Цæмæй фос уой æнæниз, хызт уой алыхуызон низтæй, уый тыххæй нæ республикæйы ветеринарийы кусджытæ сæ хæстæ æххæст кæнынмæ кæсынц бæрндзинады цæстæй. Ацы ахсджиаг куысты хорз архайынц Знауыры районы ветеринартæ дæр æмæ уыдон тыххæй амæйразмæ фыста нæ газет. Фæлæ кусджытæй дæр ис, йæ куыстмæ уæлдай бæрнондæр ахаст чи дары, ахæмтæ. Уыдонæй сæ иу у Хъорнисы ветеринарон фадыджы хистæр Козаты Зауыр. Ацы адæймаг хъæуы схъомыл, йе ‘взонджы бонтæй фæстæмæ йын æнæзонгæ нæу фосдарды куыст. Алы хатт дæр æнкъардта, цæрджытæ сæ фосы æнæниздзинадмæ цахæм хъусдард здæхтой, уый æмæ дæсныйадæн равзæрста фосы дохтыр. Ахуыр кодта Цæгат Ирыстоны хъæууонхæдзарадон институты ветеринарийы факультеты. Фондз азы сахуыр кæныны фæстæ æрыздæхт йæ райгуырæн къуыммæ æмæ ныр 70 азы дæргъы æнæзæрдæхудт куыст кæны ацы фадыджы.
Пенсийы кæд раджы ацыд, уæддæр йæ дæлбаруæвæг кусджытимæ сæ хъус дарынц фосы æнæниздзинадмæ. Йе ‘мкусджытæ Тедеты Фрузя æмæ Цъæритты Джульеттæмæ дæр сæ куысты ис фаг фæлтæрддзинад.
Бæрæг куыд у, афтæмæй хæдзарон фос æмæ мæргътæм дæр æмхиц сты алыхуызон низтæ, куыд эмкар, æрраниз, хуытæ æмæ лыстæг фосы фадниз, хуыты емынæ æмæ æндæртæ. Цæмæй уыдонæй хызт уой, уый тыххæй сын развæлгъау фæхъæуы судзинтæ аразын, фæхъæуы ма дезинфекцион мадзæлттæ дæр æххæст кæнын. Уæд, зæгъæн ис, æмæ уыдон хызт уыдзысты низтæй, мæлындзинад уыдзæн къаддæр æмæ сæ продукци та – бæркадджын. Æппæт уыдæттæ йæ зæрдыл дары Козайы фырт æмæ йæ кусджытимæ алы хатт дæр цæттæ сты фосы æндæр æмæ æндæр низтæй бахизынмæ. Уый тыххæй сæ райгонд сты сæ бæрныуæвæг хъæуты цæрджытæ.
ХУЫБИАТЫ Никъала
