Сырх Дзуары Дунеон Комитет дарддæр кæны йæ хæрзиуæгон архайд Хуссар Ирыстоны æмæ  комплексон æххуыс кæны иууыл тыхстдæр категорийы адæймæгтæн. 1989-1992-æм æмæ 2008-æм хæсты азты æбæрæгæй чи фесæфт, уыдон хъысмæт æмæ бынат сбæрæг кæнын у Комитеты иууыл сæйрагдæр приоритеттæй иу. Организацийæн хицауады æппæт æмбæлон структурæтæ æмæ æбæрæгæй фесæфæг адæймæгты бинонты уæнгтимæ ис æдзухон бастдзинад сæ хъысмæт сын рабæрæг кæныны тыххæй. Комитет дарддæр æмбырд кодта информаци, цы бынаты сæ бавæрдтой, уый рафæлгъауыны фæдыл. Йæ кусджытæ ауагътой фондз фембæлды Хуссар Ирыстоны æндæр æмæ æндæр хъæуты цæрджытимæ, цæмæй æрæмбырд кодтаиккой информаци æмæ сын феххуыс уыдаиккой æбæрæгæй фесæфæг адæймæгты ингæнтæ базонынæн.

Сылгоймæгты дунеон боны  Комитет æмархайд кодта æбæрæгæй фесæфæг æмбæстæгты бинонты уæнгтимæ мысæн мадзал сорганизаци кæныны фæдыл. Уый тыххæй Комитеты минæвæрттæ æбæрæгæй фесæфæг бинонты уæнгтимæ æрæмбырд сты уыцы цауы фæдыл. 25 июны Комитет сорганизаци кодта, æбæрæгæй чи фесæфт, уыцы адæймæгты дыууæ бинонтæн фембæлд ахæм темæйæ: «Æбæрæгæй фесæфæг адæймæгтæ æмæ сæ бинонтæ: механизмтæ, сидтытæ». Комитет бинонтимæ бастдзинад сæндидзын кæныны программæйы фæлгæтты æххуыс кæны, хæсты фæстиуæгæн йæ хæстæджытимæ бастдзинад кæмæн нал ис, уыцы адæймæгтæн. Уымæ гæсгæ сын фадат дæтты Сырх Дзуары Ныстуан арвитын хиуæттæм, кæнæ та телефонон бастдзинады фæрцы. Хæсты рæстæджы йæ бинонтимæ бастдзинад кæмæн нал ис, уыдонæн тынг зын вæййы  ногæй уый сæн-дидзын кæнын. Уыцы ахсджиаг хæс сæххæст кæныныл 2020 азы фыццаг æмбисы  Комитеты кусджытæ бацархайдтой æмæ телефонон бастдзинады фæрцы  бинонтæ сæ кæрæдзимæ адзырдтой 30 хатты. Ноджы ма æххуыс кæнынц, бинонты уæнгтæй хæсты фæстиуæгæн сæ кæрæдзийæ чи фæхицæн, уыдон æрбаввахс кæныныл. Йæ архайды фæрцы банысангонд рæстæгмæ сæ бинонтимæ баиу сты 20 адæймаджы.

Комитеты уæнгтæ бацæуынц ахст æмбæстæгты бынæттæм, цæмæй семæ акæной гуманон ныхас. Тæссаг низ ма фæзыныны нысанæн Комитет ахæстонæн балæвар кодта медицинон маскæтæ, гæрзтæхсæн ссадæг, пысултæ æмæ дзабыртæ, тæбæгътæ æмæ къустæ, фæйнæ плитæ æмæ цайдан, хисæрфæнтæ æмæ æндæртæ. Афтæ ма æххуыс кæны цæрджыты иууыл тыхстдæр  категорийæн хæлцадон æмæ æнæхæлцадон товартæй. Ахæм æххуыс алы квартал дæр æрвыстæуы иунæгæй цæрæг,  тынг  зæрæдтæ æмæ æвæрæз адæймæгтæн, фæлæ уыцы уагæвæрд организаци фæивта СОVД-19 пандемийы фæстиуæгæн. Уымæ гæсгæ ахæм адæймæгтæм цы æххуыс æмбæлы дыууæ кварталы, уыдон сиу кодтой æмæ сæ иу уæрст бакодтой. Комитеты кусджытæ сын радтой дзæвгар хæлцадон пакеттæ, 759 иуæджы индивидуалон гигиенон пакеты. Афтæ æмæ Хуссар Ирыстоны цыппар район æмæ Цхинвалы горæты баххуыс кодтой 197 бинонтæн кæнæ та 271 адæймагæн. Дарддæр дæр йæ кусджытæ цыдысты 14 иунæг адæймæгтæм сæ хæдзæрттæ сын бафснайыны тыххæй, Цхинвалмæ сæм цыдысты æрвылбон дæр æмæ къуыри иу хатт та – Цхинвал, Ленингор æмæ Знауыры районты хъæутæм. Уыдонæн æххуыс кодтой хæлцадон продукттæ, фыццаграды æндæр товартæй, бафснайдтой сын сæ цæрæн хатæнтæ, хастой сын дон. Уымæй дарддæр ма сын организацийы кусджытæ æххуыс кодтой æнæниздзинад хъахъхъæныны уагдæттæм сæ бакæнынæн. Бынæттон хицауадимæ æнгом æмкуысткæнынады фæрцы Комитеты экономикон æдасдзинады хайады кусджытæ административон æгъдауæй се ‘нцой балæууыдысты 25 бинонтæн. Уыдонæн æндæр æмæ æндæр алыгъуызон аххосæгтæм гæсгæ сæ бон нæ уыд сæ документтæ саразын кæнæ та социалон æххуыс райсын.

Хуссар Ирыстоны иууыл тыхстдæр цæрджытæн Комитет се ‘нцой балæууыд ортопедион лæггадæй, стæй уæззау рынчынты Цхинвалæй рынчындæттæм фæхæццæ кæныны хъуыддаджы, уыцы рынчынты нымæц уыд 33. Сырх Дзуары Дунеон Комитет ма республикæйы цæрджытæн бакодта ноджыдæр цалдæр æххуысы.

                                                                 ХУЫБИАТЫ Никъала

Comments are closed, but trackbacks and pingbacks are open.