Ацы аз августы мæйы кæрон Хуссар Ирыстон æмæ Гуырдзыстоны арæнтыл гуырдзиаг полициæгтæ æнæзакъонон пост кæй сæвæрдтой, уымæй уавæр бæрæг фендыгъддæр. Уæдæй фæстæмæ Инциденттæ ма æруадзын æмæ сæм хъусдард здахыны фæдыл механизмты фæлгæтты уагъд цæуынц техникон фембæлдтытæ, цыран фæрстæ уынаффæ кæнынц сæвзæргæ уавæрæй рахизыны фæдыл мадзæлттыл, кæд сæ къухы уадиссаг фæстиуджытæ нæма æфты, уæддæр.
Æрæджы цы æхсæзæм техникон фембæлд уагъд æрцыд механизмты фæлгæтты, уым дæр дзырд цыд, æрмæстдæр, уыцы пост аиуварс кæныны тыххæй.
«Ацы инцидент бæстон хъуамæ æрцæуа сабырадон уавæрты – фæрстæн ис сæхи хъуыды ацы ахсджиаг фарсты фæдыл. Гуырдзиаг фарс ныронг æмбаргæ ахаст нæ равдыста», – банысан кодта Хуссар Ирыстонæй делегацийы сæргълæууæг, фæсконфликтон фарстатæ бæстон кæныны фæ-дыл РХИ-йы Президенты æххæстбарджын минæвары хæдивæг Коцты Егорь.
Фæлæ уæддæр хуссарирыстойнаг фарс хъусын кæны, ацы инциденты иунæг æрбæстон кæныны фæрæз кæй у, Гуырдзыстоны полициæгты пост Хуссар Ирыстоны территорийæ ахæссын, гæрзифтонг адæмы акæнын æмæ ацы районы демилитаризаци кæнын. Гуырдзиаг фарс абоны онг дæр йæхицæн уырнын кæны, йæ полициæгты пост йæхи территорийыл æвæрд кæй æрцыд, фæлæ уый æцæгдзинадмæ тынг дард лæууы. Уый тыххæй хуссарирыстойнаг фарс хъусын кæны æмæ ноджыдæр кæндзæн, гуырдзиаг пост хаст хъуамæ æрцæуа Хуссар Ирыстоны территорийæ.
Куыд зонæм, афтæмæй Хуссар Ирыстоны Паддзахадон æдасдзинады комитет бахынцыдта паддзахадон арæнтæ халыны цалдæр цауы – 23 октябры радон хатт хæлд æрцыд нæ республикæйы уæлдæфон тыгъдад æмæ уый фæстæ бон та Знауыры районы Уистæйы хъæумæ хæстæг æрурæдтой Евроцæдисы миссийы хъусдарджыты иу къорды. Семæ аныхас кæныны рæстæджы уыдон басастысты, ома, æнæнхъæлæджы æрбахаудыстæм Хуссар Ирыстоны территоримæ. Фæлæ Паддзахадон æдасдзи-нады комитетæй куыд фехъусын кодтой, уымæ гæсгæ уыдон ифтонг уыдысты навигацийы нырыккон прибортæй, радио-бастдзинад æмæ хъусдарæн фæрæзтæй, нывтæ æмæ видеоисæн аппаратурæйæ.
Коцты Егоры ныхæстæм гæсгæ ацы фарстыл дзырд цыд механизмты фæлгæтты техникон фембæлды рæстæджы дæр. Ацы фарст лæвæрд æрцыд Евроцæдисы мисийы хъусдарджыты минæвæрттæм дæр æмæ ноджыдæр банысан кодтой, кæй фæдзæгъæл сты, уый. Фæлæ уыцы факт æвзæрын кæны бирæнымæц фарстатæ. Ныхасгæнæг куыд банысан кодта, уымæ гæсгæ сæ ныфс ис, æмæ ахæм æнгæс бархалæн цаутæ фæлхатт нал æрцæудзысты, науæд хуссарирыстойнаг фарс райсдзæн закъонмæ гæсгæ мадзæлттæ.
Гуырдзиаг æфсæддон æнæпилотон тæхæн фæрæзыл дзырд куы цæуа, уæд нæдæр гуырдзиаг фарс æмæ нæдæр Евроцæдис æмæ ЕÆÆО-йы минæвæрттæ басастысты, уыцы аппарат цалдæр километры кæй æрбатахт Хуссар Ирыстоны территоримæ.
Ныртæккæ Знауыры районы Уистæйы хъæуы районы Гуырдзыстоны мидхъуыд-дæгты министрады блокпост у æххæст арæзт пункт, кæцыйæ пайда цæудзæн алыфарсон организацион провокацитæ аразынæн.
Нæ уацх.
Comments are closed, but trackbacks and pingbacks are open.