Уæрæсейы Федерацийы Совет æмæ Паддзахадон Думæйы фæхуындмæ гæсгæ Хуссар Ирыстоны Парламенты делегаци дунеон хъусдарджыты хуызы хайад райстой УФ-йы президентон æвзæрстыты.
Делегацийы сконды уыдысты Парламенты Сæрдар Æлборты Алан, йæ хæдивджытæ Плиты Александр, Чилæхсаты Владимир æмæ Æддагон политикæ æмæ æхсæнпарламентон бастдзинæдты фæдыл комитеты разамонæг Дриаты Заза.
Спутникы пресс-центры брифингы рæстæджы Æлборты Алан куыд банысан кодта, уымæ гæсгæ хуссарирыстойнаг æхсæнадæмон хъусдарджытæ бабæрæг кодтой Мæскуыйы горæты 30 æвзарæн фадыджы. Бакодтой æнтыстджын куыст. Æвзарæн фадгуыты семæ уыдысты Федерацийы Советы сенатортæ. Æвзæрстытæ куыд организаци уыдысты, уый фæдыл спикер банысан кодта сæ бæрзонд æмвæзад, ома, æвзарæгæн æнцонвадат уыдысты.
«Æвзарæн фадгуыты фылдæр хай уыд скъолаты бæстыхæйтты. Стыр хъусдард здæхт цыд æдасдзинады фарстмæ.
Ныртæккæ Уæрæсейы Федерацийы президентон æвзæрстыты æрмæст гæххæттын бюллетенæй дарддæр æмбæстæгтæн фадат уыд электронон, ома, дистанцион æгъдауæй дæр йæ æмбæстагон хæс бафидынæн. Уыцы фадæттæй дæр пайда кодтой милуангай æвзарджытæ.
Фæткхалæн цаутæ хынцыд цыд æви нæ, уый тыххæй Алан радзырдта, зæгъгæ, хуссарирыстойнаг делегаци æндæр хъусдарджытæм абаргæйæ бабæрæг кодта фылдæр æвзарæн фадгуытæ. Фæлæ никуы æмæ ницахæм фæткхалæн цаутæ хынцыд не ‘рцыдис.
Уыцы хъуыддаг бафидар кодта Дриаты Заза дæр.
Дриаты Заза æхсызгонæй банысан кодта, нымæцмæ гæсгæ Хуссар Ирыстоны æвзарджытæ бирæйæ кæй бацыдысты æвзарæн фадгуытæм æмæ раст æвзæрст кæй сарæзтой.
Бæрæг куыд у, уымæ гæсгæ Хуссар Ирыстоны цæрджытæ сæ æууæнк 97 процентæй бафтыдтой Владимир Путины кандидатурæйыл.
Хуссарирыстойнаг парламентаритæ Мæскуыйы фембæлдысты Федерацийы Советы Сæрдары хæдивæг Константин Косачев, сенатортæ Крым Казаноков, Витали Назаренко æмæ æндæртимæ.
Æлборты Аланы ныхæстæм гæсгæ дзырд цыд Хуссар Ирыстон æмæ Уæрæсейы æхсæнпарламентон æмархайды фарстатыл, парламентон къамисы куыстыл. Сенатортæ цымыдис кодтой къамисы куысты ма уæлæмхас цы фарстытыл уынаффæ цæудзæн æмæ нын цахæм æххуыс конд æрцæудзæн, афтæ ма æхсæнпаддзахадон ахастыты иумæйаг уавæрмæ.
Парламенты Сæрдар банысан кодта, зæгъгæ, Ныгуылæны бæстæтæн фадат ис, цæмæй сахуыр уой, Уæрæсейы демократон æвзæрстытæ куыд уадзын хъæуы, ууыл.
«Æртæ боны дæргъы Уæрæсейы Централон æвзарæн къамис æмæ фадыгон къамистыл стыр уæз æрцыд, цæмæй закъонмæ гæсгæ раст æмæ æргомæй уагъд æрцыдаиккой æвзæрстытæ, æмæ иттæг хорз сарæхстысты. Уый у æвзæрстыты легитимон æууæлтæй сæ иу», – дзырдта уый.
Парламентон комитеты разамонæг Дриаты Заза брифингы радзырдта Уæрæсе æмæ Хуссар Ирыстоны ‘хсæн дывæр æмбæстагдзинады тыххæй сразыдзинады фарстыл кæй цæуы активон куыст. Ацы аз апрелы 18-æм боны Мæскуыйы уагъд цæудзæн Паддзахадон Думæ æмæ Хуссар Ирыстоны Парламенты ‘хсæн æмгуыстады фæдыл ‘хсæнпарламентон къамисы рабадт. Ацы ахсджиаг фарст дæр хаст æрцæудзæн боны фæткмæ.
Уæрæсеимæ хуссарирыстойнаг закъондæттынад гармонизаци кæныны куысты фæдыл, æмархайд æмæ социалон фадыджы модернизацийы тыххæй дзырдтой фембæлдтыты. «Уый сæйраджыдæр хауы сæрмагонд æфсæддон операцийы хуссарирыстойнаг хайадисджытæм. Ныртæккæ Уæрæсейы бирæ закъæттæ ист цæуы, кæцытæм гæсгæ социалон æгъдауæй хъахъхъæд цæуынц операцийы хайадисджытæ. Уымæ гæсгæ нæ хæстонтæ, уæрæсейаг æмбæстагдзинады æвдисæндар кæмæн нæй, уыдон дæр хъуамæ пайда кæной уыцы социалон гарантитæй», – загъта Парламенты Сæрдар Æлборты Алан.
Брифинджы кæрон Владимир Путинæн йæ цæст бауарзта æнтыстытæ. Æхсызгонæй банысан кодта, Хуссар Ирыстоны адæмы ‘рдыгæй ахæм фарсхæцынад кæй уыд уæрæсейаг лидерæн. Уымæн æмæ Хуссар Ирыстоны Владимир Путины уарзынц æмæ йын аргъ кæнынц æмæ стыр ныфсимæ рухс фидæнмæ тырндзыстæм уыцы иузæрдион лидеримæ.
КЪÆБУЛТЫ Маринæ
