлæууой, цæмæй нæ зæхх, не ‘взаг бахъахъхъæнæм, уыцы фарстатыл дискуссигæнгæ. 23-æм ноябры боны æмбисы институтыл айхъуыст, Гуырдзыстонæй нæм кæй æрбацæуы бирæнымæц машинæтæ æмæ автобусты колоннæ. Гуырдзыстоны хæстæджытæ кæмæн уыд, уыдонæй базыдтам, мобилизаци кæй цыдысты сæ фæсивæд канд Тбилисæй нæ, фæлæ ма иннæ горæттæй, районтæй æмæ хъæутæй. Сæ нысан – горæты æнæсанкцигонд «сабырадон митинг» ауадзын. Уый официалонæй. Æцæгæй та мах зыдтам, нæ горæт нын бацахсынмæ кæй хъавынц», – дзырдта Джиоты Мадинæ.
«Цæмæн бахъуыд цалдæр мин адæймаджы нæ горæты митинг ауадзыны сæр? Кæд митинг ауадзыны мондаг уыдысты, уæд æй Гуырдзыстоны территорийыл цæмæннæ ауагътой? Лекцитæ дæр нал уыд уыцы бон. Иууылдæр фæсивæд ТЭК-ы районмæ нæхи айстам. Уым лæууыдысты, сæ къухтæ кæрæ-дзимæ цы лæппутæ радтой, уыдон. Уым уыдысты мидхъуыддæгты хайады кусджытæ дæр. Сæ дæлейæ æрæмбырд стæм мах, институты фæсивæды стыр къорд. Уалынмæ æрæмбырд сты ацæргæ адæм дæр. Изæрæрдæм ноджы фылдæр адæм æрæмбырд. Уыцы æхсæв уазал уыд, мит рауарыд. Уавæр карзæй-карздæр кодта. Зæронд хидæй суанг Згъудеры фæзилæнмæ сыгъдысты автомашинæты зæронд цæлхытæ «, – зæгъы Бедойты Зураб дæр.
Джиоты Мадинæ ма куыд радзырдта, афтæмæй сын сæ лектор Битарты Зояйы амындмæ гæсгæ разæй цы лæппутæ уыд, уыдонæн цалдæр чызгимæ бахастой цайданты цай æмæ адджын гуылтæ. «Æнæхонгæ уазджытæ» та уыцы рæстæджы æрбынат кодтой ресторан «Ерцъо»-йы.
«Раст цыма абон уыд, афтæ мæ зæрдыл лæууы, уыцы бон. Горæтмæ цы фæндæгтæ цыд районтæй, уыдон æхгæд æрцыдысты, гуырдзиæгтæ сæвæрдтой постытæ. Горæтæй нал æддæмæ ацæуæн уыд, нал мидæмæ. Стыр æнгомдзинад æвдыстой уæд ирон адæм, стырæй-чысылæй. 24-25-æм ноябры уавæр æндыгъддæр кодта», – адарддæр кодта йæ ныхас Зураб.
Бедойты Зураб куыд зæгъы, афтæмæй гуырдзыйы студенттæ Згъудеры къуылдым-мæ схастой ахæм плакаттæ «Осетия была, есть и будет советской», «Всем народам оди-наковые права» æмæ. а. д. Уыдон дæр сæхи рады равдыстой ахæм плакаттæ «Самачабло неотъемлимая часть Грузии». Сдардтой Жорданиайы тырыса.
Афтæ райдыдта ирон-гуырдзиаг æргом ныхмæлæууынад.
УАЗÆГТЫ Марфа
Comments are closed, but trackbacks and pingbacks are open.