Бæрц ницæмæй зонæм, нæдæр хорзæй, нæдæр – æвзæрæй… Хъæстаг цæмæй вæййæм, уый тыххæй, хъаст кæнгæйæ, нæ хъиутæ фæхæрæм, æгас дуне нæхимæ æркæсын кæнæм, стæй нæ хъастæн йæ фæстиуæг куы разыны, цы фæдомæм, уый нæ къухы куы бафты, уæд та… Уæд та ууыл цин кæнынæй нал фæзонæм бæрц. Æмæ хатт нæ фырцинæй фæсмонгонд дæр фæвæййæм: фæлтау куынæ хъаст кодтаиккам, куы ницы домдтаиккам…
Нæ горæты уынгты къæвдабон астæумæ цъыфы кæй лæгæрстам, хурбон дзы рыджы кæй хуыдыг кодтам, уымæй хъаст кæнынæй ма Хуыцауы дæр сфæлмæцын кодтам. Æмæ, æппын-фæстаг, сæххæст нæ бæллиц – нæ къалостæ æмæ нæ цырыхъхъытæ аппæрстам… Фæлæ дзы уадиссаг ницы рамбылдтам, фæсмонгонд фестæм уымæй дæр… Æвæццæгæн, зондджындæр æмæ мидисджындæр хъуыдыйæн æрхъуыдыгæнæн нал уыдзæн: чи цы аккаг у, ахæм цардæй цæры… Афтæ у. Нæ уынгтæ сырæзтысты, цæхæртæ скалдтой, фæлæ сыл цæуын нæ зонæм… Цæуын нæ, тæрсгæ кæнæм уынгтыл, иу фарсæй иннæ фарсмæ хизгæйæ. Раздæрау ма нæм цъус машинæтæ куы змæлид, фæлæ ныртæккæ нæ горæты цас машинæтæ ис, уый бæрц машинæтæ Советон дуджы æнæхъæн Фæскавказы æртæ республикæйы дæр нæ уыдис, кæд æй мæгуырты дуг хуыдтам, уæддæр…
Гъемæ, утæппæт машинæтыл чи бады, чи сæ скъæры, уыдонæй æрмæстдæр иуæй-иутæ æнкъарынц ногарæзт уынгты циндзинад. Сæ фылдæр та, фæндаг цæуынæн кæй у, уæлдæфон тыгъдад кæй нæу кæнæ уый не ‘мбарынц, кæннод та циндзинадæй бæрц нæ зонынц æмæ уымæн «тæхынц» ногарæзт уынгтыл…
Макæзæгъæг та сын нæй. Иу-дыууæйы дзы куы æруромиккой æмæ сын сæ тæхæн базыртыл куы æрхæциккой, уæд чысыл сæхиуыл æрхудиккой, уæд сæхиуыл фæхæциккой æндæртæ дæр.
Тæрсы алчи дæр, ахæм скъæрæнтæм кæсгæйæ. Уæлдайдæр та – сывæллæттæн. Æрæджы уынджы хъæбæрыл машинæйы цæфæй йæ мæлæт ссардта ацæргæ лæг. Нæхи уымæй сабыр кæнæм, сывæллон кæнæ хæрзæвзонг адæймаг кæй нæ уыд? Æмæ мах цы хъуыддаг ис кæйдæр цардмæ? Мах æй кæцæй зонæм, уыцы ацæргæ лæджы нырма цас ацæрын фæндыд!..
Уæдæ цалдæр азы размæ дыууæ цæрынхъуаг сылгоймаджы мæлæт дæр хъуыды кæнæм. Стæй хорз хъуыды кæнæм, сæ мæлæт ноджы карздæр æнамонддзинад кæй расайдта, уый дæр…
Æмæ кæдмæ уыдзæн афтæ, кæд базондзыстæм бæрц, æгæр кæй ницæ-мæй бæззы, уый нæм кæд бахъардзæн? Ис закъæттæ, ис фæтк. Алчи дæр æй зоны, горæты уынгты цас тагъдадæй цæуæн ис, уый. Æмæ уыцы фæтк чи фехала, уымæй дзуапп æрдом закъон-мæ гæсгæ. Фæлæ – нæ, уыдæттæ æмбарынхъом нæма стæм, нæ сырæзтыстæм цивилизацион барæнты æмвæзадмæ. Депутат æвзарæм æрмæстдæр иу принципмæ гæсгæ: цы мын бавæййы, кæмæй у, кæй хæрæфырт у, кæй сиахс у… Исчи фæтк фехала, уæддæр афтæ – алкæ-мæн дæр зонгæ æмæ хæстæг разыны…
Æмæ афтæмæй хъаст кæнæм нæ цардæй, нæ хъиутæ хæрæм! Нæхи аххо-сæй цы зындзинæдтæ æвзарæм, уыдон кæнæм Хуыцауы аххос, бæрц кæй ни-цæмæй зонæм, уый нæ хъуыдыйы кæрон дæр нæй.
Кæнæ… Æртæ-цыппар азы размæ дæр ма исчи хæдзар æлхæнын сфæнд кодта æмæ йын уæййаг хæдзар амонынц, зæгъгæ, уæд хæдзар æлхæнæджы фыццаг фарст уыдаид: «Гараж ын ис?». Ныр гараж дæр никæйуал хъæуы.
Горæты уынгтæ арæзт кæй нæ уыдысты, æрмæст ууыл хъаст кæнынæй нæ хордтам нæ хъиутæ, фæлæ ма уынгты рухсытæ кæй нæ сыгъд, уый тыххæй дæр. Ныр сырæзтысты уынгтæ дæр, ис дзы рухсытæ дæр, æхсæв нæ уынгтæ вæййынц бонау рухс, фæлæ та уыцы рухсы фæзынды дæр æнкъарæм фæсмоны рис: йæ машинæ мидæмæ ничиуал кæны, адæмæн сæ гаражты æмæ къулдуæртты æвдузæнтæ сызгæ сты. Алчи дæр æй зоны, уынг бонау рухс куы уа, уæд машинæйæн адавынæй тас нæу. Æмæ горæты цыдæриддæр машинæтæ ис, уыдон æхсæвæй-бонæй урæд сты уынгты, тротуартыл.
Нæй гæнæн æмæ, кæмæ æмбæлы, уыдон иу æхсæв иу машинæйы хицаумæ дуар бахойой æмæ йæ æрфæрсой, йæ машинæ тротуарыл урæд цæмæн у, уымæй?.. Ис. Уый сæ хæс у. Фæлæ та ам дæр афтæ: уыцы машинæ кæй хъыгдары, уым урæд кæй у, ууыл хъаст кæны-нæй йæ хъиутæ чи хæры, уыдон иу-уылдæр сæрылхæцджытæй агæпп ласдзысты.
Гъе, афтæ цæрæм, бæлвырддæр зæгъгæйæ, нæ хъиутæ хæрæм. Нырма исты курынæй, стæй уыцы истæуыл цин кæнынæй. Уæлдайдæр, дзаджджын фынгтыл куы рабадæм æмæ стыр сыкъатæ бæрзонд куы сдарæм, уæд… Уæд ма искуы мах хуызæн адæм вæййы?.. Хæрæджы дымæг! Уæлдай фылдæр, уæлдай тынгдæр фæкæнæм ирон æфсарм æмæ ирон æгъдауы кой. Фæлæ афтæ никуы никæмæн фæзæгъæм: кæд ирон æгъдауыл дзурыс, уæд уал дæхæдæг хуымæтæджы æгъдау фенын кæн – дæ машинæ мидæгæй бауром æмæ макæй хъыгдара…
Фæлæ уый онг нырма хъуамæ сырæзæм. Кæд сырæздзыстæм, уый та риссаг фарст у…
Comments are closed, but trackbacks and pingbacks are open.