1990-2008 азты гуырдзиаг-ирон хæсты æбæрæгæй фесæфæг адæймæгты бинонтæ куыд хъусын кæнынц, афтæмæй 10-æм августæй 30-æм августмæ уыдон ауадздзысты акци. Уый фæстиуæгæн республикæйы цалдæр хъæуы – Тъбет, Знауыр, Балта, Дменис, Хелцуа æмæ Сатихъары хъæуты æвæрд æрцыдысты анонимон асыччытæ. Уыдон фæрцы сæ зæрдæ дарынц исты бæрæггæнæнтæ æрæмбырд кæнын, сæ сæфт хиуæтты тыххæй.
Проект реализаци кæнынæн сын æххуыс кæнынц президенты цур адæймаджы барты фæдыл æххæстбарджын Тасойты Инал æмæ Сырх Дзуары Дунеон комитет.
«Æрæджы уагъд цыд æхсæнадæмон онлайн-конференци хæсты фæстиуæгæн æбæрæгæй фесæфæг адæймæгты бинонтæн. Мадзалы уынаффæ кодтам иттæг ахсджиаг фарстатыл. Махæн, æбæрæгæй фесæфæг адæймæгты бинонтæн, хæст нæма фæцис. Алы уысм дæр æнхъæлмæ кæсæм нæ хиуæттæм. Виртуалон тыгъдады конференцийы хайад истой 500 адæймаджы бæрц. Уым бинонтæн социалон æмæ психологон æххуысы æнæмæнгхъæуындзинады темæйы æмрæнхъ дзырд цыд æндæр фарстытыл дæр. Мах бахатыдыстæм Сырх Дзуары дунеон комитеты миссимæ, цæмæй нæ фарсмæ æрбалæууой ацы хъуыддаджы», – радзырдта нын нæ республикæйы æбæрæг сæфтыты фонды сæргълæууæг Куыдзеты Лидæ.
Ацы æхсæнады уæнгтæй сæ иу Джиоты Элинæ та афтæ зæгъы: «Мæ фыд æбæрæгæй фесæфт 1990 азты. Уыцы азты æфсад нæма уыд, фæлæ бархионтæ æрбынат кодтой Дзауы районы Уыгæр-дæнты. Уырдыгæй горæтмæ ра-цæуинаг уыд, фæлæ не ‘рхæццæ æмæ йæ уынæг дæр нæ фæцис. Ацы хъæумæ æввахс цæрджытæй чизоны исчи исты федта, кæнæ исты ахæм информаци зонынц, кæцы феххуыс уа агуырды хъуыддаджы, уæд курæг дæн, цæмæй йæ фыстæй асыччы ныппарой. Бирæ азты æнхъæлмæ кæсын зын у. Æз оптимист дæн, зонын мæ фыд æгас нал у, удæгасæй йæ фенын æнхъæл нæ дæн. Фæлæ йын йе стджытæ уæлмæрдмæ фæхæццæ кæнон, уый ныфсæй цæрын. Тынг амонд-джын хонин мæхи, исчи мын исты бæрæг куы зæгъид».
Сырх Дзуары комитеты пресс-службæ та зæгъы, анонимон информаци æмбырд кæныны тыххæй хъæуты цы асыччытæ сæвæрдтой, уыдоныл фыст æрцыд æууæнчы телефон дæр. Ахæм инициативæимæ Сырх Дзуары комитет, ома, гуырдзиаг хъæутæй ирон хъæутæм хæстæг чи у, уым сæвæрæм анонимон асыччытæ, бахатыдысты Гуырдзыстоны хицауадмæ дæр. Фæлæ уыдон разыйы дзуапп нæ радтой. Уымæ гæсгæ уал акци уагъд цæуы иуфарсонæй.
«Асыччытæ байгом кæндзысты 30-æм августы раст уыцы бон нысан цæуы æбæрæгæй сæфт адæймæгты æхсæнадæмон бон. Алы асыккæн дæр йæ фарсмæ æвæрд ис банер цыбыр информациимæ, кæцы тæлмац у цалдæр æвзагмæ. Курæг стæм алы адæймагæй дæр, кæд исты зонынц, уæд ма базивæг кæнæт асыккы фыстæг ныппарынмæ. Бахъарæт сæм бинонты рис», – зæгъынц æбæрæгæй сæфт адæймæгты бинонтæ.
УАЗÆГТЫ Марфа
Comments are closed, but trackbacks and pingbacks are open.