31-æм январы информацион агентад «Спутник-Хуссар Ирыстон»-ы уагъд æрцыдис пресс-конференци нæ республикæйы зонадон интеллигенцийы минæвæрттимæ. Хайад дзы райстой Уанеты Захары номыл зонад-иртасæн институты директор, историон зонæдты кандидат Гаглойты Роберт, йæ хæдивæг, экономикон зонæдты кандидат Къæбысты Мария, ХИПУ-йы зонады куысты фæдыл проректор, техникон зонæдты кандидат, доцент Гаглойты Ланæ æмæ университеты хими æмæ медицинæйы кафедрæйы ахуыргæнæг, химион зонæдты кандидат Санахъоты Маринæ.
Гаглойты Роберт радзырдта институты куысты тыххæй, ацæугæ азы сын цы бантыст æмæ цы проблемæтыл æмбæлынц, æппæт уыдæттыл. «Ныртæккæ институты сæ куыст дарддæр кæнынц æхсæз хайады. Æнтыстытыл дзырд куы цæуа, уæд дзы ахадгæ фæстиуджытæ бантыст экономикæйы хайады зонадон кусджытæн, кæцыйы сæргъ лæууы Къæбысты чызг. Ацы хайады зонадон кусджытæ хайад исынц æхсæнадæмон конференциты Уæрæсейы масштабтыл. Фидарæй мæ уырны экономикæйы хайады æрыгон ахуыргæндтæ нæ республикæйы дунеон æмвæзадыл æндæр æмæ æндæр фæдыздæхтыты кæй базонын кæндзысты, уый». ХИЗИИ-ы куысты сæйрагдæр у финанс кæныны фарста. «Хъыгагæн, æмбæлон финансон фæрæзтæ нæй. Уый аххосæй къуылымпы кæнынц иртасæн мадзæлттæ сорганизаци кæнын археологион экспедицитæм ацæуын, коллегæты цæгаткавказаг регионтæй æрхонын, зонадон публикацитæ уадзынæн дæр. Абоны бон къухфыстытæй лæууынц цыппар монографийы», – йæ тыхст раргом кодта Гаглойы фырт.
Къæбысты Мария журналисттæн фехъусын кодта, зæгъгæ, ацы аз институт кæй ауаддзæн аттестаци зонадон кусджытæн, цæмæй сбæрæг кæной фæстаг 5 азы мидæг чи цæуыл бакуыста, уый. Къæбысты Марияйы хъуыдымæ гæсгæ нырыккон дуджы домæнтæм гæсгæ фылдæр хъусдард аздахын хъæуы математикæ, физикæ æмæ информацион технологитæ хуыздæр ахуыр кæнынмæ. Уый тыххæй хъæуы институты бакæнын ног хайад.
«Ивгъуыд аз нæ институт бафыста æмгуысткæнынады фæдыл сразыдзинадыл УФ-йы хицауады цур финансон университеты Дзæуджыхъæуккаг филиалимæ. Сразыдзинад ахъаз уыдзæнис иумæйаг зонадон иртасæнтæ уадзынæн. Хорз ма уаид зонадон коллабораци саразын. Афтæ ма Фундаменталон иртасынæдты Уæрæсейаг фондимæ (РФФИ) иумæ зонадон иртасынæдты конкурстæ уадзын æрыгон ахуыргæндты æмæ зонадмæ цы фæсивæд цымыдис кæнынц, уыдон æхсæн. Ацы конкурс æрыгон ахуыргæндтæн фадат дæтты сæ зонады дуне фæуæрæхдæр кæнын æмæ иртасæн куыстытæ бакæнынæн», – загъта Къæбысты чызг.
Нæ республикæйы студентон фæсивæды зонадон куыстыл фæцайдагъ кæныны тыххæй ХИПУ-йы зонады куысты фæдыл проректор Гаглойты Ланæ банысан кодта, зæгъгæ, ног университеты бæстыхайы сырæзтимæ сæ уавæртæ дæр бирæ кæй фæхуыздæр сты æмæ кæд бирæ нæ, уæддæр студентты æхсæн ахæмтæ бæрæг кæнынц, кæцыты фæнды зонадон куыст кæнын. «Фæстаг азты фылдæр студенттæ сæ хъус адардтой зонадмæ. Ацы аз та радон хатт ауаддзыстæм 73-æм зонадон-студентон конференци, кæцы-мæ хаст æрцæудзысты нæ университеты студентты хуыздæр куыстытæ. Ацы конференци стыр ахъаз у курдиатджын æмæ ахуырмæ æвзыгъд студентты сбæрæг кæнынæн, уыимæ иумæ ма сæ зонадон иртасæн куыстыл æфтауынæн. Студенттæ разæнгардæй райдыдтой Уæрæсейы уæлдæр ахуыргæнæндæтты базæтыл арæзт æхсæнадæмон конференциты, олимпиадæты, конкурсты архайын æмæ арæх свæййынц уæлахиздзаутæ», – загъта проректор. Ныртæккæ студенттæ сæ ахуыргæнджытимæ æмгуыст кæнынц иумæ æмæ уый фæстæ сæ куыстытæ мыхуыры рацæуынц журнæлтты. Гаглойты Ланæ куыд банысан кодта, афтæмæй ХИПУ фæстаг 10 азы мидæг Уæрæсейы Федерацийы бирæ уæлдæр ахуыргæнæндæттимæ æмгуыстады фæдыл бафыстой 50-йæ фылдæр сразыдзинады. Ацы сразыдзинæдтæ стыр æххуыс сты, цæмæй студенттæ сæ ахуыр адарддæр кæной аспирантурæты æмæ докторантурæты. Гаглойты Ланæ æхсызгонæй фехъусын кодта, зæгъгæ, рæхджы университетæн уыдзæн фадат æнæаргъæй Уæрæсейы паддзахадон библиотекæ, афтæ ма Уæрæсейы Аивæдты паддзахадон библиотекæйы ресурстимæ бастдзинад саразын æмæ дзы пайда кæнын.
Университеты ахуыргæнæг, химион зонæдты кандидат Санахъоты Мария та банысан кодта, зæгъгæ, цæмæй студентон фæсивæд зонадмæ тырной æмæ иртасæн куыстытæ кæной, уый тыххæй сын хъæуы грантты хуызы æххуыс кæнын. «Студенттæн грантон æххуыс гом кæны зонадмæ фæндæгтæ, популяризаци кæны зонадон куыст, æмæ хорз уаид, ацы практикæ мах дæр куы райсиккам», – банысан кодта уый.
ЦХУЫРБАТЫ Ларисæ
Comments are closed, but trackbacks and pingbacks are open.